1 Me to vren ntɨma a bu kya riwa wa lo ri mimilan ri mgbɨre tamgban riwa wa lo, nga me wo raan ri rimi kyawa wa vri ngbɨre nza riwa a glo ka inzan ri, <<Ye!>> 2 Me ya nga me to nghimaa kinklan. Inji riwa a hon nghima a ngizhi ta, nga wa noon tsro tu riwa chu. A zhu ka nji riwa a ta ri ritu a ta ri. 3 Imba ivren ntɨma ka nghiren mbe; nga me wo kya ri vri ri hari wan ka tre ri, <<Ye!>> 4 Nghɨma ri nkan ri sren ka bru zhu. Wa no nji riwa a hon gbengbren riwa a ri ngizhi ku ye ri mgbumgblume, ritu no nji no wa wuu ngamba. Wa no nji mgban kigbu bran. 5 Imba ivren ntɨma ka nghiren kya riwa wa lo ri tra wan; nga me wo kya ri vri ri tra wan ka tre ri, <<Ye!>>Me ya, nga me to nghima ri shnji. Njio riwa a hon nghima-a ngɨzhi kya riwa wa tsra kpi ri wu ri wo. 6 Me wo kya riwa a glo ka iraan riwa a zhu ri wa kyawa wa vri mgbɨre nza, riwa wa tre ri, <<Nvangho wɨlo suu riwa a ri ke nkiren ndu ri vi riri, nga nvangho tra ri wɨlo bale riwa a ri tsra ri nkren riwa ivren ndu ri fe ri vi riri. Ama ran kpa wɨlo zaitun nga ima inabi time ran!>> 7 Imba ivren ntɨma a nghiren mbe ri nza; nga me wo kya ri vri ri nza wan ka tre,<<Ye!>> 8 Me ka ya, nga me ka to nghima riwa iima kpa wan a he ima vunvu. nde nji riwa a hon wu a he kuu, bubu son wawa wa kuu ka he kusan wan. Waka no wa gbengbren ri rimi ngbɨre nza ri ko ngye riwa a he ri mgbumgblume, ritu no wa wuu wa ri ku, ri yon, lilo nga wa nɨma ji. 9 Imba ivren ntɨma-a kla nghren mbe Izhi ri ton wan. Me ka to ndodza bubu bre wawa wa wuu wa-a ritu wa bla tre Izhi nga ritu la tre riwa wa la ri kpunji. 10 Wa kpagro mgbamgban ri, <<Bachi riwa a he ri gbengbren wawu, riwa a he ri tsitsri nga kpunji! Shitan nye ko wu bla tre ri wawa wa he ri mgbumgblume nyi nga wu ri no wa yaa ritu riwa wa wuu ta?>> 11 Waka no ko ngha rimi mba itsro kinklan, nga wa ri la wa ri no wa hi ki vri tsawen, tse wa wuu wa mgbron kpan ndu mba nga wa hu Izhi-a ri bibi riwa wa wuu wawa me ri. 12 Nga me to vren ntɨma-a ka bu mbe Izhi ri tanren. Inchon dzi tsu ka ye, nga izhi ka kɨma he shnji ka itsro shnji, nga ihuwa a kɨma sren ka iyii. 13 Intsen huwa waka hwen rega ri mgbumgblume, a he ka iwɨlo mbwa riwa inchon ngungu ri ti ka kpo wa rega. 14 Ishu wulu ka nye ngawan ka bibi riwa wa nye mbe, nga ko mgblu ritan mba bubu riwa iima kagon wan waka chiwi ka bubu riwa wa he don. 15 Imba wa chu wa mgbumgblume, wa ngizhi kpanchi nga wa rinkon wa klukpa, wawa wa he ri wo nga wawa wa he ri gbengbren, nga mgbron nji wawu, nga wa gran ri wawa wa ran he gran ran, waka ri ngamba ri nfron nga ri raan tita ri tu wa mgblu. 16 Waka la wa mgblu nga wa tita ri, <<Joku bi ri kɨshu ta ti no si nji riwa a son ri kpanchi nga ri fu vren ntɨma ran to ta ran! 17 Inchon vi ri fu mba ye, nga ngha ri to kri kusi wan?>>