उत्पत्ति 20

अब्राहम अउ अबीमेलेक

1 फेर अब्राहम उहां लग निकर के सूर कर बीच हे ठहरिस अउ कादेस गरार हे रहै लगिस। 2 गरार सहर हे अब्राहम मनसेन लग कथै कि सारा मोर बेहन आय, गरार सहर के राजा अबीमेलेक हइ बात के सुनथै, तब अबीमेलेक राजा सारा के चाहे लागथै, इहैनिता ऊ हरवाहन के उके लामै के निता पठोथै।✝20:2 उत्पति 12:13; 26:7 3 पय अक रात भगवान अबीमेलेक राजा लग सपना हे बात करिस, भगवान कथै, "देख, तै मर जइहे, जउन डउकी के तै लाय हबस ओखर काज हुइ चुके हबै।" 4 पय अबीमेलेक राजा अब तक सारा के संग नेहको सोय रथै, इहैनिता अबीमेलेक कथै, "हे भगवान, मै दोसी नेहको यहों, का तै बेकसूर मनसे के मरिहे। 5 अब्राहम मोर लग खुदय कहे हबै, हइ डउकी मोर बेहन आय, अउ इहो डउकी कहे हबै कि हइ डउका मोर भाई आय, मै बेकसूर हव मै नेहको जानथो कि मै काहिन करथो?" 6 भगवान सपना हे अबीमेलेक के जबाब देथै, "हां, मै जानथो कि तै बेकसूर हबस, मै तोके मोर बिरोध पाप करै लग बचाय हव, अउ तोके उके छुवै नेहको दयों। 7 इहैनिता अब्राहम के ओखर डउकी लउटाय दे, अब्राहम अक्ठी अक्किल बाले हबै, ऊ तोर निता बिनती करही अउ तै जिन्दा रइहे, अगर तै ऊ डउकी के नेहको लउटइहे, ता जान ले, मै तोके सराप देहुं कि तै अउ तोर सहर के सगलू मनसेन मर जइहिन।" 8 तब अबीमेलेक सुबेन्ने उठके अपन सगलू हरवाहन के बुलाइस, अबीमेलेक राजा सपना हे होय हर बात उनही सगलू बताइस, हरवाह बोहत डर जथै। 9 तब अबीमेलेक अब्राहम के बुलाइस अउ ओखर लग कथै, "तै हमर संग असना काखे करे? मै तोर काहिन बिगाडे रहों? तै हइ झूठ काखे बोले कि ऊ तोर बेहन आय, तै हमर सहर हे बोहत बडा पाप लाद दय हबस, हइ बात तोके मोर संग नेहको करै चाही? 10 फेर अबीमेलेक अब्राहम लग पूंछथै? तै हइ काम केखर बजह लग करे हबस?" 11 तब अब्राहम कथै, "मै डरत रहों, काखे मै सोचे रहों कि इहां कउ भगवान के भय नेहको मानथै, मै सोचे रहों कि सारा के पामै के निता मोके मार डरहिन। 12 ऊ मोर डउकी आय, पय ऊ मोर बेहन हबै, ऊ मोर बाफ के टोरिया आय पय मोर दाय के टोरिया नेहको आय। 13 भगवान मोके बाफ के घर लग दुरिहां पहुंचाइस, भगवान कइन मेर के अलगे-अलगे परदेस हे मोके पठोइस, जब असना हुइस ता मै सारा लग कहे रहों, मोर निता कुछु कर, मनसेन लग कहबे कि तै मोर भाई हबै।" 14 तब अबीमेलेक राजा गेडरा-छेडी गाय गोरू अउ हरवाहन के अब्राहम के दइ दइस अउ ओखर डउकी सारा के लउटाय दइस। 15 अबीमेलेक राजा कथै, "तै चारो पल्ला देख ले, हइ मोरै देस परदेस आय, तै जउन जिघा रहै का चाहथस, उहां रहि सकथस।" 16 अबीमेलेक सारा लग कथै, "देख मै तोर भाई के एक हजार चांदी के खोटन्ना दय हव, जउन मनसेन तुम्हर संग हबै, उन सगलू के नजर हे तै सही हबस, अउ तै बेकसूर हबस, सगलू मनसेन के आगू तोर संग न्याय होय हबै।" 17 तब अब्राहम भगवान लग बिनती करिस, अउ भगवान अबीमेलेक के डउकी अउ हरवाहिन के निक्खा कर देथै, उनखर फेर लरका होय लगिन। 18 काखे भगवान अब्राहम के डउकी सारा के कारन अबीमेलेक के घर के सगलू डउकिन के कोखन के पूर मेर लग बन्द कर दय रथै।