1 Timóteo 3

Ñubə ndə i chìi wo ɔ kʉ̀ʼnə ndə məbɛ ntəŋbəshʉ mu chɔshi

1 Nɔ bɛ ŋgie-shʉəŋ-kə nɔ ndə bəkɔ wo mɔ̀ʼfyii-i ndəŋ ghɔ mbɔ kaʼ wo séʼ ndə məbɛ ntəŋbəshʉ mu chɔshi təmə ɔ nɔ séʼ yʉʼ fɔ̀ʼ. 2 Nɔ, ntəŋbəshʉ mu chɔshi nɔ kie ndə bɛ wo ndə bə mə yá nukə kətʉ-ɔ bʉəbʉə fɛ bɔŋleʼ bɛ wo ndə ɔ kie mbyu woke imɔʼ. Ɔ nɔ kie ndə məbɛ wo ndə ɔ tʉʼ kwɔ̀ʼtə nukə jyujyu buŋ fɔ̀ʼ bɔŋleʼ kə́ bɛ wo ndə ɔ̃ yá ŋwɔŋ-ɛŋ. Ɔ nɔ kie ndə məbɛ wo ndə b̃ə kɔ́ kuŋhə tʉ ɔŋ, bɛ wo ndə ɔ̃ chʉ́əʼtə tʉ bʉə-mətòʼ bɔŋleʼ bɛ wo ndə bəkɔ ɔ dàhə. 3 Ɔ kie ndə məbɛ mbuuməndʉʼ fɛ təmə kə́ bɛ wo ndə t̃ʉʉ-i byʉ́ʼ ɔ ŋɛ̀nə ntɔŋntɔŋ fɛ. Ɔ bɔŋ kie ndə məbɛ wo búɔnə, kie ndə məbɛ wo mɔ̀ʼ təchyuu fɛ, təmə bɛ woməntɔ kyʉə fɛ. 4 Ɔ nɔ kie ndə məbɛ wo ndə ɔ̃ lɛ́nə njaa-ɛ jyujyu bɔŋleʼ bɛ wo ndə vâa-bi tʉʼ yʉ́ chu-i, kə́ kɔ́ kuŋhə tʉ ɔŋ, 5 bʉʼka kaʼ wo gòʼ təmə kínə mə lɛ́nə njaa-ɛ fɛ, ɔ bu lɛ́nə bʉə mu chɔshi-Nyii ntɛ təka?

6 Ɔ kie ndə məbɛ wo ndə ɔ bíe bɛ́ŋ Nyii bɛ́ŋ fɛ byuunɔ, təmə bəkɔ ɔ kɔ́ ŋaʼtəkə mbʉə-ɔ, b̈ə yi chʉ̀ə ŋkwɛ-ɛ bʉəbʉə nə yi-Debulu-yə. 7 Ndə məbìʼ gɛ̀ nə shʉbə, ɔ nɔ kie ndə məkie yie jyujyu kəghɔ-bʉə mbi bʉʼka ɔ mə yi kie tʉvyiikə, gwù ndə shʉʼ-Debulu-kə.