1 Imba me wo raan gbangban zhu ri iko Izhi ri miri ko Izhi tangban ri: <<Hi bi ri bwa vangho tangban ri fu Izhi ri gbungblume!<< 2 Ivren ko ri mimilan ka hi ran bwa vangho wan ri gbungblume. Meme njon waka zhu ri wawa wa he ri nkpan riwa meme nɨma rimi nne nga ri wawa wa kɨbu ngbazhu ri wu wan. 3 Ivren ko ri hari wan ka bwa vangho wan ri nne. Ima ka kɨma ka yii riwa nji riwa a kuu, nga kongye riwa ari vri rimi ima ka kuu. 4 Imba ri tra wan ka bwa wama ri yibo nga ba, nga ma ka kɨma ti yi. 5 Me wo ivren ko Izhi riwa wawu nye a he nji ri ya ima ka tre ri, <<Ibla tre wen riwa wu bla wa he kpunji, a wu ri Tsitsri, a wu riwa wu he nga wuran he! 6 Wa bwa yii wa nji Izhi nga riwa wa la tre Izhi ri kusi, ingye nga zizan wu no wa yii no wa so. Wa fe kya riwa wa waa!<< 7 Imba me ka wo raan zhu ri bubu kri bre Izhi ri, <<Bachi Izhi ri gbengbren wawu! Ibla tre wen he kpunji ran tsra!<< 8 Nga ri nza wan ka bwa wama ri zhi, nga ka no nji wa gon wulu ri gbaji nzan wan. 9 Wa gon ri gbaji nzan wan. nga wa kra nde Izhi tu, riwa a he ri gbengbren ritu kyawa wanyi. Ama wa ran kɨma gon ti meme ti mba nga wari gbre nkpen wan ran. 10 Ivren ko Izhi ri ton wan ka bwa wama ri kpanchi meme nɨma rimi nne-a. Ibuu ka ye ri kpanchison meme nɨma, nga nji waka tan nyiri ritu lo 11 nga wa kra Izhi ri shu tu ritu lo nga njon. Ama wa ran kɨma ti nkon meme ti mba ran. 12 Ri tanren wan ka bwa wama ri nchon bane ri Yufiretis iba ne ka klu, ran bu nko ri wa chu wawa wa zhu ri kusi nzan. 13 Imba me ka to meme wu wawa wa zhu sran. Wa ran zhu ri nyu manzɨrama, ri nyu meme nɨma rimi nne, nga ri nyu wa la tre Izhi ri kusi ri che. 14 Wa he wu bɨzhi riwa wa ran ti kyawa wa de sisiri. Iyu tra wa zhu hi ri wa chu gbungblume wawu, wari ngɨzhi wa ye kabru ritu nchon vi ri bla tre riwa Izhi. 15 <<Wo! Me ye ka nji ri yibi! Ingiri ri he wa nji riwa a son ri si ran ya wa tsro wan, bibi riwa a ran zren ri ngbangbɨre ri shan ri jibu nji ran!<< 16 Imba wa wu waka ngɨzhi wa chu wawu ye kabru ri bubu riwa wa yoo ri Hibruniya ri Amagedon. 17 Imba ri tangban wan ka bwa wama ri gungu. Iraan gbangban ka zhu ri kpanchison ri bubu bre Izhi ri, <<A kre-e!<< 18 Inzan ka ran shan wulu, iyira nzan, nga nchon yira meme. Wa ran to bibi yira meme ri bibi wan zari to ran tu riwa wa ti nji; rinyi nye he meme wan rimi mba wawu! 19 Inchon gbu ka ga ti tra, nga waka zii wa chanchon gbu. Izhi ka taka gbu Babila ran no wa so rimi vangho ri nchon fu wan. 20 Kuklu wa bubu ri tsutsu ima wa shan kado nga wa ngblu wawu wa kado ngawen. 21 Chanchon tita wulu wawa iron mba a ke kilo seton, waka zhu ri shu ye ku ri tu nji, a no nji wa to meme ti Izhi ritu meme kya riwa a fe wa, ritu a he meme kya.