1 Imbe nyi zhu ri Yahuda ivren ndu Yeso Kristo nga a he vayi Yakubu, a ngan hi ri wawa Izhi a yo wa, riwa a nyɨme wa ran ka wa dzi ri wo Yeso Kristo no ran ya wa:

2 No Izhi losron riwa Izhi, isisron, nga nyɨme no he ri yi bran.

3 Biyi wa kpan won waw me nyɨme yi, me ran wa me ri nghan ri yi ritu kpachuwo riwa ki he ri wu, me to ri bi no wen me ngan ri yi no yi nɨran yosron riwa Izhi a ka no wa tsitsri wan ri mkpa riri kakre ri seen. 4 Me tre rinyi ritu nji wari wawa wa ran hu Izhi ran wa bɨre gra rimi kabrutu mbi wari tre ri ndindi ti Izhi la ri ki son rimi ti meme ti ri kru mba. Wa la bibi yaa riwa wa no bibi nji wa mba tu ri seen, ritu wa kamba ri Tiko mbu Bachi Yeso Kristo.

5 Ko ri riwa bi to kyawa wa nyi-e, me wa meri taka ri yi ritu bibi riwa Bachi a kpa wa nji Israila chuwo ri wo nji Masara, ama kugon wan a wuu wawa wa ran kpa nyɨme ri wu ran. 6 Inga me taka ri yi ritu miri ko Izhi wawa wa ran ki ri dren mkpen riwa Izhi a ka no wa ran, nga wari ka bubu ki mba don. Izhi a ka wa lo ri dzi rimi bubu bu gbingbi gben nchon vi riwa a ri bla tre. 7 Taka Sodom nga Gomora ngawen, nga gbu ri kusan wan riwa wa nji mba wa ti bibi wa miri ko Izhi wa ti-a, wa yo tu mba ri meme ti ri kru mba nga meme mbye riwa kpa. Wa so yaa rimi wulu riwa a ran kre ran ritu no he fe nton ri mgbron nji wawu.

8 Nghamba nye mee ri wa raa-a wawa wa zuu kpa mba, wa kamba ri mkpen Bachi nga wari tre tre meme ri wawa wa he ri mkpen. 9 Ama kau ri vren ko Izhi riwa wa yo-u ri Mikailu, a ran ngaan meme nji ri kpa nde time ran, ama a tre ri,<<No Bachi no yɨra nga!<< Rinyi a he ri bubu riwa wa Mikalu wa ran janyu mba meme nji ritu kɨmo Musa. 10 Ama nji wanyi wa kratu ritu kya riwa wa ran to tu wan ran, wa ti kya riwa isron mba no wa, wa he ka nɨma ji wawa wa ran ri taka ran, wawa nye wa he kya riwa ari wuu wa.

11 Iyaa mba! ritu wa hu bibi ti riwa Kayinu; riwa a wuu vayi wan. Ngha wari ti mbye bibi wa Balaam, wa gyuru nji ritu nkren, nga wari wuu wa bibi wa Kora ritu wanyu mba.

12 Inji wanyi wa he ka tita ri mme riwa a rii ngawan ri nchi ima, riwa wa he ri yi rimi kabrutu mbi riwa bi ri ri. Ka wa ri ri ri yi, wa ri ri sron riri wa ran ri ti shan ran.Wa he ka wa kɨshu ntɨma wawa wa wa ri nne mba kakre wari ka ntɨma mba don, wa he ka iwo wulu riwa a ran ri ngɨzhi wulu ye ran, gungu ri fu wa rega; wa he ka konkron riwa ka chachu sren kpi ye a ran ri ti wɨlo ran. 13 Wa he ka ifu ishi ima ri nne, riwa ari fu nfon meme ti mba zhu raa; wa he ka ntsen hwa riwa Izhi ka wa dzi ri bubu riwa a ti bu hi ri vi riwa a ran kre ran.

14 A he Enok riwa a he ngɨzhi ri tamgban kugon Adamu, a la tre ri kusi ritu nji wanyi ri,<<Wo wen, Bachi ri ye ri wa tsitsri wan ngo kigbu, 15 no wa ye bla tre ri ko ngaa, nga wari no wawa wa ran ri hu Izhi ran yaa ritu meme ti mba, nga kratu riwa wawa wa ran hu Izhi ran wa kra Izhi tu.<< 16 Inji wanyi wa he wa murunyu nga wari ri to meme ti ngamba, wa hu mbye riwa meme ti mba; wa kpo ngamba wari ri gyuru wari zhuka wa nyɨme wa, ritu wa ri fe kya riwa wa waa.

17 Ama biyi wa kpan won, taka kya riwa wa ndu Bachi mbu Yeso Kristo wa la ri sen. 18 Wa tre ri yi ri,<<Chachu kre vi wa nji wari wa wɨyen no Bachi ri wa nji wan, wa ran hu mbye mba ri meme ti.<< 19 Nji wanyi nye wa ga yi tinkan, wawa wa hu mbye mba ri kpa a ran ri Yuu Izhi ran. 20 Ama biyi wa kpan won, bi dzon ngambi rimi yosron mbi ri tsitsri, nga bi ri bre Izhi rimi gbengbren Yuu Tsitsri, 21 kii gbengben rimi nyɨme riwa Izhi he ri wu ri ta, bibi riwa bi gben Bachi Yeso Kristo rimi losron wan no ngɨzhi vɨri riwa a ran kre ran ye no yi.

22 Bi losron ri wawa wa kamba ri kpanyɨme. 23 Bi kpa wari chuwo, bi ri nɨran wa zho rimi gon wulu, nga bi ri losron ri wa ri sisiri, ama bi kambi ri meme ti mba riwa a kpa sron mba time.

24 Zizan no mkpen wawu no he wa Izhi riwa a he ri gbengbren riwa a ri ngɨzhi wu, wu ran joku ran, nga ari ka-u de ri ngɨri ri kusi mkpen wan. 25 No mkpen no he wa Izhi riwa wawu nkankshe wan nye he Izhi, ikpa ta chuwo hu ri Yeso Kristo Bachi mbu. Mkpen wawu ri gbre, ri gbengbren, nga kpanchi wa he wa ma tu ri seen, nga ri zizan hi kusi! No he ngamba.