1 छय रोज कर बाद यीसु पतरस, याकूब अउ ओखर भाई यूहन्ना के अक्ठी ऊंच डोंगर छो अपन संग लइ जथै। 2 उछो उनखर आगू यीसु कर सकल बदल गइस, ओखर मुंह बेरा के जसना चमक उठिस अउ ओखर बन्डी असना चमकै लगिस जसना उजियार मेर 3 अउ उहां चेलन के मूसा अउ नबी एलिय्याह उनखर संग बात चीत करत दिखाई देथै। 4 तब पतरस यीसु लग कथै, परभु हमर निता निक्खा हबै कि हम सगलू इहै रहबो, अगर तै आदेस दे ता हम तीनठे माडा बनाबो, अक्ठी तोर निता अउ मूसा निता अउ अक्ठी एलिय्याह कर निता।

5 पतरस हइ बात करत रथै कि अक्कैदारिन बादर के छाया आयके यीसु के ढाप लेथै, ता बादर लग आरो आथै, "हइ मोर पिरिया टोरवा हबै, मै एखर लग बोहत खुस हव, एखर बातन के सुना।"

6 जब चेला हइ बात के सुनथै, ता ऊ डर के मारे मुंह के बल गिर पडथै। 7 तब यीसु उनखर लिघ्घो आथै अउ उनके छि के कथै, "झइ डेराबा, ठाड हुइ जा।" 8 जब उन अपन आंखी उठाइन, ता यीसु के सिबाय अउ कउनोन के नेहको देखथै।

9 जब यीसु डोंगर लग तरी उतरत टेम यीसु उनही आदेस देथै, "जउन कुछ तुम देखे हबा, तब तक कउनो के झइ गुठेहा, जब तक मनसे कर टोरवा के मरे हर मसे जिन्दा नेहको हुइ जाय।"

10 फेर चेला ओखर लग पूछथै, "ता गुरू हइ काखे कथै, कि आगू एलिय्याह के आमै के जरूरी हबै?" 11 यीसु जबाब देथै, एलिय्याह जरूर आमै बाले हबै अउ ऊ सगलू कुछु सुधारही। 12 पय मै तुम्हर लग सही कथो, कि एलिय्याह आय चुके हबै अउ मनसे ओहि नेहको चीन्हिन, पय जसना चाहिन ओसनेन ओखर संग करिन, इहैनिता मनसे कर टोरवा उनखर हाथ लग दुख उठाही।

13 तब चेला समझ जथै, कि यीसु यूहन्ना पानी हे बतिस्मा देय के बारे हे कथै।

14 जब यीसु भीड के लिघ्घो पहुंचथै, ता अक्ठी मनसे ओखर लिघ्घो आथै अउ घुटवा टेक के कथै। 15 "हे परभु, मोर टोरवा के उप्पर दया कर उके मिरगी मारथै, ऊ बोहत तडपथै, ऊ आगी हे या कबहुन पानी हे गिर जथै। 16 मै तोर चेला के लिघ्घो लइ गय रहों, पय तोर चेला ओहि निक्खा नेहको कर सकिन।"

17 तब यीसु कथै, "हे अबिस्वासी अउ बेकार मनसे, मै तुम्हर संग कब तक रइहों? तुम्हर कब तक सइहों? ओही मोर लिघ्घो लाबा।" 18 तब यीसु भुतवा के आदेस देथै, अउ भुतवा ओखर भित्तर लग निकड जथै, अउ ऊ उहै टेम लरका निक्खा हुइ जथै।

19 फेर चेला अकेले हे यीसु कर लिघ्घो आयके पूछथै, "कि हम भुतवा के काखे नेहको निकाड सकन?" 20 यीसु उनखर लग कथै, तुम्हर भित्तर बिस्वास कर कमी हबै, मै तुम्हर लग सही कथो कि अगर तुम्हर लिघ्घो राई के दाना के बरोबर बिस्वास हबै, ता तुम हइ डोंगर लग कइहा इछो लग उछो कढ जा, ता ओसनेन होही अउ तुम्हर निता कुछु काम कठिन नेहको होही। 21 पय हइ भुतवन के झुन्ड बिनती अउ उपास के बगैर नेहको निकडथै।*17:21 कुछ पुरान दस्तावेज हे हइ बचन दिखाई नेहको देथै

22 जब सगलू चेला गलील सहर हे आइन तब यीसु उनखर लग कथै, "मनसे कर टोरवा उन मनसेन के हाथ पकडोय जाय बाले हबै, 23 अउ ओहि मार डलहिन, पय ऊ तीसर रोज के बाद फेरै जिन्दा हुइ जही।"

तब हइ बात सुनके चेला बोहत दुखी हुइ जथै।

24 जब यीसु अउ ओखर चेला कफरनहूम सहर हे आथै, ता जउन मंडली के पइसा उगाहै बाले आयके पतरस लग कथै, "का तुम्हर गुरू मंडली के पइसा नेहको देथै?" 25 पतरस जबाब देथै, "हव, देथै" जब पतरस घर हे पहुंचिस। ता ओखर बोलै लग पहिले यीसु पूछथै, "हे समोन तुम काहिन सोचथा? हइ भुंइ के राजा करजा केखर लग लेथै? अपन नागरिक लग।"

26 पतरस कथै, "दूसर के लरकन लग।"

तब यीसु ओखर लग कथै, "नागरिक के पइसा नेहको देय चाही। 27 तउभरमा हम उनखर ठोकड के कारन झइ बनब, तै पानी के दहार हे बनसी लगाबे अउ जउन आगू मछडी पकड हे आही, ओखर मुंह के उघारत टेम तुमके चांदी के अक्ठी खोटन्ना मिलही, उके ले आबे अउ मोर बदला पइसा दइ दइहा।"