2 Tessalonicenses 3

Bii gháaNyii tʉ baʼa

1 Ndə məlìʼtə, bəliŋ-baʼa, b̈ii gháaNyii tʉ baʼa mbɔ ŋ̈gie-Tiekətʉ-kə bìʼ wɔ̀ʼnə gɛ̀ nə shʉbə, b̈ʉə bɔŋleʼ kɔ́ kuŋhə chɔ haʼ ndə i kə bɛ mu bii. 2 Bɔŋleʼ mbɔ N̈yii kwáa baʼa mu kəghɔ-bʉə buuŋbʉə leʼnə bʉə-bʉ̂ʼʉ, Bʉʼka kaa bʉə bənchəŋ ndə bɔ̂ŋ mɔ̀ʼfyiihə-ʉə ndəŋ mbʉ ntəŋjyujyu fɛ. 3 Tiekətʉ bɔŋ kə́ bɛ wo gìe shʉəŋ, ɔ bu kɔ́ ghʉəʼkə tʉ bii, kyʉ̀hə bii hə kəghɔ mbʉ Wo Bʉəbʉə ndə bɛ Sata. 4 Baʼa nɔ tʉʼ kie fyii ndəŋ Tiekətʉ bʉʼka bii, mbɔ bii nɔ tʉʼ fɔ̀ʼ, bɔŋ bu kə́ fɔ̀ʼ, nubə ndə baʼa kə kàhə bii chɔ. 5 T̈iekətʉ dʉ̀ʼ fia tʉ bii ndə məkie ŋkʉ̂ʉ-Nyii ghɔŋbə məlyʉ̀ʉtə́nə ndə i gwè hə kəghɔ-Klai.

Bii nɔ kie ndə məfɔ̀ʼ

6 Nduɔ, baʼa nɔ tʉʼ kàhə bii, bəliŋ-baʼa, yie-Tiekətʉ-yʉʼʉ Jiso Klai, mbɔ b̈ii byʉ̀hə ŋwɔŋ-yii mbʉə wo-Nyii təmiyɔŋ ndə ɔ gòʼ təmə kʉ̀ʉ ndə məfɔ̀ʼ fɔʼɔ fɛ, bʉə ndə bɔ̂ŋ gòʼ təmə tə́nə ndəŋ nuʼ ndə bii kə fí kəghɔ-baʼa fɛ. 7 Bʉʼka bii nə mbəŋtə-ii nɔ kínə ntɛ ndə bii kie ndə məlʉ̀ kəghɔ-baʼa, bʉʼka baʼa nə kə́ dùʼdùʼ ndʉʉ ndə bʉʼʉ kə bɛ mɔʼɔ fɛ. 8 Baʼa nə kə́ yú fɔ-wo-kə təmiyɔŋ təmə lɔ̀ʼ fɛ bɔŋ baʼa kə́ fɔ̀ʼ bɔŋleʼ nyíɛ ŋgʉəʼ ndʉʉnəchî ghɔŋbə ndʉʉbətyuʼ mbɔ baʼa mə yi bɛ bɛʼkə tʉ wo mu bii təmiyɔŋ fɛ. 9 Baʼa nə kə́ fɔ̀ʼ yɔ̄ŋ-yə bʉʼka mbɔ baʼa kə byúu ghʉəʼkə ndə məbíʼtə fɔkə kəghɔ-bii fɛ, bɔŋ baʼa nɔ kə́ chìi mbɔ b̈aʼa dʉ̀ʼ fia tʉ bii ndə məlʉ̀ hə kəwu-baʼa, 10 bʉʼka ndʉʉ ndə bʉʼʉ kə bɛ mɔʼɔ, baʼa nɔ kə kàhə bii mbɔ, "Kaʼ wo gòʼ təmə kə́ fɔ̀ʼ fɛ, kə ɔ mə yú fɔkə fɛ."

11 Bʉʼka baʼa nɔ yʉ́ mbɔ bʉəbɛʼbə mu bii la tʉʼ dùʼdùʼ təmə kə́ fɔ̀ʼ fɔʼɔ fɛ, kə́ kɔ́ bə haʼ chutə-ʉə ndə nu-bəbɛʼbʉə-bə. 12 Yie Jiso Klai Tiekətʉ, baʼa nɔ tʉʼ kàhə ntɛ bʉə-maa-bɔ̄ŋ bɔŋleʼ kə́ fʉ̀ʉtə bɔŋ mbɔ b̈ɔ̂ŋ líitə mbɔ loʼo kə́ fɔ̀ʼ yʉə-yə fɔʼtə ndə məkwáa ŋwɔŋtə-ʉə. 13 Bɔŋ ndə bii, bəliŋ-baʼa, kə bii məkáa ndə məfɔ̀ʼ fɔʼ-jyujyu-tə fɛ.

14 Kaʼ wo gòʼ təmə yʉ́ nukə ndə baʼa nyɔ̀ʼ mu ŋwɔʼnə-fɛ̄ŋ fɛ, b̈ii chèʼ wo-ghɔ̄, kə bii bɔŋ məfúu nuɔ ndə nubɛʼkə təmiyɔŋ fɛ, mbɔ tʉkə-i chʉʼ vyíi. 15 Kə bii mə bɔŋ lʉ̀ ɔ ndə wobàa fɛ, b̈ii shyùu tyunəkə-i ndə liŋ-yii.

Ndyiʼtə-nchaʼtə-Bɔɔ-kə

16 Nduɔ, T̈iekətʉ ndə fyiighʉ́ənə bɛ yi-yə kɔ́ bii nə fyiighʉ́ənə təvɛʼtəvɛʼ ndə fiatə inchəŋ. T̈iekətʉ bɛ bii bɔŋ mɔʼɔ bənchəŋ.

17 Mbəŋ-ɔŋ Bɔɔ nɔ tʉʼ nyɔ̀ʼ nchaʼtə-ɔ̄ŋ nə yɔŋ-yə ghɔkə. Nɔ bɛ ntɛ nɔ ndə m̃ɔ jìe ghɔkə-ɔŋ ndəŋ ŋwɔʼnə təmiyɔŋ, kə́ bɛ ntɛ nɔ ndə m̃ɔ nyɔ̀ʼ.

18 Tə Jiso Klai Tiekətʉ-yʉʼʉ dʉ̀ʼ buuŋjyu-i tʉ bii bənchəŋ.