1 Nghan hi ri vrenko Izhi ri tra Izhi ri Afisa ri: <<Rinyi nye he ndu riwa a zhu ri wo nji riwa a ngizhi ntsen huwa tamgban ri kuwo ri wan nga riwa a dzren rimi konkron ri dzi wulu ri zinariya tamgban. 2 Me to kya riwa wu ti; Me to bibi yaa riwa wu so rimi ndu nga vu sron riwa wu vu. Me to ri wu ran ri losron wawa wa ti meme ti ran nga wu tsra wawa wa tre ri wa he wa ndu Izhi ama wa ran he ran, nga wu to ri wa he wa che. 3 Wu he ri vu sron, wu so ya ritu won, nga wu ran chu sron wen zho ran. 4 Ama ingye bubu kughiren wen: wu ran nyime wen bibi riwa wu ran nyime wen ri mimilan ran. 5 Taka bibi joku riwa wu joku! Kima gon ti meme ti wen nga wuri ti kyawa wa mimilan. I wu ran ka meme ti wen chuwo ran, me ye ri wu me ri ye ban konkron ri dzi wulu-a ri bubu kri wan. 6 Ama ri nkon riwa wu ti tsra riwa wu kawen ri wa ndu Nikolatawa bibi riwa ame ngawen me kawon ri wa ngawen.

7 << I wu he ri ton, wu ka sren ton wu ri wo kya riwa Iyu tre ri wa tra Izhi!

<<Wawa wa ta ri me no wa gbengbren no wa ri klo konkron riwa ari vri riwa a gbron rimi zhu Izhi.

8 Nghan hi ri vrenko Izhi ri tra Izhi ri Simirina ri:

<<Ingye nga indu riwa a zhu ri riwa wawu nye he mimilan ran he kremkpen, wawu riwa a kuu ran bru tashime. 9 Me to yaa riwa wu he rimi wan; Me to ka he ri kya riwa wu he rimi wan, ama wu he ri wo rimi wu. Me to kpa nde time riwa wawa wa tre ri wawa wa he wa nji Yahuda ama we ran he wawa ran; wa he wa shetan nye. 10 Ran ti sisiri yaa riwa bi so ran. Wo! shetan ri tsra yi ran vu wari mbi sro ri tra tren, nga iyaa mbi ri he ri vi wuru. Ti ndindi ti ri mo ko wari tre ri wa wuu yi, nga me no yi vri ka ife ri ndu ri tari. 11 <<Inji riwa a he ri ton, no wo kya riwa Iyu wa tre ri wa hu Izhi!

Wawa wa ta ri kuu ri hari a ran ri no wa yaa ngaran.

12 Nghan hi ri vrenko Izhi riwa a he ri wa hu Izhi ri gbu Birgamu ri:

<<Ingye nga ndu riwa a ngizhi nji mgban ri nyu hari riwa ari ri bran. 13 Me to bubu riwa wu son, ri bubu wan nye kpanchi meme nji he. Wu ran kawen ri kpanyime ri me ran, nga wu ran kawen ri yosron ri me ran kawu ri vi riwa Antifas riwa a la tre won ri kpunji, riwa wa wuu ri bubu riwa meme nji ri son. 14 Ama ingye nga wa vi meme ti wari wawa me fe wu ri wa: wari rimi mbi wa hu tre Balaam, riwa a tsro Balak bibi riwa a ngizhi wa nji Israila hi no wa ti meme ti, a hu wa ri wulu no wan ri ri riwa wa kadzi ri yibi nga wari kru ngamba. 15 Bibi wan nye me wari rimi mbi wa hu tsro riwa Nikolatawa. 16 Zizan wu ka meme ti wen chuwo! I wu kawen, a ran ban vi ran me ye ri wu me ri ti ku ri wa nji ri njimgban riwa a zhu ri nyu won ye. 17 <<I wu he ri ton, wuka wo kya riwa Iyu tre ri wa tra Izhi!

<<Ri wawa wa ta ri me no wari mba manaa rimi riwa wa ka ri. Nga me ri no ko nga rimi mba tita kinklan riwa wa ngan nde sisa ri tu wan riwa injo ran to ran ara wawa wa kpa tita.

18 <<Nghan hi ri vrenko Izhi ri tra Izhi ri Tiyatira ri:

<< Rinyi he ndu riwa a zhu ri vren Izhi, riwa isi wan ri rinzan ka iwulu, riwa idza wan ri kpan ka krefi riwa wa son ri wulu. 19 Me to kya riwa wu ti. Me to nyime wen, ndindi ti wen, indu wen, nga vu sron wen. Me to ri wu ti kyawa zizan han bibi riwa wu ran ti ri mimilan. 20 Ama ingye nga meme ti riwa me vu ri wu: wu vu sron ri waa riwa wa yo ri Yezebel mba, riwa ari yo ngawan ri nvra ndu Izhi. Itsro wan ri ngizhi wa ndu won he no wa ti meme ti ri kru ngamba, nga ri ri riwa wa ka dzi ri wa zhi wawa wa ran ri vri ran. 21 Me no vi ritu no ka meme ti wan chuwo, ama a ran ri wa ran ka dzren ntran wan chuwo ran. 22 Ngamba me ka wa rega ritu bla riwa wawu nga wawa wa kru ngamba-a wa so yaa bran bran. 23 Me wuu wawa wa hu ngawen, nga wa hu Izhi wawu wa to ri ame nye me to rimiren ko nga nga kya riwa ari wa ti. Me han konga rimi mbi ri bibi kya riwa a ti.

24 << Ama ngbron mbi ri Tiyatira wa kamba ri hu meme tsro-a; wa ran tsro yi kya riwa wa yo ri <Inchon kya riri riwa meme nji.<<Me la yi ri me ran no yi kya riwa a han gbengbren mbi ngaran. 25 Ama tse me ye, bi ngizhi kya riwa bi he ri wu gbengben. 26-28 Ri wawa wa ta ri, wari vu sron hi kre wan wari ti kya riwa me wa, me no wa bibi gbengbren riwa me kpa ri A ti won: Me no wa gbengbren ritu wa gbu, no wa ngizhi kpanchison mba ri kpala ri krefi nga me ri yira wa zhuzhu ka iri ntime. Nga me ri no wa ntsen huwa ri mbre.

29 <<I wu he ri ton wu ka wo kya riwa Iyu la ri wa hu Izhi!