1 Ri ngamba, ka meme ti ri ko bibi tan chuwo ri su tu, igyuru nji, iti huu, nga kran nji nga kra njitu. 2 Ti mbye ka imiri ŋenŋen wawa wa he ri la ima sisan ri tsitsri wu, ritu ri wa nde bi so bi gbron bi ri fe kpa chuwo, 3 Bibi riwa imbe Izhi tre ri,<<Bi to ri tumbi bibi rereriwa Izhi he ri wu.>>

4 Ye ri Bachi riwa a he ka tita ri nchi tra bubu bre riwa Izhi nji wa kamba ri wu ama a he ri gbɨre ri Izhi rewa a chu wu. 5 Zizan, Izhi ri mme yi ka tita wawa wa bi ri tra wan ri wu riwa wa bre Izhi, bubu riwa a he ka wa sro yii wa tsitsri wawa bi sro yii ri wu nga riwa a bi ri Izhi huu ri Yeso Kristo. 6 Imbe Izhi tre ri:

<<Me zhu tita riwa a bi,

riwa me sen-u ka tita ri nchi tra Siyona,

nji riwa a kpa nyɨme ri wu,

ishan ran ti-u ran.>>

7 Tita nyi ri bi bran riyi wawa bi kpanyɨme ri wu. Ama wawa wana kpanyɨme ri wu ran,

<<Tita riwa wa mme wa kamba riwu nye,

zizan a he tita riwa wa ka-u sen ri nju tra.>>

8 Ngha mbe Izhi bru tre,<<Ngye tita riwa ari no nji no wa kɨbu

dza nga han riwa ari nji no wa joku.>>

Wa kɨbu dza ritu wa kamba ri kpanyɨme ri tre Izhi ngamba nye a he ti Izhi ri wa.

9 Ama biyi bi ran he ngamba ran biyi bi he wawa Izhi chu yi bi he ka wa ko chu, mgbumgblume ri tsitsri riwa Izhi, wa nji wan, rinyi he ngamba riwa bi tsro mgbron nji ndindi ti riwa Izhi ritu riwa a yo yi zhu rimi bu ye ri kpan wan ri de sisiri. 10 Ri sen bi ran he wa nji riwa Izhi ran ama zizan bi he wan nji riwa Izhi ri sen bi ran fe lo sron riwa Izhi ran, ama zizan bi kpa lo sron riwa Izhi.

11 Biyi miri vayi wa hu Izhi, me ibreyi ritu bi he tsren, nga graan, ka nkon meme mbiye riwa kpaa wawa wa kpa yi time don. 12 Ti rereri son mbi, ri wawa wana hu Izhi ran, ko ka wa ngaan yi ritu ti meme ti waka to mkpen zren mbi, wari kpanyɨme wari no Izhi mkpen wan inde a ye riwa ari bla tre ri mgbumgblume.

13 Ritu Bachi, ka tu mbi no wa kpanchi son: ko ri chu riwa wawu nye he rinkon, 14 nga wa rinkon wawa ichu zhu, no wa no wawa wa ti meme ti yaa, wari no wawa wa ti ndindi ti mkpen. 15 Izhi riwa a no ndu mbi no bi ritu no ka ti wawa wa tre ri mkpran riwa wana to ran. 16 Sonson ri tu mbi, ama ran no son ri tumbi no no yi ti meme ti ran, ama kuki ka wa graan riwa Izhi. 17 No ko ngaa mkpen wan, nyɨme miri vayi wa hu Izhi, ti sisiri Izhi bi ri no chu rinkon mkpen.

18 Biyi wa graan ka ngambi no wa nji wa ko mbi bi ri no mkpen riwa a tsra, a ran ra ri wawa wa he ri rereran ama ka hu ri wawa wa ti sron. 19 Izhi ri ti lɨbu ndindi sro yi, ritu rinyi i bi vu sron ri yaa riwa bi ti ritu ndu wan. 20 Ko ingye nye he senkpa mbi riwa i wa tsi yi ritu kya riwa bi ti, ama i bi ti ndu ri ndindi riwa bi so yaa ritu wan bi ri vu sron, wawu nye ri he kya riwa Izhi ri kpa. 21 Ri tu kya nyi nye Izhi yo yi no yi ti, riwa Kristo so yaa ritu mbi ran kayi chuwo no yi ran ti bibi kya riwa wawu ti. 22 Yeso a ran ti meme ti kyari dzari ran, nga wana wo che ri nyu wan zari ran. 23 Riwa wa kra-u tu a ran kra wa zhula ran, riwa a so yaa, a ran no wa sisiri ran, ama a yo sron wan ri Izhi riwa ari bla tre ri kpunji. 24 Kristo kyuwan a ban meme ti mbu ri kpa wan hi ri konkron riwa wa kpan-u, ritu ki son-son mbu ka wawa wa kuu ri meme ti, nga son ri si ri ndindi ti ritu njon wa kpa wan nye wa den yi kpa chuwo. 25 Bi ran kado ka intɨma, ama zizan bi ye ri nji riwa ari ya yi.