1 जब याकूब सुनिस कि मिस्र देस हे दाना हबै तब अपन टोरवा लग कथै, "तुम अक दूसर के मुंह काखे देखथा?" 2 मै सुने हव कि मिस्र देस हे दाना हबै, तुम उहां जा, अउ हमर निता दाना खरीद के लाबा, जेखर लग हम झइ मरी पय जिन्दा रही।✝ 3 पय यूसुफ के दस भाई दाना खरीदै के निता मिस्र देस हे आइन। 4 याकूब यूसुफ के भाई बिन्यामीन के उनखर संग नेहको पठोथै, उके डर रथै कि कहुं बिन्यामीन के उप्पर कउनो परेसानी झइ आ पडै। 5 आमै बाले याकूब के टोरवा रथै जउन दाना खरीदय के निता आय रथै, काखे कनान देस हे अकाल रथै।✝ 6 हइ टेम यूसुफ मिस्र देस के राजा रथै, केबल यूसुफ रथै जउन मिस्र देस हे आमै बाले मनसेन के दाना बेचै का आदेस दय करथै, यूसुफ के भाई ओखर लिघ्घो आइन अउ उन उके निहुर के परनाम करिन। 7 यूसुफ अपन भाइयन के देखिस अउ उनके चीन लेथै, पय यूसुफ उनखर लग हइ मेर बात करथै जसना ऊ उनके नेहको चीनथै, ऊ उनखर संग गुस्सा लग बात करथै, "तुम कछो लग आय हबा?" उन कथै, "हम कनान देस लग आय हवन।" 8 यूसुफ अपन भाई के जानथै, पय उन उके नेहको चीनथै। 9 यूसुफ उन सपना के बारे हे सुरता करथै, जउन अपन भाई के बारे हे देखे रथै, यूसुफ कथै, "तुम दाना खरीदै के निता नेहको आय हबा, तुम हइ पता लगामै के निता आय हबा कि हम कछो लग ढिलवा हवन?✝" 10 उन यूसुफ लग कथै, "नेहको मालिक, हम तोर लिघ्घो दाना खरीदै के निता आय हवन। 11 हम सब एक्कै डउका के टोरवा हवन, हम सही मनसे हवन, हम इमानदार हवन।" 12 तब यूसुफ उनखर लग कथै, "नेहको, तुम हइ पता लगामै के निता आय हबा कि हम कछो लग ढिलवा हवन?" 13 उन कथै, "हम सगलू भाई हवन, हमर परवार हे बारह भाई हवन, अउ कनान देस वासी हम सब के एक्कै बाफ हबै, हमर सब लग नान भाई हमर बाफ के लिघ्घो घर हे हबै, अउ दूसर भाई बोहत पहिले मर गय हबै।" 14 पय यूसुफ कथै, "जउन बात मै तुम्हर लग कहे हव, ऊ निक्खा हबै, तुम जासूस मनसे हबा। 15 तुम्हर छानबीन करे जही, फिरोन के जीवन के किरिया, जब तक तुम्हर नान भाई इहां नेहको आय जाय, तब तक तुम इहां लग नेहको जाय सकिहा। 16 इहैनिता तुम मसे अकझन जाय, अउ अपन नान भाई के इहां लइके आबै, तब तक तुम जेल हे रइहा जेखर लग तुम सही बोलथा कि नेहको, अगर सही नेहको ठहरिया तब फिरोन कर जीवन कर कसम तुम जरूर झूठा हुइहा, पय मोके बिस्वास हबै, कि तुम बुराई करे बाले मनसे हबा।" 17 यूसुफ उन सब के तीन रोज तक जेल हे बेडवा देथै। 18 यूसुफ तीसर रोज के बाद उनखर लग कथै, "हइ काम करा तब जिन्दा रइहा, काखे मै भगवान लग डरथो। 19 अगर तुम इमानदार मनसे हबा ता तुम्हर भाई मसे अकझन जेल हे रहै, बाकी भाई अपन भूंखे परवार कर निता दाना लइके जाय, 20 तब अपन सब लग नान भाई के लइके इहां मोर लिघ्घो लाबा, तबै मै बिस्वास करिहों, कि तुम सही बोलथा।" 21 उन आपन हे सोचिन, "सही हे हम अपन भाई यूसुफ के परति दोसी हवन, हम ओखर आतमा के कस्ट देखे रथन, जब ऊ हमर लग दया के भीख मांगिस तब हम नेहको सुनन, तबै हइ हमर उप्पर कस्ट आय हबै।" 22 तब रूबेन उनखर लग कथै, "मै तुम्हर लग कहे रथो कि ऊ टोरवा के कुछु पाप झइ करा, पय तुम मोर बात एक्को नेहको सुना, इहैनिता अब हम ओखर मिरतू के निता सजा भोगत हवन।" 23 उन नेहको जानथै कि यूसुफ उनखर बात के समझथै, काखे उनखर बीच हे दुइ मेर के भासा बोले बाले रथै। 24 यूसुफ उनखर लिघ्घो लग हटके रोमै लगिस, अउ ऊ फेरै उनखर लिघ्घो लउटिस अउ उनखर लग बात करिस, यूसुफ उन मसे सिमोन के लइके उनखर आंखी के लिघ्घो उके बन्दी बनाय लइस।

25 एखर बाद यूसुफ आदेस देथै कि उनखर बोरा दाना लग भरे जाय, हर मनसे के बोरा हे चांदी कर पइसा रखे जाय, उनखर रास्ता के निता खाना पीना रखे जाय, उनखर निता ओसनेन करे गइस। 26 यूसुफ के भाई दाना के अपन गदहा हे लादिन अउ उहां लग कढ गइन। 27 जब उन मसे अक्ठी भाई सार हे अपन गदहा के चारा दे के निता अपन बोरा खोलिस, तब ऊ बोरा के मुंह हे अपन चांदी कर पइसा रखे हर देखिस। 28 ऊ अपन भाई लग बोलथै, "मोर पइसा लउटाय दय गय हबै, देखा, हइ मोर बोरा हे हबै।" हइ सुनके ऊ जीव हे जान नेहको रथै, उन बोहत डर गय रथै अउ अक दूसर के देखे लग जथै, उन कथै, "भगवान हमर संग हइ काहिन करिस?" 29 जब उन कनान देस हे अपन बाफ याकूब के लिघ्घो आइन तब उन अपन संग घटे हर घटना के गुठेइस, उन कथै, 30 मिस्र देस के मालिक हमर लग ठोस लग बात करिस, ऊ हमके ऊ देस हे बेकार मनसे समझिस। 31 पय हम ओखर लग कहब, "हम सही मनसे हवन, हम बेकार मनसे नेहको हवन। 32 हम बारह भाई हवन, हम एक्कै बाफ के टोरवा हवन, अक्ठी भाई अब नेहको हबै, सब लग नान हस भाई ई टेम कनान देस हे हमर बाफ के लिघ्घो हबै।" 33 तब देस के राजा हमर लग हइ कहिस, "हइ साबित करै के निता कि तुम सही मनसे हबा हइ रास्ता हबै, अपन भाई मसे अक्ठी के हमर लिघ्घो इहां छांड दे, अपन दाना लइके अपन परवार के लिघ्घो लउट जा। 34 अउ अपन सब लग नान भाई के मोर लिघ्घो लाबा, तब मोके बिस्वास होही कि तुम बेकार मनसे नेहको, पय सही मनसे हबा, मै तुम्हर भाई के तोके सउप दइहों, तब तुम हइ देस हे लेन देन कर सकिहा।" 35 उन दाना के बोरा खोलिन ता देखिन कि हर मनसे के पइसा के थइली ओखर बोरा हे हबै, जब उन अउ उनखर बाफ पइसा के थइली देखथै तब ऊ डर गइस। 36 उनखर बाफ याकूब उनखर लग कथै, तुम मोके बगैर लरका के कर देया, यूसुफ नेहको रहिस, अब सिमोनो नेहको रहिस, अब तुम बिन्यामीन के लइ जइहा, हइ सब परेसानी मोर उप्पर आय पडे हबै। 37 तब रूबेन अपन बाफ लग कथै, "अगर मै बिन्यामीन के वापिस लइके नेहको आहुं ता मोर दोनो टोरवा के मार डरिहा, उके मोर हाथ हे देया, मै उके तोर लिघ्घो वापिस लइहों।" 38 पय याकूब कथै, "मै बिन्यामीन के तुम्हर संग नेहको पठोहुं, ओखर भाई मर चुके हबै, अउ मोर डउकी राहेल के उहै अकेल्ले टोरवा बचे हबै, मिस्र देस के यातरा हे अगर ओखर संग कुछु हुइ गय ता ऊ घटना मोके मार डालही, तुम मोके डोकरा के टेम हे अधलोक हे दुखी करके पठोइहा।"