उत्पत्ति 44

चांदी के खोरिया

1 तब यूसुफ अपन हरवाह के आदेस देथै, यूसुफ कथै, "उन मनसेन के बोरा हे एतका दाना भरा जेतका इन लइ जा सकै अउ हर अक्ठी पइसा ऊ दाना के बोरा हे रख देया। 2 सब लग नान भाई के बोरा हे पइसा रखा, पय ओखर बोरा हे मोर खास चांदी के खोरिया रख देया।" जसना यूसुफ कथै ओसनेन करिन। 3 अगले रोज बोहत सुबेन्ने सब भाई अपन गदहन के संग अपन देस छो वापिस कढ गइन। 4 ऊ सहर लग जादा दुरिहां नेहको गय रथै, कि यूसुफ अपन घर के साहबन लग कथै, जा उन मनसे के पीछा करा, जब तुम उनखर लिघ्घो पहुंचा, तब उनखर लग कहबे, "काखे तुम भलाई कर बलदा बुराई करा? काखे तुम मोर मालिक के चांदी के खोरिया चुराया? 5 हमर मालिक इहै खोरिया लग पीथै, ऊ सपना के बिचार के निता इहै खोरिया के निस्तार करथै, ई खोरिया के चुराय के तुम गलती करे हबा।" 6 तब ऊ उनके जाय के पकड लइन अउ असना बात उनखर लग कथै। 7 उन उनखर लग कथै, "मालिक असना बात काखे कथै? असना काम करैका तोर हरवाहन लग दुरिहां रहन। 8 हम कनान देस लग ऊ पइसा लउटाय दय रथन जउन पहिले हमर बोरा हे मिले रथै, इहैनिता जरूर हम तुम्हर मालिक के घर लग चांदी या सोना नेहको चुराय हवन। 9 अगर तुम कउनो बोरा हे चांदी के ऊ खोरिया पाय जाय ता ऊ मनसे के मिरतू सजा दय जाय अउ हमु मालिक के हरवाह बन जउबे।" 10 हरवाह कथै, "जसना तुम कथा हम ओसनेन करब, पय ऊ मनसे के नेहको मारब, अगर मोके चांदी के खोरिया मिलही ता ऊ मनसे मोर हरवाह होही अउ दूसर भाई आजाद हुइ जइहिन।" 11 तब सगलू भाई अपन बोरिन के हरबी खोल के भुंइ हे रखिन। 12 हरवाह बोरिन के हरबी भुंइ हे मढाय के खोलिन, बोरिन के देखिन, ऊ सब लग बडा भाई लग सुरुवात करथै अउ सब लग नान भाई हे समापत करिन, ऊ बिन्यामीन के बोरा हे खोरिया पाय गय। 13 भाई बोहत दुख हुइन, उन दुख के कारन अपन कपडा चीर डारिन, उन अपन बोरा गदहा के उप्पर लादिन अउ सहर छो लउट गइन। 14 यहूदा अउ ओखर भाई यूसुफ के घर हे आइन। यूसुफ उहै रथै, ऊ ओखर लिघ्घो भुंइ हे निहुर के परनाम करिन। 15 यूसुफ उनखर लग कथै, "तुम हइ कसना काम करा? का तुम नेहको जानथा कि मोर जसना जरूर सोच बिचार कर सकथै?" 16 यहूदा कथै, "मालिक, हम काहिन कहि सकथन? हम काहिन बोली? हम कसना अपन के निरदोस साबित करी? भगवान तोर हरवाहन के दुस्करम के पता लगा लय हबै, अब हम अउ ऊ जेखर लिघ्घो खोरिया पाय गय हबै, तोर हरवाह हबै।" 17 यूसुफ कथै, "असना काम मोर लग दुरिहां रहै, जउन मनसे के लिघ्घो खोरिया पाय गय हबै, उहै मोर हरवाह बनही, तुम आराम के संग अपन बाफ के लिघ्घो कढ जा।"

बिन्यामीन के निता यहूदा के बिनती

18 तब यहूदा के लिघ्घो आथै, अउ ऊ कथै, "हे मोर मालिक, किरपा करके अपन हरवाह के आदेस दे कि ऊ तोर लग कुछु कहि सकै, तोर हरवाह के उप्पर तोर गुस्सा झइ भडकै, काखे तै खुद फिरोन के जसना हबस।" 19 जब हम पहिले इहां आय रथन, मोर परभु अपन सेबक लग पूंछे रहस कि का तोर बाफ या भाई हबै? 20 अउ हम अपन परभु लग कहन, हमर बाफ अक्ठी हबै, ऊ डोकरा हबै अउ हमर अक्ठी नान भाई हबै, हमर बाफ ओखर लग बोहत जादा परेम करथै, काखे ओखर पइदा बुढापा हे होय रथै, हइ अकेल्ले टोरवा हबै, हमर बाफ ओखर लग बोहत जादा परेम करथै। 21 तब तै हमर लग कहे रथस, ऊ भाई के मोर लिघ्घो लाबा, उके मै देखे चाहथो। 22 अउ हम अपन परभु लग कहे रथन, ऊ नान लरका हबै, ऊ अपन बाफ के छांड के नेहको आ सकथै, अगर ऊ अपन बाफ के छांडही ता ओखर बाफ मर जही। 23 तब तै हमके अपन हरवाह के चेतन्त दय रथस, "जब तक तुम्हर संग तुम्हर नान भाई नेहको आही, तुम मोर लग बात नेहको कर सकथा।" 24 इहैनिता हम अपन बाफ के लिघ्घो लउटके गयन अउ तै जउन कहे रथस, परभु के उन बातन के गुठेयन। 25 जब हमर बाफ कहिस, "मिस्र देस फेरै जा अउ हमर निता कुछ भोजन दाना पानी खरीद के लाबा।" 26 तब हम कहे रथन, "हम नेहको जाय सकथन, अगर हमर नान भाई हमर संग जही ता हम जइबे, काखे जब तक हमर नान भाई हमर संग नेहको जही, तब तक हम मिस्र देस के राजा लग बात नेहको कर सकथन।" 27 तब हमर बाफ हमर लग कहे रथै, तुम जानथा कि मोर डउकी राहेल मोके दुइठे टोरवा दइस। 28 मै अक्ठी टोरवा के दूरी जाय दयों अउ ऊ पतेरा के जानवर दवारा मारे गइस अउ तब लग मै उके नेहको देखे हव। 29 अगर तुम मोर दूसर टोरवा के मोर लग दुरिहां लइ जइहा ता अगर उके कुछु हुइ गय ता मै मर जइहों। 30 इहैनिता अगर अब हमर बाफ हइ देखै का पडही, हइ नान टोरवा हमर बाफ के जीवन हे सब लग जादा खास रखथै। 31 जब ऊ देखही कि नान टोरवा हमर संग नेहको हबै ता ऊ मर जही अउ हइ हमर दोस होही, हम अपन बाफ के जादा दुख अउ मिरतू के कारन हुइबे। 32 तोर हरवाह, मै अपन बाफ लग टोरवा के सुराक्छा के जिम्मेदारी लय हव, "अगर मै उके तोर लिघ्घो वापिस नेहको लाथो ता मै तोर परति जीवन भर दोसी बने रइहों।" 33 इहैनिता अब मै तोर लग मांगथो अउ तोर लग बिनती करथो कि किरपा करके नान टोरवा के अपन भाइन के संग जाय दे, अउ मै इंहा रुकिहों अउ तोर हरवाह रइहों। 34 मै अपन बाफ के लिघ्घो नेहको लउट सकथो, अगर हमर संग नान भाई नेहको रही, मै ई बात लग बोहत जादा डरे हव कि मोर बाफ के संग का होही।