1 पवितर आतमा यीसु के पतेरा छो लइ जथै, ता भुतवा के दवारा ओखर परिक्छा होय। 2 यीसु चालीस रोज अउ चालीस रात उपास करथै, एखर बाद हे उके भूख लागथै। 3 तब परखै बाले यीसु के लिघ्घो आय के कथै, "अगर तै भगवान कर टोरवा हबस, ता कहि दे कि हइ पथरा रोटी बन जाय।"

4 यीसु उके जबाब देथै, "पवितर किताब हे लिखवरे हबै, कि मनसे केबल रोटी खाय लग नेहको, पय ऊ सब बात लग जिन्दा रही, जउन भगवान कर मुंह लग निकडथै।"

5 तब भुतवा यीसु के पवितर सहर यरुसलेम हे लइ जथै, अउ उके बिनती भवन के चुट्ठी हे लइ जायके कथै। 6 अगर तै भगवान कर टोरवा हबस, ता खुद के तरी छो गिराय दे, काखे तोर बारे हे असना लिखररे हबै,

कि ऊ अपन स्वरगदूत के आदेस देही,

अउ तोके हाथो हाथ हे उठाय लेही,

कहुं असना झइ होय कि तोर गोड हे पीरा होय।

7 यीसु ओखर लग कथै, इहो लिखररे हबै, कि तै परभु भगवान कर परिक्छा झइ कर।

8 फेरै भुतवा ओही अक्ठी बोहत डोंगर कर चुट्ठी हे लइ जायके, सगलू दुनिया कर राज अउ उनखर महिमा दिखाइस। 9 भुतवा यीसु लग कथै, "अगर तै गिरके मोके निहुर के परनाम करबे, ता मै हइ सगलू कुछ तोके दइ देहुं।"

10 यीसु जबाब देथै, हे भुतवा इछो लग दुरिहां कढ जा, काखे पवितर किताब हे लिखवरे हबै, अपन परभु भगवान के परनाम कर अउ उहै के सेबा अउ उपास कर।

11 तब भुतवा उछो लग कढ जथै, अउ स्वरगदूत आय के यीसु कर सेबा करै लागथै।

12 यीसु हइ सुनिस कि यूहन्ना के जेल हे बेड दइन, ता ऊ गलील इलाका छो कढ गइस। 13 ऊ नासरत सहर छांड के कफरनहूम सहर हे रहै लगिस, हइ सहर जबूलून अउ नप्ताली परदेस हे हबै। 14 जउन मेर यसायाह ग्यानी मनसे के दवारा कहे रथै, ऊ बात पूर हुइस।

15 जबूलून अउ नप्ताली के देस दहार के टाठा हे,

यरदन नदिया के ऊ पार

गैर यहूदी के गलील।

16 उन जउन अंधियार हे निबास करै बाले हबै,

अक्ठी तेज उजियार के दरसन करिस,

उन मनसे जउन असना जिघा हे निबास करथै, जेखर उप्पर मिरतू छाया हबै,

उजियार हुइस।

17 ऊ टेम लग यीसु परचार करै के अउ हइ संदेस सुनामै लगिस, पाप लग मन बदला काखे स्वरग कर राज लिघ्घो आय गय हबै।

18 यीसु गलील कर दहार कर पाखा हे घूमत रथै, ऊ दुइठे भाई के देखथै समोन जउन पतरस कहाथै, अउ ओखर भाई अन्द्रियास के, जउन जाला लगाउत देखथै, काखे उन ढिमरा रथै। 19 यीसु उनखर लग कथै, "मोर पाछू आबा मै तुमही मनसे के दिलन के पकडै बाले बनाहुं।" 20 उन हरबी जाला के छांड के ओखर पाछू आ जथै।

21 फेर यीसु उछो लग आगू बढथै, ता दुइठे भाई याकूब अउ ओखर भाई यूहन्ना के, उन अपन बाफ जबदी के संग नाह जिहाज हे जाला के निरवारथै, यीसु उनही बलाथै। 22 उन हरबी नाह जिहाज अउ अपन बाफ के छांड के ओखर संग आ जथै।

23 यीसु सगलू गलील इलाका हे उनखर बीच यहूदी मंडली हे स्वरग के राज कर संदेस के बारे हे परचार करथै, अउ हर मेर के नंगहन अउ ढिलवन के निक्खा करथै। 24 अउ सगलू सीरिया देस हे यीसु कर नाम बगर जथै, नंगहा मनसे, भुतवन लग परेसान, मिरगी अउ लकवा बालेन के ओखर लिघ्घो लानथै, यीसु उनही निक्खा कर देथै। 25 इहैनिता गलील अउ दिकापुलिस मतलब दस सहर के परदेस, यरुसलेम, यहूदिया, अउ यरदन नदिया के ऊ पार के मनसे झुन्ड के झुन्ड ओखर पाछू चलथै।