1 Imba me ka to Ishu sisa nga gbungblume sisa. Ishu ri mimilan nga ri hari wan waka kado, nga nne ka kado. 2 Nga me to gbu ri Tsitsri, Urushalima ri sisa, ka zhu ri Izhi ri shu ran ye ri meme, mɨlan ti nga wuri son gben, ka iwa riwa wa gran mɨlan son ri gben roon wan. 3 Me wo raan gbangban zhu ri kpanchi ran ye ri: <<Zizan iti Zhi he ri wa nji , nga wawu ri son ri wa. Izhi kyuwan ri son ri wa, nga ari he Izhi mba. 4 Ari se ma si zho ri wa ri si wawu. Ikuu ran he ngaran, shnji sron, ko yi, ko lo ran he ngaran. kyawa wa kɨmo wa kado.>> 5 Imba Izhi riwa a son ri kpanchi ka tre ri, <<Nga zizan me no kongye no he sisa!>> Nga ran tre mo ri, <<Ngha rinyi, ritu itre nyi wa he kpunji nga bi nyime ri wu.<< 6 Nga ran tre ri, <<A kre! Me he mimilan meri he krenkpen, me he gbuchi me ri he kre. Ko ngha riwa ila ma ti wu me no hwiri no so ri ma ri de vri a ran tse a han ran. 7 Wawa wa ta ri wa fe rinyi ri me: Me he Izhi mba, nga wawa wa he miri won. 8 Ama wawa wa ti sisiri, wawa wa ri kpi nji, wa ti kyawa wa shan, nga wa wu nji, ri wawa wa ti ya tsu, wawa wa hu Izhi ri nka, nga wa che wawu bubu riwa wa kadzi ri wa ri gon ka wulu nga nzan riwa a he ku ri hari.>>

9 Iri rimi miriko Izhi tangba riwa a he ri vangho tangba riwa a sho ri ya tangba ka ye ri me ran tre ri,<<Ye, nga me tsro yi wa sa, iwa vren ntɨma.>> 10 Iyu a gra ri mo, nga ivren ko Izhi ka ban wen hi ri tu nchon ngblu. A tsro wen Urushelima, igbu ri Tsitsri, zhu ri Izhi ri shu ran ye me 11 a ran kpan ri nkpen Izhi. nchon gbu a kpan wan a he ka tita dindi, a he ka yaspa, a kpan ka iyu ri ya. 12 nchon gbu ri kankan riwa a dzen, ri nko wuru don hari nga ri miri ko Izhi wuru don hari wawa nye wa he wa ya nko. Wa nga nde rɨme tangba riwa wa nji Israila ri kpa nko. 13 Nkon tra a he ri ko kungo ritan: itra ri kusi nzan, itra ri kugbo nga itra ri kushu nga itra ri kusi yawulu. 14 Wa mme ndo ri gbu ri tu tita ri nchi tra tangban riwa ri kpa wan wa nga nde wa ndu Izhi riwa vren ntɨma. 15 Ivren ko Izhi riwa a tre ri kpala ri tsra kpi ri zinariya riwa a ri tsra gbu, ri nko nga kankan wan. 16 Wa milan nju gbu mme, kahu ri ipiri ri glo wan. Vren ko Izhi a milan gbu tsra ri kpala ri tsra wan: A tsra ka he dza ngo wuru don hari, ipiri wan ri glo wan a he bibi riri. 17 Ivren ko Zhi ka tsra kankan, nga a he ndza gbigba hari ri wuru don tanren ri glo, bibi tsra riwa wa tsra wa ti. 18 Wa mme ndo ri Yaspa, nga igbu mba waka mme ri kpi Zinariya nga ran ri kpan ka iyu ri ya sii. 19 Tita ri nchi tra ri wa kankan ri gbu wa ti ri ko bibi ri tita ri pkan riri. Nchi tra ri riri ka he Yaspa, ri hari wan ka he Safaya nga ri tra wan ka he agat, ri nza wan ka he zumurudus, 20 ri ton wan ka he Onis, ri tanre wan ka he kaneliya, ri tangba wan ka he kirisolat, ri tandra wan ka he beril, ri chu wa ka he tofas, ri wuru ka he dayimon, ri wuru don ri ka he yasin, ri wuru don hari ka he ametis. 21 Nko wuru don hari wa he shuwa; ko nko ritan wa ti ri shuwa wuru don hari; wa ti ko nko ritan ri shuwa ri. Wa ti wa wiri ri gbu ri zinariya kakre, ka ran kpan ka wu ri ya si. 22 Me ran to tra bre Izhi ri gbu ran, ritu itra bre Izhi mba he ncho Bachi Izhi nga vren ntɨma. 23 Nchon gbu ran ri wa zhi ko huwa ritu no kpan ri gbu ran, ritu nkpen Izhi ri kpan rimi wan, nga vren ntɨma he pitila ri gbu mba. 24 Wa nji wa gbungblume wa dzren rimi kpan wan, nga wa chu wa gbungblume wa ngɨzhi wa wo mba ye rimi wan. 25 Nkon ri gbu mba ri kri ri hwo zhakuu; wa ran ka wa ran, ritu ichu ran he ri bubu wan ran. 26 Wa ngɨzhi wo wan nga nkpen riwa wa gbu ye rimi gbu mba. 27 Ama ikya riwa a dzu ran ri gra ri gbu ran, ko ka njo riwa a ti kya ri shan ko a la che. Ari he wawa wa ngha nde mba rimi mbe wa vri riwa vren ntɨma nyen wa gra rimi gbu.