1 Biyi wa kpan won, ran kpanyɨme ri ko bibi Yuu ritan ran ama bi ka tsra wa to ko wa to ko wa zhu ri Izhi nye, ritu wa la tre Izhi wa che wa zhu bla mgbumgblume. 2 Ngye ngan bibi riwa bi ti bi ri to ko wa he Yuu Izhi nye mba, Iyu riwa a nyɨme ri Yeso Kristo ye rimi kpa a he rwa Izhi, 3 ama Iyu riwa a ran nyɨme ri Yeso ran a ran he wa Izhi ran. Rinyi nye he Yuu riwa kpan fu Kristo riwa bi wo iri ari ye ko zizan wa ye rimi mgbumgblume-e.

4 Biyi miri wa tsitsa bi he wa Izhi nga bi jɨbu ri wo mba ritu Iyu Izhi riwa a he rimi mbi a senkpa han riwa a he rɨme mgbumgblume nye 5 Wawa wa he wa mgbumgblume nye wari ri tretre riwa gbungblume nye, nga gbungblume ri wo wa. 6 Ama kita ki he wa Izhi, nga nji riwa a to Izhi ari sren ton ri ta ama nji riwa a ran he wa Izhi ran a ran sren ton ri wu ran. Ngye bibi riwa ki ti kiri to Yuu ri kpunji nga Yuu ri che ti nkan.

7 Biyi wa kpan won no ta ki nyɨme ngambu ritu inyɨme zhu ri Izhi nye nji riwa a nyɨme vayi wan a he riwa Izhi nga ran to Izhi. 8 Inji riwa a ran he ri nyɨme ran a ran to Izhi ran, ritu Izhi nye he nyɨme. 9 Ngye bibi riwa Izhi tsro nyɨme wan rita-en. A tru vren wan riri ye ri mgbumgblume ritu kiri fe son ritu wan. 10 Rinyi nye he nyɨme ri kpunji: a ran kita ki nyɨme Izhi ran ama riwa Izhi nyɨme ta nga ran tru vren wan no he nkon riwa wa ka meme ti mbu rega rita. 11 Biyi wa kpan won, ritu riwa Izhi nyɨme ta, kita ngawen ki nyɨme ngambu. 12 Njo ran to Izhi zari ran, ama ka ki nyɨme ngambu, Izhi ri he ri sron mbu nga nyɨme wan ri bran ri sron mbu.

13 Ngha Izhi no ta Yuu wan bibi riwa ki to ri kita ki he ri sron wan nga wawu he ri sron mbu. 14 Ngha ki to kiri la wari iri A ti tru vren wan Yeso no ye kpa mgbumgblume chuwo. 15 Inji riwa a nyɨme ri Yeso he vren Izhi nye Izhi ri son ri sron wan nga wawu ri son ri sron Izhi ngawen. 16 Ki to bibi nyɨme riwa Izhi nyɨme ta nga ki yo sron mbu ri nyɨme wa Izhi nye he nyɨme, nhi riwa a he rimi nyɨme a he he rimi Izhi nga Izhi ri he rimi mba. 17 Ri nganyi nye inyɨme ri bran ri sron mbu ritu kiri ran ti sisiri kusi Izhi ran chachu riwa ari bla tre ri nji wawu, ritu ri mgbumgblume nyi ki he wawu. 18 Sisiri ran he rimi nyɨme ran. Ritu sisiri ri de yaa ri nji riwa ari ti sisiri, a ran ri he ri nyɨme ri kpunji ran.

19 Ki nyɨme ngambu ritu wawu Izhi gbuchi nyɨme ta. 20 ka njo tre ri,<<Me nyɨme Izhi.>> Ama ran ri kawan ri vayi wan, a he nji ri che. Inji riwa a ran nyɨme vayi wan riwa ari to-u ri si ran, a ran nyɨme Izhi riwa a ran to-u ri si ran. 21 Ngye kya riwa Izhi a la ta ki ti-en: Izhi a la ta ri nji riwa a nyɨme wawu no nyɨme vayi wan ngawen.