1 Imba me ka ya, nga ivren ntɨma ka kri ri tu nchon ngblu ri Siyona; ri wu ri bubu riwa nji ngo gbigba ri ri senza don nza wawa wa nga nde wan nga nde Ti wan ri chi mba. 2 Nga me wo raan ri shu riwa a glo ka iraan gmo ima, a glo ka iyira nzan. A glo ka wa stsi kpi ro, wa tsi ngungu mba. 3 Inji 144,000 wa ki ri kusi kpanchi, kusi kyawa wa vri ti nza, nga wa rinkon; wa ran chu se sisa, riwa wawa kakre wa to tsro. Rimi nji wawu wawa nye wa he wawa wa kpa wa chuwo 4 Wa he ronron wawa wa ka kpa mba dzi wa ran ka kpa mba kabru ri mbaa ran; wa ran to mba ran. wa hu vren ntɨma hi ko kutan riwa ari hi. Wa kpawa chuwo ri ri dzran riwa ngbron nji nga wa he wa mimilan wawa wa he wawa wa kawa no Izhi nga vren ntɨma. 5 Wa ran wo che ri nyu mba zari to ran; wa ran ti meme ti ran.

6 Imba me ka to vren ko Izhi ri ka ran kan ri shu, ri tre ri ro riwa a ran kre ran riwa ari la gbungblume, ri ko wa ngha, ri rɨme, ri nga gbu. 7 A tre ri ran gbangban ri, <<No Izhi nkpen nga bi ri gbre nde wan! ritu ivi ye riwa ari bla tre ri nji wawu. kɨbu ngbazhu ri wu bi ri fe hi ri shu, nga ri gbungblume ri nne, nga ndzii ma.>> 8 Ivren ko Izhi ri hari wan ka hu gon ri mimilan, ran tre ri, <<A joku! Inchon gbu Babila joku! A no nji wawu no wa so ima ri ro wan, ima ri ro ri ntran riwa a senkpa!>> 9 Ivren ko Izhi ri tra ka hu gon hari ran tre ri raan gbangban ri,<<Wawa wa kɨbu ngbazhi ri meme nɨma ri nne nga wu wan nga wari kpa nkpan wan ri chi mba ko ri wo mba 10 wawa kyumba wa so ima ri ro riwa Izhi, ima ri ro fu wan riwa a bwa sro ri gbengbren wan rimi vangho ri fu wan! Wawa wa ti rinyi wa no wa ya rimi wulu riwa ari mɨwi ri kusi miriko Izhi wa tsitsri nga vren ntɨma. 11 Ntsen wulu riwa ari no wa ya ri hi ri shu riwa a ran yi tu ran. Ikpa chuwo ran he ran ri wawa wa kɨbu ngbazhu ri meme nɨma rimi nne nga wu wan ran ko ri zhi ko ri chu ran, ko nga riwa a he ri nkpan ri nde wan.>> 12 Rinyi he riwa wa nji Izhi wa vu sron, wawa wa hu doka Izhi nga wa ri ti kpunji ti Yeso. 13 Imba me wo raan zhu ri shu ye ri, <<Ngha rinyi: Zizan ban kusi ingiri ri he wa wawa wa ti ndu Bachi!>>

<<Kpunji tre>> Iyu a tre ngamba. <<Wa ri ro ri ya ndu mba, ritu ife ri ndu mba hu wa.>>

14 Imba me ya, nga me to kpa wulu kinklan, nga kyari ka son ri mi wan ka nji, ri ntan tu chu ri zinariya ri tu wan nga ri riji ri wo wan. 15 Imba ivren ko Izhi ri ka zhu ri bubu bre Izhi ran yi gbangban ri, <<Ti ndu ri riji wen wuri sren kpi, ritu ivi ye; gbungblume wiri riwa wa srenwu!>> 16 Imba riwa a son ri kpa wulu-a ka son riji wan-a ri gbungblume, nga isren kpi ri gbungblume ka wiri. 17 Imba me ka to vren ko Izhi ri ka bru zhu ri kusi bubu bre Izhi ri shu ye, nga ka he ri riji riwa ari ri ngawen. 18 Imba Ivren ko Izhi ri, riwa wawu nye aran ya bubu wulu, a zhu ri bubu bre Izhi Izhi. A kpagro gbangban ri vren ko Izhi riwa a ngɨzhi riji-a ri, <<Ti ndu ri riji wen wu ri sren wa konkron inabi ri zhu inabi, ritu konkron inabi wa wiri-e!>> 19 Imba ivren ko Izhi-a ka son riji wan ri gbungblume, ran sren wɨlo ngru ri kpa wan, ran ka wa ta sro rimi juju bubu fu Izhi. 20 Waka shibi wɨlo ngru ri bubu riwa a he ri kugon gbu, iyi wan ka sondu ran zhu ri bubu wan, wa tsra glo wan riwa a ke mili gbigba hari nga iron wan ka he dza ton.