1 Imbe nyi he riwa wa kyawa wawa wa ti riwa Yeso Kristo a nghiran. Izhi a nghiran wa kyawa wa nyi ri wu ritu ran no wa ndu wan no wa kpan wan no wa to kya riwa a ran ban vi ran ari ti. Kristo a no kyawa wa nyi no wa he ri rira ri vren ndu wan Yohana riwa a tru nji ri ndu wan hi ri wu, 2 nga Yohana ka la kongye riwa a to. Rinyi a he tre wan ritu tre riwa a zhu ri Izhi nga kpunji riwa Yeso Kristo a la. 3 Dindi ti he wa nji riwa a kra mbe nyi, nga dindi ti he wa wawa wa sren ton ri wa tre ri kusi nyi nga wari hu kya riwa wa ngan rimi mbe nyi! Ritu ivi ye hyure riwa wa kyawa wa nyi wa ti.

4 A he ame Yohana me ngan mbe nyi ri no wa tra Izhi tamgban riwa wa he ri meme Asiya: Dindi ti nga sisron riwa Izhi no he wa mbi, Izhi riwa a he, Izhi riwa a he nga riwa ari ye, nga zhu ri wu tamgban riwa wa he ri kusi kpanchi wan, 5 nga zhu ri Yeso Kristo, ila tre ri kpunji, ri mimilan riwa a tashime ri bubu gru nga riwa wawu nye he rinkon wa chu wa gbungblume.

A nyime ta, nga ika yii wan rega kpa ta chuwo ri meme ti mbu 6 nga a kɨma ta he kpanchi wa ndu Izhi ki ri tindu ri Izhi wan nga A ti wan. No gbre no he wa Yeso Kristo nga gbengbren riwa a ran kre ran! No he ngamba. 7 Ya, ingye nga ari ye ri shuwulu! Ko nga ri to, ka hu ri wawa wa tɨbu. Inji wawu ri mgbumgblume wa ti shnji sron ritu wan. No he ngamba!

8 Bachi Izhi a tre ri, <<Ame nye me he ri mimilan nga me ri he krenkpen,>> Riwa, riwa a he nga riwa ari ye.

9 Ame Yohana, vayi mbi, nga ri wawa wa hu Yeso ame me he kpandu wen rimi vusron ri yaa riwa a ye ri wawa wa he ri kpanchi Izhi. Wa vu wen ka yo ri meme riwa ima kagon wan riwa wa yo ri Batmos ritu me la tre Izhi nga kpunji riwa Yeso a ye la. 10 Chachu vi ri bre Bachi Iyu Bachi a ye gra ri mo, nga me wo raan gbangban riwa a he ka rangan, a ran yi kugon won. 11 Iran a tre ri, <<Nghan kya riwa wu to, nga wu ri tru mbe hi no wa tra Izhi tamgban: Afisa nga Simirna, nga Birgamu nga Tiyatira, nga Sardis, nga Filadelfiya nga Lawudikiya.>> 12 Me kɨma gon me ri to ko a he ngaa nye ri tre ri me, nga me to konkron riwa wa ka wulu dzi ri tu wan riwa wa ti ri zinariya mgbɨre tamgban, 13 nga rimi mba ikyari a he ka nji, a su tsro guglo riwa a ke riwu ri gbɨre dza, nga ran klo zinariya ri gbobre. 14 Nfu tu wan a he kinklan ka nfuzhuzhu, nga isi wan a ran rinzan ka iwulu; 15 idza wan a ran shan ka krefi riwa wa son ri wulu, nga iran wan ka ran glo ka ikɨbu ima. 16 A ngizhi ntsen huwa tamgban ri wo ri wan, nga nji mgban ri nyu hari ka zhu ri nyu wan. isi wan ka kpan ka gbege zhi. 17 Riwa me to, me ku ri kusi wan ka ikɨmo. Ka yo wo wan ri kuwo ri ri mo ri tu ran tre ri, <<Ran ti sisiri ran! Ame mi he mimilan me ri he kremkpen. 18 Ame me he ri vri! Me ran kuu, ama zizan me he ri vri riwa a ran kre ran. Me he ri wulo nkon riwa kuu nga mgbumgblume ri kuu. 19 Zizan wu ngan, wa kyawa wawa bi to, ri wa kyawa wa zizan nga kyawa wawa wa he kusi. 20 Ingye nchi tu ntsen huwa tamgban riwa wu to ri kuwo ri won, nga tu nchi konkron ri dzi wulu tamgban: intsen huwa tamgban wa he miriko Izhi ri tra Izhi tamgban, nga konkron tamgban ri dzi wulu wa he Tra Izhi.>>