1 Biyi miri won; Me ngan rinyi ri yi ritu bi ri ran ti meme ti ran. Ama ka njo rimi mbi a ti meme ti, ki he ri nji riwa ari tre ri A ti ritu no ka meme ti mbu rega ri ta nji-a he Yeso Kristo riwa a bi kusi Izhi. 2 A he Yeso nye riwa Izhi a no yaa riwa ran he kita nye kiri so ritu meme ti mbu riwa a no kuu ri tu konkron; nga a ran meme ti mbu kakre a ka rega rita ran, ama meme ti wa mgbumglume wawu.

3 Ka ki hu tre Izhi imba nye ki to ri kita ki to-u. 4 Ka njo tre ri,<<Wawu to Izhi,>>Ama a ran hu tre wan ran a he nji ri che, nga kpunji ran he ri wu ran. 5 Ama nji riwa a hu tre Izhi, rimba tsro bibi nyɨme riwa a he riwu ri Izhi. Ngye bibi kya riwa ari no to ki to ri ki he ri kabrutu ri Izhi: 6 Ka ki tre ri ki he rimi kabru tu ri Izhi, ki ka ki ki bibi kya riwa Yeso Kristo a son.

7 Imiri vayi won, rinyi ran he tre sisa nye me ngan ri no yi ran, a he tre ri kɨmo, riwa bi wo ri gbuchi itre ri kɨmo nyi he tre riwa bi wo-u-e. 8 Ama ikya ri sisa he ritu wan bibi son riwa Kristo son a tsro ta ri itre nyi a he sisa kpunji nga ison mbi ngawen a tsro ri itre-a he sisa kpunji, ritu ibuu ri kre nga nji wa to kpunji riwa Izhi ka ikpan wulu rimi son ri Kristo nga son riwa mbi.

9 Ka ki tre ri ki rimi kpan ama kiri kambu ri ngambu, rimba ri tsro ri ki kambu he rimi bu nye mba. 10 Nji riwa a nyɨme vayi wan a he rimi kpan, nga ikyari ran no ti meme ti ran. 11 Ama nji riwa a kawan ri vayi wan a he rimi bu, nga ran ri zren rimi bu, a ran to bubu riwa ari hi ran ritu ibuu ka-u si.

12 Me ngan ri no yi biyi wawa bi he miri Izhi ri tu wa ka meme ti mbi rega ri yi ritu kya riwa Yeso Kristo ti ri yi.

13 Me ngan ri no yi, wa ti, ritu bi to-u riwa a he zhu ri mimɨlan.

Me ngan ri no yi, biyi miri nze ritu bi jɨbu ri wo wa meme sron.

Me ngan ri no yi miri wa tsitsa ritu bi to A ti.

14 Me ngan ri no yi, wa ti, ritu bi to-u riwa a he zhu ri mimɨlan.

Me ngan ri no yi, imiri nze, ritu bi senkpa, nga itre Izhi he ri sron mbi, nga bi han gbengbren meme nji.

15 Ran nyɨme mgbumgblume nyi ran ko kyawa riwa wa he rimi wan ran. Injo riwa a nyɨme mgbumgblume nyi nyɨme riwa A ti mbu Izhi ran he ri sron wan ran. 16 Ritu ko ngye riwa a he ri mgbumgblume bibi nyi wa mbye riwa kpa, nga mbye riwa si, nga kpo ngambu ri kya riwa a ran he wa A ti ran ama riwa mgbumgblume nyi. 17 Mgbumgblume nyi ri kyawa wawa wa he rimi wan wa kre; ama nji riwa ari ti kya riwa Izhi tre ari son hi ri kre wan.

18 Biyi miri won, rinyi he kre vi nye, nga bibi riwa bi wo iri wa kpan fu Kristo wa ye. Ngye bibi riwa ki to ri a he kre vi nye-en. 19 Wa zhu ka ta don, ama tu ri sen wa ran he wambu ran. Wari tre ri wa he wambu, wa ri kamba he ri ta zizan. Ama wa zhu ri ta ritu no tsro ri wa ran he wambu ran.

20 Ama biyi bi ran he ngamba ran ritu nji ri Tsitsri a no yi Yuu wan, nga wawu mbi bi to kpunji. 21 Me ran ngan riyi ritu bi ran to kpunji ran nye, ama ritu bi to kpunji-a nga iche ran he rimi kpunji ran. 22 Ingaa nye he nji ri che? A he nji riwa a kawan ri Yeso ran he Kristo ran bibi nji nyi nye he kpan fu Kristo bibi nji nye ri ka wan ri A ti nga vren. 23 Njo ran kawan ri vren ran he ri A ti ran, nji riwa a kpa vren ari fe A ti ngawen.

24 Biyi bibi kya riwa bi ran kpa ri mimɨlan a kawan he ri sron mbi ka bi ti ngamba, bi kii rimi kabrutu ri Vren nga ri A ti. 25 Nga rimi kabru tu-a bi to ro son riwa a ran kre ran, riwa a la ri wawu ri ka no yi.

26 Me ngan rinyi ri yi ritu wawa wa tru yi ri yo ri nkon meme. 27 Ama biyi bi kpa wu Tsitsri, nga wawu ri son rimi mbi, ri ngamba, bi ran ri wa no njo no tsro yi kya riwa a he kpunji ran ritu Iyu tsro yi kya riwa bi wa bi ri to, nga ikya riwa a tsro yi a he kpunji a ran he che ran bibi riwa a tsro yi, kii rimi ka kabru tu ri Izhi.

28 Ama zizan, biyi miri won sondu ran ki rimi kabrutu ri Kristo ritu ka a bru ye ki ran ti sisiri ran ko ka no shan ti ta kusi wan ran.

29 Riwa ki to ri Kristo he ri ti dindi, ki to ri nji wawa wa ti kya riwa a tsra wa he miri Izhi.