1 Imiri vayi, no kigbu mbi wari no wa ran he wa tsro ran nee, ritu ibla tre mbu wa tsro wau rinchirinchi. 2 Ikya riwa a he rimi wan, wawumbu ki yɨbasi ri nkon wari kigbu. Inde nji ran ri yɨbasi rimi tre wan ran, a he nji riwa a ti tsra, ari kpa kpawan wawu chuwo. 3 Inde ki ban ntan ki son ŋɨma ri nyu ari nyɨme ran ti kya riwa ki yo no ti, ari hi bubu riwa ki wa no hi. 4 Ya nvu ima riwa a he kpankpanfi, ama gungu ri senkpa ri truu nga wato kɨma-u ri vi krefi riwa a he tsawen gyen. 5 Nghamba nye irɨme he, kpunji a he fiwen gyen rimi kpa ama ari kpon ngawan! nga bi ri ya vi klawulu riwa a he krenkyen wen ama ari gon nchon ji riwa a ban kpata. 6 Irɨme ngawen he wulu! wawu nye he vi kya riwa a he fiwen rimi wa gbrekpa mbu, wawu nye ri yo kpa mbu ri ti meme ti, ari kpa kpa wawu time, ari gyuru sron ka ti fu, kuma wawu iko wulu nye ri gyuru wu. 7 Wa nɨma kankankan, wa chenchen, wawa wa gban ri mme, wawa wa he rimi ima nji ri to ngɨzhi wa, ama irɨme han gbengbren nji. 8 Injo ran he riwa ari to ti ri rɨme ran. Irɨme he kya riwa a ran ri son viri ri meme ti ran, a he ka ntson riwa ari wuu nji. 9 Ri rɨme nye ki gbre Bachi mbu nga Timbu, nga wawu nye ki lanyu wawa wa ti wa bibi riwa Izhi he. 10 Rimi nyu-a nye riwa igibreri zhuu nga lanyu. imiri vayi won, no ran he nganyi ran. 11 Iima riwa a ro so nga ima riwa a ti ima wato zhuu ri bubu riri? 12 Imiri vayi, konkron mbwa ri to klo wɨlo ngho? ka konkron riwa ari klo wɨlo ri raro rito klo mbwa? ngamba me, wa ran fe ima riwa a ro ri si ima riwa a ti ima ran.

13 Nghan rimi mbi riwa a wiri ran ri to ti? No tsro-u ri ra rimi dindi son wan, rimi ti ndu wan no katu riwa wiwiri ri ngɨzhi ye yo ri meme. 14 Ama inde bi ti huu nga sutu rimi sron mbi, ran kpo ngambi ri kpunji ran. 15 Ritu bibi <<Wiwiri>>mba ran zhuu shu ye me ran ama a he wiwiri ri meme nye, a ran riwa Yuu Izhi ran, a he riwa meme nji. 16 Bubu riwa iti huu nga sutu he, ri bubu wan wana fe son ri si kpa ran nga wa ran ti meme ti ri ko bibitan ri bubu wan. 17 Ama wiwiri riwa a zhuu ri shu ye mme ri gbuchi wan a he Tsitsri nye, ari ngɨzhi son ri si sron ri nyɨme ye, ari kpanji ri wo hari, ari ka ngawan no nji lo sron ri nji, a he nji ri kpunji tre, nga a ran ri sutu ran. 18 Ari ngɨzhi son ri sikpa ye nga a he nji riwa a chu rimi sikpa wawa wa ngɨzhi sren ritu dindi ti ye.