1 हुसियार मनसे के जसना कोनहर हबै? अउ कउनो बात के मतलब कोहर लगाय सकथै? मनसे के दिमाक के कारन ओखर सकल चमकथै, अउ ओखर सकल के कठोरता दुरिहां हुइ जथै।

2 राजा के आदेस के पालन करा, अपन भगवान के किरिया के कारन झइ डेरा। 3 ओखर आगू लग कढ जा, अगर ऊ कउनो बात लग खुस नेहको हबै ता तुम उहां झइ रुका काखे राजा जसना चाहथै ओसनेन करथै। 4 काखे राजा के बचन हे सक्ति रथै, अउ कोहर ओखर लग कहि सकथै कि तै का करथस? 5 जउन आदेस के मानथै, ऊ खतरा लग बची अउ हुसियार मनसे के मन टेम अउ नियाव के पोलपट्टी जानथै। 6 काखे हरेक बारे के टेम अउ नियम होथै, पय मनसे के दुख ओखर निता बोहत भारी होथै। 7 ऊ नेहको जानथै कि का होय बाले हबै, अउ कब होही? हइ ओही कोनहर गुठेय सकथै? 8 असना कउनो मनसे नेहको जेखर बस परान हे चलै कि ऊ उके निकडत टेम रोक ले, अउ न कउनो मिरतू के रोज हे साहब होथै, अउ न उके झगडा लग छुट्टी मिल सकथै, अउ न दुस्ट मनसे अपन दुस्टता के कारन बच सकथै। 9 जेतका काम बेरा के तरी छो करे जथै, उन सबके धियान पूरवक देखै हे हइ सब कुछ मै देखों, अउ हइ देखों कि अक्ठी मनसे दूसर मनसे हे साहेब हुइके अपन उप्पर नुसकान लाथै। 10 फेर मै दुस्ट के गाडत टेम देखव, जउन पवितर जिघा हे आय जाय करथै अउ जउन सहर हे उन असना करथै, उहां उनखर सुरता नेहको रथै इहो बेकार हबै। 11 बेकार काम के सजा के आदेस जल्दी लग नेहको दय जथै, हइ कारन मनसेन के मन बेकार काम करै के इक्छा लग भरे रथै। 12 चाहे पापी सव बेर पाप करै अउ अपन रोज बढाबै, तउमा मोके निस्चित हबै कि जउन भगवान लग डरथै अउ उके अपन आगू जानके डेर लग चलथै उनखर भला होही। 13 पय दुस्ट के भला नेहको हुइके, अउ न ओखर जीवनरूपी छाया लम्बा हुइ पाही, काखे भगवान के डेर नेहको मानथै। 14 अक्ठी बेकार बात भुंइ हे होथै, मतलब असना नेक हबै जिनखर ऊ दसा होथै, जउन दुस्ट के होय चाही, अउ असना दुस्ट हबै जिनखर ऊ दसा होथै जउन नेक के होय चाही, मै कथो इहो बेकार हबै। 15 तब मै मगन के सराहों, काखे बेरा तरी मनसे के निता खाय पीय अउ मगन करै के छांड अउ कुछु निक्खा नेहको, काखे इहै ओखर जीवन भर जउन भगवान ओखर निता भुंइ हे ठहराइस, ओखर मेहनत हे ओखर संग बने रही। 16 जब मै दिमाक पायों अउ सब काम देखै के निता जउन भुंइ हे करे जथै अपन मन लगाइस, कि कसना मनसे रात दिन जागत रथै। 17 ता मोके अनुभव हुइस कि भगवान के सगलू काम जउन बेरा के तरी हइ भुंइ हे होथै चाहे मनसे ओखर भेद जानै के निता केतका मेहनत काखे झइ करी, ऊ ओखर पता नेहको लगाय सकथै, अगर कउनो हुसियार मनसे उके जानै के दाबा करी, ता उहो ऊ ओखर पता नेहको लगाय सकथै।