1 BʉəyʉkəŋgieNyii nə mbii nɔ kə fyú hə mu mbʉ bʉə-Isilɛ ghɔ haʼ ndə bʉə dàhə kəŋgieNyii nə mbii bu fyú hə mu bii. Bɔ̂ŋ bu kə́ nyáʼtə dàhə nubə ndə i gòʼ təmə kʉ̀ʼnə fɛ, ndə i bu bʉ́əhə bii, bɔŋleʼ kə́ tɛ́ŋ mbʉ Tiefɔʼ ndə ɔ chʉ̀ʼ tʉkə-ʉə. Nɔ bɛ nukə nɔ ndə i bu chìi bɔ̂ŋ kə́ lə̀ŋnə nəndʉʉnəndʉʉ ndə məkwú bɛ́. 2 Bʉə buŋmbi bu gɛ̀ hə bɔ̌ŋ bɔŋ ndə nu-kətʉ-vyíi-nə-bə-ʉə, bʉʼka bɔŋ, bʉə bu kə́ kwə́ʼ bʉəbʉə te mbʉ fia shʉəŋ. 3 Bʉʼka ntɔmə-ʉə, bɔ̂ŋ bu kwò bii nə ŋgie-mənaa-bə ndə i gwè hə ndəŋ ŋkwɔʼtə-yʉə. Nyii nɔʼ kə shʉ̀tə lʉ̀ hə ŋgʉʼŋgʉʼhə mbɔ bɔ̂ŋ bu gwù fɛʼɛ, məkwu-yʉə bɛ́ kə́ bɛ sêfia gwè.

4 B̈ii nyíɛ! Nyii kə jʉhə bʉəntəŋ-bi ndʉʉ ndə bɔ̂ŋ kə chìi bʉ̂ʼʉ fɛ. Ɔ bɔŋ nɔ kə jə̀ŋ bɔŋ kɔ́ mu fɔŋ viʼi, kɔ́ʼtə bɔŋ nə bəchaŋ, mu fɔŋ kənjəŋ kəyəŋ ndə Nyii yá bɔŋ tʉ́ʼ chɔ, kə́ chyìi chî-fɛʼɛ-kə. 5 B̈ii nyíɛ! Nyii nə mɛ̀ʼtə bʉə-mbibəshʉ ndʉʉ ndə ɔ kə tə́ŋ fɔŋ muu kɔ́ ndəŋ wʉʉnəmbi-bʉə-kə ndə məchimbi-yʉə kə gòʼ təmə kə́ kɔ́ kuŋhə tʉ Nyii fɛ. Ɔ bɔ̂ŋ nɔ kə kyʉ̀hə Nua, ndə ɔ kə́ lɔ̀ʼ fia-Nyii ndə i bɛ ndyʉndyʉ, ghɔŋbə bəbɛʼbʉə təkwiitia. 6 B̈ii nyíɛ! Ɔ nɔ kə chʉ̀ə ŋkwɛ bʉə-Sodɔŋ ghɔŋbə Gomola. Ɔ tɔ̀ŋ mbʉ bəyəŋkwɛʼtəŋ i kyʉ́ʉ tə bə̀ŋ ncheʼkyʉʉkə, bʉə bənchəŋ chɔ kwútə. Ɔ nɔ nə chìi yɔ̄ŋ-yə ndə fʉʼkənu ndə i bu fyú tʉ bʉə ndə məchimbi-yʉə gòʼ təmə kə́ kɔ́ kuŋhə tʉ Nyii fɛ. 7 Bɔŋ ɔ nɔ kə chʉʼ tʉ-Lɔt-kə ndə ɔ kə tə́nə ndyʉndyʉ, kə́ bɛ wo ndə fyii-i kə́ chɔ́ŋhə ɔŋ daa bʉʼka nuʼ bəsəŋ bʉə ndə bɔ̂ŋ gòʼ təmə kə́ tʉ́ʼ nuʼ fɛ. 8 Wo-ɔ̄ ndə ɔ kə tə́nə ndyʉndyʉ kə́ chí mu bɔŋ, nɔ kə́ kie mu fyii chʉ́ʼchʉ́ʼ. Yɔ̄ŋ-yə nɔ kə bɛ bʉʼka nu-bʉəbʉə-bə ndə bʉə nə kə́ fɔ̀ʼ ndə bɔ̂ŋ gòʼ təmə kə́ tʉ́ʼ nuʼ fɛ ndə ɔ kə́ nyíɛ bɔŋleʼ yʉ́. 9 Kaʼ nubə-ɔ̄ŋ bɛ nɔ, təmə Tiekətʉ nɔ kínə ndə bəkɔ ɔ chèʼ bʉə ndə məchimbi-yʉə tʉʼ kɔ́ kuŋhə tʉ ɔŋ mu nubə ndə bə tʉʼ mùutə bɔŋ nə yɔŋ, ghɔŋbə ntɛ ndə bəkɔ ɔ yá bʉə ndə bɔ̂ŋ gòʼ təmə tə́nə ndyʉndyʉ fɛ tʉ́ʼ, kə́ chɔ́ŋhə bɔŋ tə chî-kwɛ̀-fɛʼɛ-kə yi gwè. 10 Fɔŋ ɛŋ bu bɛ bʉə ndə bɔ̂ŋ tʉʼ gɛ̀ hə bɔ̌ŋ nu-məntɔ-bə ndə mbʉəhə-ʉə tʉʼ kʉ́ʉ ndə i bu bʉ́əhə bɔŋ, kə́ jɛ́ŋhə ghʉəʼ-Nyii-kə ndə məsɔ́ʼ bɔŋ.

Fyiihə-ʉə nɔ tə́ŋ təmə kə́ gwònə fɛ, bɔ̂ŋ kə́ bʉ́əhə yie bʉəntəŋNyii ndə bɔ̂ŋ kie fɔŋ məgʉ́ə. 11 Buŋ bʉəntəŋNyii ndə bɔ̂ŋ kie ghʉəʼkə bɔŋleʼ shʉ́ə daa tə chàa mbʉ bʉə dàhə kəŋgieNyii nə mbii, kə mɔ̀ʼ nukə kətʉ-bɔŋ nə nchɛŋ bəshʉ Tiekətʉ fɛ. 12 Bɔŋ bʉə-bɔ̄ŋ, nə nyaahə ndə bɔ̂ŋ gòʼ təmə kie ndaa fɛ, kə́ fɔ̀ʼ bə nə mbʉəhə-ʉə tʉʼ gìe tʉ bɔŋ, nə nyaa-muŋkɔ-hə ndə bə bí bɔŋ ndə mə-kə́-ya gwìatə yítə. Bɔ̂ŋ kə́ chɛ̀ŋtə nubə ndə bɔ̂ŋ gòʼ təmə kínə fɛ. Bə bu yá bɔŋ yítə bɔŋ nə nyaa-muŋkɔ-hə. 13 Bə bu lɔ̀ʼ bɔŋ nə ŋgʉəʼ bʉʼka ŋgʉəʼ ndə bɔ̂ŋ tʉʼ gwè nə yɔŋ. Bɔ̂ŋ nɔ kʉ̀ʉ ndə məfɔ̀ʼ nu-bʉ̂ʼʉ-bə ntəŋntəŋ ndʉʉnəchî ndə i tʉʼ kɔ́ tʉʉjyu tʉ bɔŋ. Bɔ̂ŋ nɔ bɛ nə ŋwiabə ghɔŋbə cheʼbə ndə i gwè nə tʉvyiikə. T̃ʉʉ-yʉə nɔ bʉ̀ʉ ndə ndʉʉtəmiyɔŋ ndə bii bɔŋ dùʼ ndəŋ fia-mənaa-tə-ʉə buŋ ndə bii bɔŋ tʉʼ chə̀ŋtə ndəŋ yəŋ-nchəŋtə-bə ndə məyú. 14 Nubɛʼkə kaa ghɔ ndə bɔ̂ŋ tʉʼ kʉ́ʉ fɛ yaʼkɛŋ fia ndə məgháa bəsəŋ ghɔŋbə ntɔmə ndə bɔ̂ŋ kie fyii-bɔŋ ndə məchìi bʉ̂ʼʉ təmə bəkɔ bɔ̂ŋ nə yuo fɛ. B̃ɔ̂ŋ nɔ tʉ́ʉhə bʉə ndə bɔ̂ŋ gòʼ təmə kə́ yá ŋwɔŋ-yʉə fɛ, kɔ́ ndəŋ ŋkʉʼ. Bɔ̂ŋ nɔʼ dàhə fyiihə-ʉə ndə məchìi ntɔmə, ndɔŋ-Nyii nɔ bɛ kətʉ-bɔŋ. 15 Bɔ̂ŋ nɔʼ mɛ̀ʼtə yʉʼ fia ndə i bɛ ndyʉndyʉ, mɔ̀ʼ fia bɛ́, lʉ̀ ntɛ fia ndə Balaŋ vaa-Beo ndə ɔ kə kʉ̀ʉ ndə məkie kyʉə ndə nu-bʉəbʉə-bə ndə ɔ fɔ̀ʼ, 16 bɔŋ Nyii nɔ kə sɔ́ʼ ɔ bʉʼka bʉ̂ʼʉ-e. Buŋ ndə jakashi kyinə kwə́ʼ fɛ, bɔŋ jakashi Balaŋ kwə́ʼ nə gyʉʉ woməsʉʉ tʉ ɔŋ ndə məbyùutə ŋkwɔʼtə kəyɔʼ búu ndə mbʉ yʉkəŋgieNyii kə́ kie, kətʉ-ɔ.

17 Bʉə-bɔ̄ŋ nɔ bɛ nə lʉʉtə ndə i gòʼ təmə kie muu fɛ, kə́ bɛ nə mbɔʼkə ndə fʉʉ-shʉ́əshʉ́ə-kə tʉʼ bɛ̀ʼ tòʼ nə yɔŋ. Nyii nɔʼ shʉ̀tə yəŋkə-ʉə tʉ́ʼ mu fɔŋ kənjəŋ. 18 Bɔ̂ŋ tʉʼ kwɛ̀ŋ fyiihə-ʉə bɔŋleʼ kwʉ̀ʉnə, ŋkwʉʉnə-bənɔ̌ʼɔ-kə, kə́ kwə́ʼ ŋgiebə ndə i tʉʼ lóʼtə bʉə ndə bɔ̂ŋ bíe gwègwè mu Nyii, fyú hə mu bʉə ndə bɔ̂ŋ tʉʼ chìi bʉ̂ʼʉ, ndə məkie ntɔmə ndə məchìi bʉ̂ʼʉ. 19 Bɔ̂ŋ nɔ tʉʼ kɔ̀ʼnə bʉə mbɔ bɔ̂ŋ la bu fyú hə ndəŋ fʉəhə, bɔŋ kə́ bɛ fʉəhə nə mbəŋ-yʉə ndəŋ fia-bʉəbʉə-tə ndə i tʉʼ bʉ́əhə bʉə. Bʉʼka nukə təmiyɔŋ ndə i ghɔʼ ghʉəʼ-wo-kə, ɔ nɔ bɛ fʉə ndə nu-ghɔ̄-kə. 20 Bʉʼka kaʼ bʉə ndə bɔ̂ŋ nɔʼ kə nyʉ́ʉ nu-kəwʉʉnəmbi-bə ndə i bʉ́əhə wo bʉʼka bɔ̂ŋ kə kínə Jiso Klai Tiekətʉ-yʉʼʉ ndə ɔ bɛ Ŋkwaa-yʉʼʉ, bʉ̀nə gɛ̀ lʉ́əŋtə ŋwɔŋ-yʉə nɔ, bʉ̂ʼʉ bìʼ yá bɔŋ kɔ́ʼ, yi kəliʼ nɔ, ntɛhə-ʉə tyíitə chàa ndə i kə fəŋ bɛ bəshʉ. 21 Nɔ kə bʉ̀ʉ təmə bɔ̂ŋ nɔʼ kə fəŋ kínə fia ndə mətə́nə ndyʉndyʉ fɛ, tə chàa mbɔ bɔ̂ŋ kínə, bʉ̀nə shìe liɛŋ hə ndəŋ ŋkahə Nyii ndə i bɛ ŋkʉʉ ndə bə kə kɔ́ tʉ bɔŋ. 22 Nukə ndə chəŋkə-ɔ̄ŋ kə gìe nɔ kə fyú shʉəŋ tʉ bɔŋ mbɔ, "B̃û nɔ bʉ̀nə gɛ̀ ndəŋ məghóʼ-e." Ibɛʼ-yə ghɔ̀ŋ mbɔ, "Ŋkwunyaa ndə bə nɔʼ sʉ̀ ɔ, bʉ̀nə gɛ̀ túɔtə ŋwɔŋ-ɛŋ mu bəchia."