1 Wa ta yi shɨme ri kuu ri Kristo, ri ngamba bi yosron mbi ri kyawa wawa wa he ri shu, bubu riwa Kristo son ri kpanchi wan ri kuwori riwa Izhi. 2 Ka sron mbi yo ri kyawa he ri shu, a ran kyawa wa mgbumgblume meme nyi ran. 3 Ritu bi kuu, nga ivɨri mbi ri ri Kristo ri Izhi. 4 Ivɨri mbi ri kpunji he Kristo nga i a zhu ye imba biyi ngawen bi zhu ri wu rimi mkpen wan.

5 A he riwa bi kuu, imba nye imbye ri mgbumgblume riwa wa ti ndu wawa wa he iwa mbaa ri ronron, intɨran, imbye, (meme mbye nga hu Izhi riwa wa ran to-u ran). 6 Ritu kyawa wamba nye ifu Izhi ri ye ri wawa wa ran hu tre wan ran. 7 Biyi kyumbi ri sen bi ran son rimi bibi mbye mba, riwa bi ran he ri wa. 8 Ama zizan bi ka kyawa wamba rega: ifu, nga isron ri kambi ri nji. No kra tu ko itre meme ran zhu ri nyun mbi ngaran. 9 Ran ti che ti ngambi ran, ritu bi ban bibi ti mbi ri sen zho, 10 nga ran no yi son ri sisa. Rinyi nye he son sisa riwa Izhi, nji riwa a ti a ri sondu sran yi rimi bibi riwa a he, ritu ran ngɨzhi yi ye ri ngawan wawu. 11 Ritu wan nye wa ran to nji Yahuda ti nkan ri wawa wa ran he nji Yahuda ran, wawa wa fon wa nju nga wawa wa he ri mbru, wawa wa ran to kya ran, gran ikpachuwo,ama Kristo he wawu, nga a he rimi wawu. 12 Biyi bi he wa nji Izhi; a nyɨme yi nga ran chu yi ri ngawan. Rimba bi ka ngambi ri tsro kyumbi ri rerenga vu sron. 13 Nyɨme ngambi nga bi ri ka meme ti ngambi rega, chachu riwa iri mbi ngɨzhi njo ri nkan ri sron. Bi ka meme ti ngambi rega bibi riwa Bachi ka meme ti mbi rega. 14 Ngha rimi kyawa wanyi yo nyɨme ngaa rimi wan, riwa a lo kongye rimi kabrutu. 15 Isisron riwa Kristo de no tsro yi rimi kya riwa bi yosron ri bi ti; ritu riwa a he ritu sisron-a nye Izhi yo yi kabru rimi kpa riri. Ngha bi ri ngɨri. 16 No tre Kristo no son rimi sron mbi.Tsro ngambi nga bi ri nyɨme ngambi ri wiwiri. Chuse riwa Doda, nga se ri gbre Izhi, nga se ri ngɨri ri Izhi. 17 Kongye riwa wu ti ka wu tre, no he rimi nde Bachi Yeso, riwa wu ngɨri ri A ti Izhi hu ri wu.

18 Imba, ka tu mbi no wa ron mbi, ritu rimba nye he kya riwa bi ti ka wa hu Izhi. 19 Biyi ronron, nyɨme wa mbaa mbi ran ti sron ri wa ran. 20 Biyi miri, a he ti mbi riwa wa hu Izhi no yi hu tre wa ti mbi bla vi, rimba nye he kya riwa ari sii Izhi sron. 21 Wati, ran kpa sron miri mbi time ran ritu no ran zhu ri yosron mba ri yi ran. 22 Gran, hu tre wa ti ko mbi rimi ko ngye, a ran ritu wa ya yi kakre ran ritu wu wa wa bi ri sii wa sron; ama ti-u ri sron riri ritu no Bachi mkpen. 23 Kongye riwa wu ti, ti-u ri sron wen riri, ka wu ti-u ri Bachi a ran ri nji ran. 24 Taka ri Bachi ri no yi kyari riwa a kadzi ri wa nji wan. Kristo nye he. Ti ka ri kpunji riwa bi ti ndu ri wu. 25 Wa ti meme ti wa han wa ritu meme ti mba riwa wa ti, ritu Izhi ri bla tre ri ko ngan ri bibi kya riwa a ti,