1 Nɔ nyɔ̀ʼ mbəŋ-ɔŋ, Samu Bita, nyɔ̀ʼ ŋwɔʼnə-ɔ̄ŋ, vaafɔ̀ʼ leʼnə lɔntəŋ Jiso Klai.

Mɔ nɔ tʉʼ nyɔ̀ʼ tʉ bʉə bənchəŋ ndə bə nɔʼ kɔ́ məmɔ̀ʼfyii ndəŋ Nyii tʉ bɔŋ ndə i bɛ ndyʉndyʉ ghɔŋbə yaʼ-yə, tíŋ hə bɔ̌ŋ mə bɛ ndyʉndyʉ Nyii Ŋkwaa-yʉʼʉ ndə bɛ Jiso Klai.

2 Tə Nyii bìʼ bii nə buuŋjyu yɔ́ŋyɔ́ŋ ghɔŋbə fyiighʉ́ənə ndə bii tʉʼ kínə Nyii ghɔŋbə Jiso Tiekətʉ-yʉʼʉ.

3 Nyii, ndə ghʉəʼkə-i nə Nyii, nɔʼ kɔ́ fɔbə tʉ bʉʼʉ inchəŋ ndə bʉʼʉ kie ndə məkie ndə mə-kə́-chí mbi nə bʉə ndə məchimbi-yʉə tʉʼ kɔ́ kuŋhə tʉ ɔŋ. Ɔ nɔ chìi yɔ̄ŋ-yə tíŋ hə bɔ̌ŋ məkínə ɔŋ, ndə ɔ tíi bʉʼʉ tíŋ hə ndəŋ məgʉə-e ghɔŋbə nuʼ jyujyu-i. 4 Tíŋ hə ndəŋ fia-ɔ̄, ɔ nɔʼ kɔ́ fɔŋ kəkɔ tʉ bʉʼʉ ndə i gʉ́ə shʉ-ɔ daa ndə ɔ kə kɔ̀ʼnə mbɔ tíŋ hə ndəŋ mbʉ bəŋkɔʼnə, bəkɔ bii nyʉ́ʉ məbyʉ́ʼ ndə wʉʉnəmbikə nɔʼ byʉ́ʼ bʉʼka bʉ̂ʼʉ ndə bʉəməsʉʉ kʉ̀ʉ, kie ntɛ məchímbi ndə i bɛ ndə yi-Nyii-yə. 5 Bʉʼka yɔ̄ŋ-yə, b̈ii kɔ̀ɔtə shʉ́əshʉ́ə ndə məbìʼ məmɔʼfyiihə-ii ndəŋ Nyii nə nuʼ jyujyu, bìʼ nuʼ jyujyu nə ndaa, 6 bìʼ ndaa nə məyá ŋwɔŋ, bìʼ məyá ŋwɔŋ nə məyá fyii, bìʼ məyá fyii nə məchímbi ndə ntɛ ndə i bu kə́ kɔ́ kuŋhə tʉ Nyii, 7 bìʼ məchímbi ndə ntɛ ndə i bu kə́ kɔ́ kuŋhə tʉ Nyii nə məkʉ̀ʉ ŋwɔŋtə-ii nə bəliŋ leʼ bìʼ məkʉ̀ʉ ŋwɔŋtə-ii nə bəliŋ nə ŋkʉ̂ʉ tʉ bʉə bənchəŋ. 8 Nɔ bɛ nubə nɔ ndə bii kie ndə məkie. Kaʼ bii kie ntɛ-bənu-hə-ɔ̄ŋ kə́ bìʼ kʉ̀ʼ muŋgɔ yɔ́ŋyɔ́ŋ, ndʉʉmɛ, mbʉ bənu ndə bii kínə te Jiso Klai Tiekətʉ-yʉʼʉ bu chìi bii ndə mə-kə́-fɔ̀ʼ bɔŋleʼ kʉ́ʉnə ntɔŋmə. 9 Kaʼ bii gòʼ təmə kie nubə-ɔ̄ŋ fɛ, i dʉ̀ʼ mbɔ shʉ-yii mə nyíɛ nubə dɔdɔ fɛ byuunɔ nɔʼ kɛŋ fʉ̀əŋtə, bɔŋ-nɔʼ-leʼ lèʼnə mbɔ bə nɔʼ kə sʉ̀fyii hə ndəŋ nduɔŋ-bʉ̂ʼʉ-hə-ii.

10 Nɔ ndʉʉmɛ, bəliŋ-bɔŋ, b̈ii kɔ̀ɔtə shʉ́əshʉ́ə ndə mədʉ̀ʼ mbɔ Nyii nɔʼ tíi bii bɔŋ-nɔʼ-leʼ séʼ bii lieʼ shʉəŋ. Kaʼ bii chìi nɔ, bii leʼnə mɛ̀ʼtə fia-Nyii ndə bii tə́nə chɔ fɛ. 11 Ndʉʉmɛ, bə bu kɔ́ ghʉəʼkə tʉ bii gɛ̀ kùu ndə məŋíi mu Sɔ́ʼ-Nyii ndə i kie liʼ-i fɛ, kə́ bɛ sɔ́ʼ ndə bɛ yi-Jiso-Klai-yə, Tiekətʉ-yʉʼʉ ndə ɔ bɛ Ŋkwaa-yʉʼʉ ghɔ.

12 Nɔ, mɔ bu kə́ bìʼ kwɛ́nə nubə-ɔ̄ŋ tʉ bii, buŋ ndə nɔ, bii nɔ kínə mbʉ bənu bɔŋleʼ kə́ tə́nə shʉ́əshʉ́ə ndəŋ mbʉ shʉəŋ ndə bə kə dàhə bii nə yɔŋ. 13 Mɔ nɔ kwɔ̀ʼtə i kʉ̀ʼnə mbɔ m̈ɔ kə́ ŋɛ̀hə ndaahə-i te nubə-ɔ̄ŋ nduɔ ndə mɔ bíe ŋɛnə nɔ. 14 Bʉʼka mɔ nɔ kínə mbɔ kʉʉkə məniʼ nɔ mbɔʼ-mbʉə-ɔ-yɔ̄ŋ káa, haʼ ndə Jiso Klai Tiekətʉ-yʉʼʉ chìi mɔ kínə. 15 Mɔ bu kɔ̀ɔtə nə ghʉəʼkə-ɔŋ nchəŋnchəŋ ndə mənyíɛ mbɔ ndʉʉ ndə mɔ mɛ̀ʼtə wʉʉnəmbikə-ɔ̄ŋ, bii shi kə́ kwɛ́nə nubə-ɔ̄ŋ, ndʉʉ tə mì ndʉʉ.

16 Mɔ nɔ tʉʼ gìe yɔ̄ŋ-yə bʉʼka baʼa kə lʉ̀ bə chəŋ-mənaa-bə ndə bə chìi nə ndaa ndə məlóʼtə bii nə yɔŋ, ndə baʼa kə gwè chìi mbɔ b̈ii kínə ghʉəʼkə ndə Jiso Klai Tiekətʉ-yʉʼʉ kie, leʼnə məgwe-e fɛ. Mbee, baʼa nɔ kə lʉ̀ shʉ-yaʼ nyíɛ məgʉə-e. 17 Baʼa nɔ nə bɛ chɔ nyíɛ ndə Nyii mbʉ Tie kə́ kɔ́ kuŋhə tʉ ɔŋ ghɔŋbə məgʉ́ə, ndʉʉ ndə mbʉ gyʉʉ, ndə i kə gwè hə ndəŋ mbʉ Fɔŋ Məbáa, kə́ ghɔ̀ŋ mbɔ, "Nɔ bɛ mbʉətə vaa-ɔŋ nɔ ndə mɔ kʉ̀ʉ, fyii-ɔ nɔ bʉ̀ʉ ndəŋ ɔŋ." 18 Baʼa nə mbəŋ-yaʼ nɔ kə yʉ́ gyʉʉ-ɔ̄ ndə i kə gwè hə yuo, ndʉʉ ndə baʼa bɔŋ kə bɛ mɔʼɔ kwɔŋ ndə i bɛ ŋkʉʉ.

19 Nɔ, bʉʼka yɔŋ, fyiihə-aʼ nɔ tə́nə ndəŋ mbʉ ntəŋ yɔ́ŋyɔ́ŋ daa ndə bʉəyʉkəŋgieNyii nə lɔ̀ʼ. B̈ii kɔ́ tyunəbə-ii chɔ, bʉʼka i nɔ bɛ nə kɛʼɛ ndə i tʉʼ báa mu yəŋ-kənjəŋ-kə tə mbi nə fíi, ndʉʉ ndə lɔʼ ndʉʉfiimbi bu chʉ́ʉhə məbáa mu fyiihə-ii. 20 Ndə nchəŋnchəŋ-ɛŋ, b̈ii kə́ kwɛ́nə mbɔ ntəŋ kaa ghɔ ndə i gwè hə kəghɔ-Nyii mu ŋwɔʼnə-Nyii ndə i gwè hə ndəŋ ŋkwɔʼtə yʉkəŋgieNyii nə mbəŋ-ɛŋ fɛ. 21 Bʉʼka ŋgiekə kə kaa ghɔ ndə i nə gwè hə kəghɔ-yʉkəŋgieNyii ndə i gwè hə ndəŋ ŋkʉʉnə tʉʉ woməsʉʉ fɛ. Bʉə nɔ nə kə́ téʼ ntəŋ ndə i gwè hə kəghɔ-Nyii ndʉʉ ndə LyʉʉhəNyiikə kə́ té bɔŋ.