1 सुबेन्नेन टेम सगलू परधान पुजारी अउ समाज के यहूदी सियान यीसु के मरवामै के निता सोंचथै। 2 फेर उन यीसु के बांधिन अउ लइ जाय के राज्यपाल पिलातुस के पकरा देथै।

3 यीसु के पकडवामै बाले यहूदा जब हइ देखथै, कि यीसु के दोसी ठहराथै, ता ऊ बोहत पछताइस अउ ऊ परधान पुजारी अउ सियान यहूदी नेतन के चांदी के ऊ तीसठे खोटन्ना लउटा देथै। 4 ऊ कथै, "मै अक्ठी बेकसूर मनसे के मार डारे के निता पकरवाय के पाप करे हबो" उन मनसे कथै,

"हमही एखर ले का मतलब? तै जान।"

5 ता यहूदा चांदी के खोटन्ना के मन्दिर के भित्तर फटक के कढ गइस, अउ बाहिर जाय के फांसी लगाय लइस।

6 परधान पुजारी ऊ खोटन्नन के उठाय लेथै अउ कथै, हमर नियम के जसना हइ खोटन्नन के बिनती भवन के भन्डार छो रखैके उचित नेहको हबै, काखे एखर खरचा कउनो के खून के निता करे गय रहिस। 7 इहैनिता उन उहै पइसा लग कुम्हरा के खेतबा खरीदय के फइसला करिन, कि जउन बाहिर लग यरुसलेम आमै बाले परदेसी मनसे जउन मर जथै, उनही इहै खेतबा हे गाडे जही। 8 इहैनिता अबहुन तकमा ऊ खेत के खून के खेत के नाम लग जाने जथै।

9 इहैमेर भगवान के ग्यानी मनसे इरमियाह के दवारा कथै, हइ बचन पूर हुइस, "उन चांदी के तीसठे खोटन्ना लेथै, ऊ पइसा जेही इस्राएल के मनसे उके देय के निता जुगाड बनाय रथै। 10 अउ परभु दवारा मोके दय गय आदेस के जसना, ओखर लग कुम्हरा के खेतबा खरीद लेथै।"

11 यीसु के राज्यपाल के आगू लानथै, अउ राज्यपाल ओखर लग पूछथै, "का तै यहूदी मनसे के राजा हबस?" यीसु कथै, "हव जसना तुम कहत हबा।" 12 दूसर पल्ला लग परधान पुजारी अउ सियान यहूदी नेता ओखर उप्पर दोस लगाउत रथै, पय यीसु कउनो जबाब नेहको देथै।

13 तब पिलातुस ओखर लग पूछथै, "का तै नेहको सुनथस कि उन तोर उप्पर केतका दोस लगाथै।"

14 पय यीसु पिलातुस के कउनो दोस के जबाब नेहको देथै, अउ पिलातुस हइ बात लग बोहत चकित हुइ जथै।

15 तेउहार के मोका हे राज्यपाल के परम्परा रथै, कि ऊ कउनो अक्ठी कैदी के जेही मनसेन के भीड चाहथै, उके उनखर निता छांड देथै। 16 यीसु के टेम बरअब्बा नाम के अक्ठी बदनाम जेलियर उहां रथै। 17 पिलातुस उनखर लग पूछथै, "तुम काहिन चाहत हबा मै तुम्हर निता केही छांडव, बरअब्बा के या यीसु के जउन मसीह कहाथै?" 18 पिलातुस जानथै, कि उन उके डाह के कारन पकरवाय हबै।

19 पिलातुस जब नियाव के गद्दी हे बइठथै, ता ओखर डउकी ओखर लिघ्घो अक्ठी खबर पठोथै, "ऊ धरमी मनसे के संग कुछु झइ करबे, काखे मै ओखर बारे हे अक्ठी सपना देखे हमो, जेखर लग मै आज सगला दिन बैजुन्ग रहे हबो।"

20 पय परधान पुजारी अउ सियान यहूदी नेता मनसे के भीड के बहकाथै-उकसाथै, कि उन पिलातुस लग बरअब्बा के छांडै के निता, अउ यीसु के मारे के निता मांग करथै। 21 राज्यपाल मनसेन लग पूछथै, "तुम काहिन चाहथा? दोनो झन मसे तुम्हर निता केही छांडो,"

उन जबाब देथै "बरअब्बा के।"

22 तब पिलातुस उनखर लग पूछथै, "ता मै यीसु के काहिन करव जउन मसीह कहाथै?" सबझन कथै, "उके क्रूस हे टंगाबा।"

23 पिलातुस पूछथै, "ऊ काहिन अपराध करे हबै?" पय उन अउ बोहत चिरलाय लागथै, "उके क्रूस हे टांगय देया।"

24 जब पिलातुस देखथै, कि यीसु के बचामै के निता कउनो जुगाड नेहको हबै, बलुक मनसेन के चिरलाना अउ गुस्सा भडकत जथै, ता ऊ पानी मंगवाय के मनसेन के आगू अपन हाथ धोय के कथै, "मै हइ धरमी मनसे के खून के दोसी नेहको हबो, एही अब तुम जाना।"

25 सगला मनसे जबाब देथै, "एखर खून के जबाबदारी हमर हे अउ हमर लरकन हे होही।"

26 तब पिलातुस उनखर निता बरअब्बा के छांड देथै, अउ यीसु के कोडा लगवाय के क्रूस हे टंगामै के निता सिपाहिन के दइ देथै।

27 फेर सिपाही यीसु के राज्यपाल के घर के भित्तर लइ जथै, उछो ओखर चारो पल्ला सिपाही बोहत बड घर हे जुडथै। 28 उन यीसु के बन्डी उतार देथै, अउ चमकै बाले लाल रंग के बन्डी पहिनाथै। 29 कांटा बाले पुडरा के बने हर अक्ठी मुकुट मेर ओखर मूड हे धर देथै, अउ ओखर दहिना हाथ हे अक्ठी डंडा धरा देथै, अउ ओखर आगू निहुर के मजाक उडाउत कथै, "यहूदी के राजा नमस्ते।" 30 फेर उन ओखर मुंह हे थूकिन अउ डंडा छंडाय के ओखर मूड हे मारै लागथै। 31 जब ओखर मजाक उडा चुकथै ता यीसु के बन्डी के उतार लइन, अउ ओखर खुद के बन्डी के पहिराय के क्रूस हे टंगामै के निता लइ जथै।

32 जब सहर लग निकडत टेम सिपाही कुरैन के रहै बाले समोन नाम के अक्ठी कुरेनी के पाथै, उन ओखर उप्पर दबाव डारिन कि यीसु के क्रूस के उठाय के रेंगै। 33 जब उन गुलगुता जेखर मतलब हबै, "खोपडी के जिघा।" ऊ जिघा हे पहुंचिन, 34 उन यीसु के जहर मिलेहर दारू पिये के निता देथै, यीसु उके चीखिस पय उके पिये लग मना कर देथै।

35 सिपाही यीसु के क्रूस हे टंगाय देथै, अउ चिट्ठी डार के जेखर नाम आइस उन ओखर बन्डी के अपन हे बांट लेथै। 36 एखर बाद हे सिपाही उछो बइठ के उके ताकथै। 37 उन यीसु के मूड के उप्पर ओखर दोस चिट्ठी लिखके टंगाय देथै, "हइ यहूदी के राजा यीसु हबै।" 38 उहै टेम यीसु के संग उन दुइठे चोरटन के क्रूस हे टंगाथै, अकझन के दहिना पल्ला अउ दूसर के टेटरा पल्ला। 39 उछो लग आमै-जाय बाले मनसे यीसु के बुराई करत अउ मूड डोलाउत, 40 हइ कथै, "अरे मन्दिर के गिरामै बाले अउ तीन रोज हे ओही फेरै लग बनामै बाले, खुद के बचा। अगर तै भगवान कर टोरवा हबस ता क्रूस लग तरी छो उतर आ।" 41 ओसनेन परधान पुजारी, नियम के गुरू अउ सियान यहूदी नेतन के संग ओही हइ कहिके मजाक उडाथै, 42 "दूसर के मुकति करै बाले हइ अपन मुकति नेहको कर सकथै, हइ इस्राएल के राजा हबै, हइ क्रूस लग अभिनैन तरी उतरै ता हमु बिस्वास करबो। 43 हइ भगवान हे बिस्वास करथै अगर भगवान एखर लग मगन हबै, ता अब इके बचामै, काखे हइ कहे रहिस, मै भगवान कर टोरवा हबो।" 44 जउन चोरटा यीसु के संग क्रूस हे टंगाय रथै, उनो इहैमेर यीसु के मजाक उडाथै।

45 एखर बाद हे दुपहरी लग लइके तीन बजे तक, सगलू भुंइ हे बोहत अंधियार छाय गइस। 46 करीबन तीन बजे यीसु बोहत आरो लग चिरलाथै, "एली-एली लमा सबक्तनी?" एखर मतलब हबै, "हे मोर भगवान हे मोर भगवान तै मोके काखे छांड दय?" 47 उहां ठाडे मसे कुछ मनसे हइ सुनके कथै, हइ एलिय्याह के गोहराथै। 48 फेर हरबी उनखर मसे अक्ठी मनसे दउरके सिरका हे बुडाय के स्पंज अक्ठी डंडा हे टांग के लानथै, अउ यीसु के पिये के देथै।

49 पय दूसर मनसे कहत रथै, कि छांडा देखथन कि एलिय्याह इके बचामै आथै या नेहको।

50 यीसु फेर बोहत आरो लग चिरलाथै, अउ ओखर परान निकड जथै।

51 उहै टेम मन्दिर के परदा उप्पर लग तरी तक चिथर के दुइठे खन्डा हुइ जथै, अउ भुंइ थरथराय जथै अउ पटपर फट जथै। 52 अउ इहां तक कि मरघटी के पथरा उघर जथै अउ भगवान के मनसे मसे मरे हर बोहत देह जी उठथै। 53 ऊ यीसु के जिन्दा होय के बाद हे ऊ मरघटी लग निकड के यरुसलेम सहर छो जथै, अउ बोहत मनसे उनही देखिन।

54 रोमी सिपाही अउ ओखर संग जउन मनसे यीसु के चवकीदारी करथै, भुंइडोल अउ दूसर घटना के देखके डेराय जथै अउ कहै लागथै, "हइ सहीमा भगवान कर टोरवा रहिस?"

55 उहां बोहत डउकी दुरिहां लग देखथै, जउन गलील सहर लग यीसु के सेबा करे रथै, अउ ओखर मदद करे रथै। 56 उन मसे मरियम मगदलीनी याकूब अउ योसेस के दाय अउ जबदी के लरका के दाय रथै।

57 संझा हुइ जाय के बाद अरिमतियाह सहर लग यूसुफ नाम के धन्नड मनसे आथै, ऊ खुदय यीसु के चेला बन गय रथै। 58 ऊ पिलातुस राजा कर लिघ्घो जाय के यीसु के लोथ मांगथै, अउ पिलातुस आदेस देथै कि लोथ उनही दइ दे जाय। 59 यूसुफ यीसु के लोथ के लइ जायके सुध्द साफ पिछउरी हे लपेटिस। 60 अउ ऊ नबा मरघटी हे मढाय देथै, जेही ऊ पथरा के काट के अपन निता बनवाय रथै, फेरै ऊ पथरा के माडा के दूरा हे अक्ठी बड्डे पथरा के ढनगाय के कढ जथै। 61 मरियम मगदलीनी अउ दूसर डउकी मरियम उहां मरघटी के आगू बइठे रथै।

62 अगले रोज जउन सुस्ताय के रोज रथै, खास पुजारी अउ फरीसी पिलातुस के लिघ्घो गइन। 63 उन कथै, "परभु हमके सुरता हबै, कि ऊ नरै बाले अपन बीते हर टेम हे कहे रथै, कि मै तीन रोज बाद फेरै जी उठिहों। 64 इहैनिता तीसर रोज तक मरघटी कर देखरेख करै के आदेस दय जाय, कहुं असना झइ होय कि ओखर चेला ओखर लोथ के चुराय झइ लइ जाय, अउ मनसेन लग कइहिन कि मरे हर मसे जिन्दा हुइ गय हबै, हइ आखरी झूठ पहिले लग बोहत बेकार होही।"

65 पिलातुस उनखर लग कथै, "तुम्हर लिघ्घो चवकीदार हबै, जा अउ जसना तुमके निक्खा लगै ओसनेन देखरेख के जुगाड करा।"

66 उन कढ जथै अउ उन मरघटी के माडा के दूरा कर पथरा हे सील लगाइन, अउ चवकीदारन के मरघटी हे ताकै के निता बइठाय देथै।