1 Ivrenko Izhi ka tsro wen ba ri ma ri vri, a kpan ka wu, nga ka zhu ri kpanchi Izhi nga vren ntɨma 2 nga ka ran gmo ri tsutsu wiri ri gbu. Konkron ri vri wa he ri ko kungo ritan ri ba riwa ari klo nkpa wuru don hari ri se, nkpa ri huwa; nga vunvu wan wa he den ri wa gbu. 3 Wa ran fe kya riwa Izhi la nyu ri wu rimi mba ran. Kpanchi Izhi nga wa vren ntɨma wa he ri gba, nga wa ndu wan wa ku nga zhu ri wu. 4 wa to si wan, nga wa nga nde wan ri chi mba. 5 Ichu ran he ngaran, nga wa ran wa pitila ko ka ikpan zhi, ritu Bachi Izhi ri he kpan wuiu mba, nga wa he ka chu hi ri vi riwa a ran kre ran.

6 Vren ko Izhi ka tre ri mo ri, <<Wa tre nyi wa he kpunji nga wu nyime wa. Nga Bachi Izhi, riwa a ka Wu wan no wa la tre wan ri kusi, a ti vren ko wan ndu no tsro wa ndu wan kya riwa a ti riwa a ran ban vi ran.>> 7 Yeso ka tre ri,<<Wo! Iye won ran ban vi ran! Dindi ti ri he wa wawa wa hu tre ri la tre wan ri kusi rimi mbe nyi!>> 8 Ame Yohana, me wo meri to wa kyawa wa nyi. nga ka me wo me ri to wa kre, i me ku ri kusi vren ko Izhi riwa wawu la wen kyawa wanyi, nga me ran wa meri ku ngbazhu ri wu. 9 Ama a tre mo ri, <<Ran ku ngbazhu ri mo ran! Me he vren ndu ka a wu nga wa miri vayi wen wa la tre Izhi ri kusi nga wawu wawa wa hu tre rimi mbe nyi. Ku ngbazhu ri wu!>> 10 Nga ran tre ri mo ri,<<Ran ka tre ri la tre ri kusi rimi mbe nyi dzi ri yayɨbi ran, ritu ivi ye hure riwa kyawa wanyi wa ye. 11 Nji riwa ari ti meme ti no sondu ran ti meme ti, nga nji riwa ari ti kya ri zu si no sondu ran ti; nji riwa ari ti dindi no sondu ran ti dindi, nga nji riwa a he tsitsri no sondu ran he tsitsri.>> 12 Yeso ka tre ri,<< Wo! Iye won ran ban vi ran! Me ye ri ife ri ndu won, meri ka no kongha tsra ri kya riwa a ti. 13 Me he mimilan meri he krenkpen, gbuchi nga kre.>> 14 Dindi ti ri he wa wawa wa ngɨla tsro mba zhu nga wa fe nkon ri klo konkron ri vri nga wari gra hu nkon hi rimi ncho gbu. 15 Ama wawa wa he ri ra gbu wawa nye wa ti ndu ri zu, ri wawa wa ti ya tsu, ri wa ti ntɨran, ri wa wu nji, ri wawa wa hu Izhi riwa wa ran to ran, wawa wa ti che ri tre nga ti mba, 16 <<Ame, Yeso, me tru vren ko won no ye la yi kya nyi ri tra Izhi. Ame me he nchi gɨzhi wa Doda; Ame me he kpan ri ntsen huwa ri mbre.>> 17 Iyu nga wa sa ka tre ri,<<Ye!>> Ko nga riwa a wo rinyi ari tre ngawen ri,<<Ye!>> Ye, ko nga riwa ila ma ri ti wu; kpa ma ri vri no he ka ide, ko nga riwa a wa.

18 Ame, Yohana, me fen ton ko nga riwa a wo tre ri la tre ri kusi ri mbe nyi: ka njo yo kya nga rimi mba, Izhi ri sro ya nga rimi riwa a nga rimi mbe nyi. 19 Nga ka njo ban kya zho rimi mbe tre ri la tre ri kusi nyi, Izhi ri ban ga riwa mba rimi klo konkron ri vri nyi nga gbu ri Tsitsri, riwa wa la rimi mbe nyi.

20 Wawu riwa a sheda wa kyawa wanyi wawu ran tre ri, <<Kpunji tre nye iye wen ran ban vi ran!>>

No he ngamba. Ye, Bachi Yeso!

21 No dindi ti Bachi Yeso no he ri ko ngha.