1 फेर जब मनसे के संख्या भुंइ के उप्पर बोहत बढै लगिस अउ उनखर टोरिया हुइन, 2 तब भगवान कर टोरवा मनसे के टोरियन के देखिन, कि ऊ सुन्दर हबै, अउ अपन इक्छा के जसना जेही चाहिन उनखर लग काज करिन। 3 तब भगवान कथै, मनसे सरीरै आय, मै हरमेसा के निता इनखर लग अपन आतमा के परेसान नेहको होमै दइहों, मै उनके अक सव बीस साल तक जीवन दइहों। 4 उन दिनन हे भुंइ हे नपीली मनसे रथै, अउ एखर बाद जब भगवान कर टोरवा मनसेन के टोरिया के लिघ्घो गइन, तब उनखर दवारा जउन टोरवा पइदा हुइन ऊ सूरबीर होथै, जिनखर सक्तिसाली परचीनकाल लग परचलित हबै। 5 भगवान देखिस कि मनसेन के बुराई भुंइ हे बढ गय हबै, अउ उनखर मन के सोच हे जउन कुछ पइदा होथै ऊ लगेतार बुराई होथै।✝ 6 भगवान हइ बात हे दुख होथै, कि मै भुंइ हे मनसेन के बनाय के पछतायों इहै बात हे बोहत दुख हुइस। 7 तब भगवान कथै, मै मनसे के जेही मै बनायों उनके भुंइ लग मिटाय देहुं, का मनसे, का पसु, का रेंगै बाले जीव, का आकास के चिरइया, सब के मिटाय देहुं, काखे मै उनही बनाय के पछताथों। 8 पय भुंइ हे भगवान के खुस करै बाले अक्ठी मनसे रथै, ओखर नाम नूह रथै।

9 हइ किस्सा नूह धरमी मनसे के परवार कर हबै, अपन पूरा जीवनकाल हे हरमेसा भगवान के संग चलथै। 10 नूह कर तीनठे लरका रथै, सेम, हाम अउ येपेत। 11 भगवान के नजर हे भुंइ हे बुराई झगडा बोहत बढ गय रथै, ऊ पाप लग भर गय रथै। 12 अउ भगवान भुंइ हे जउन नजर लगाइस ता का देखिस कि ऊ बिगडे हबै, काखे सगलू परानी भुंइ हे अपन-अपन आदत बिगाड लय रथै। 13 तब भगवान नूह लग कथै, "मै सोच लय हव, कि जेतका भुंइ हे जीव परानी हबै, उन सगलू के नास कर करिहों, काखे भुंइ हे बोहत पाप भर चुके हबै। 14 तै गोपेर लकडी के जिहाज बनाबे, तै ओखर भित्तर कोठरिया बनइहे, अउ ओखर भित्तर बाहिर लार के पोत देबे। 15 हइ मेर तै जिहाज बनाबे, ओखर नाप तीन सव हाथ लम्बाई पचास हाथ चउडाई तीस हाथ उंचाई रखबे। 16 जिहाज हे अक्ठी झकिया बनाय लेबे, अउ अक हाथ उप्पर छानी बनाबे, जिहाज हे अक्ठी दूरा रखबे, तै जिहाज के तीन भाग हे बाट देबे, पहिला पटउंहा, दूसर पटउंहा, तीसर पटउंहा। 17 तोके जउन गुठेथो उके समझ, मै भुंइ हे बडा पानी कर बाढ लइहों, आकास कर तरी सगलू जीवन के नास कर देहुं, भुंइ के सगलू जीव मर जइहिन। 18 पय तोर संग मै अक्ठी बाचा बांधहुं इहैनिता तै अपन डउकी अपन टोरवन के अउ पुतउ के संग जिहाज हे आ जइहा। 19 अउ सगलू जिन्दा परानी मसे दुइ-दुइ जोडी करके अपन संग जिहाज हे लइ आनबे जेखर लग ऊ तोर संग जिन्दा रइहिन। 20 अक-अक्ठी जात के चिरइया अउ अक-अक्ठी जात के भुंइ हे रेंगै बाले पसु अउ परानी मसे तोर लिघ्घो आही, तै उनके जिन्दा रखबे। 21 भुंइ के सगलू मेर के खाना जिहाज के भित्तर लइ अनबे, हइ खाना तुम्हर निता अउ सगलू पसु जानवर के निता होही।" 22 नूह हइ सगलू कुछ करिस, नूह भगवान कर सगलू आदेस के मानिस।