1 Bətiefɔʼɔ, b̈ii mɔ̀ʼ mbi mbʉʼmbʉʼ tʉ fʉəhə-i bɔŋleʼ lʉ̀ bɔŋ ndyʉndyʉ, kə́ kínə mbɔ bii nɔ kie Tiefɔʼ ghɔ ndə ɔ bɛ yuo.

2 B̈ii lyʉ̀ʉtə́nə ndə məgháaNyii, tʉ́ʼ ndaahə-ii haʼ chɔ kə́ kɔ́ ndɔ tʉ Nyii. 3 B̈ii kə́ gháaNyii tʉ baʼa ghɔ mbɔ N̈yii ŋɔ́ʼhə fia ndə məlɔ̀ʼ ntəŋ te Klai ndə i kə fəŋ líi hə kəghɔ-woməsʉʉ, ndə bə fʉ̀əŋ mɔ chaŋ bʉʼka yɔŋ, 4 mbɔ mɔ chʉʼ kwə́ʼ ï bɛ itʉ́ʉnə, kə́ bɛ ntɛ ndə mɔ kie ndə mə-kə́-kwə́ʼ.

5 B̈ii dùʼ biibə bʉə-kəwʉʉnəmbi nə ndaa, kaʼ bii kie saa b̈ii fɔ̀ʼ yɔ̄ŋ-yə jyujyu. 6 Ŋgie-chu-kə-i nɔ kie ndə mə-kə́-dʉ̀ʼ buuŋjyu bɔŋleʼ kə́ sʉ́ʼnə nə chʉəʼ, bii chʉʼ kínə ntɛ ndə bii kie ndə məbə̀ŋhə ŋgiekə tʉ wotəmiyɔŋ.

7 Taikiku bu shyíi bii nə nubə inchəŋ te mɔ. Ɔ nɔ bɛ liŋ-yaʼ mu njaa-Nyii ndə baʼa kʉ̀ʉ ɔ daa, kə́ bɛ wo gìe shʉəŋ bɔŋleʼ kə́ bɛ vaafɔ̀ʼ-Tiekətʉ ndə baʼa bɔŋ bɛ mɔʼɔ. 8 Mɔ nɔʼ tə́ŋ ɔŋ tʉ bii bʉʼka luu-ɔ̄ mbɔ bii chʉʼ kínə ndə baʼa bɛ, ɔ̈ bɔŋleʼ kwèʼhə bii. 9 Ɔ nɔ tʉʼ gwè ghɔŋ Onisimu ndə ɔ bɛ wo gìe shʉəŋ ndə baʼa bɔŋ bɛ mɔʼɔ, baʼa kʉ̀ʉ ɔ, ɔ bɔŋleʼ kə́ bɛ mbyu wo lɔʼɔ-yii. Bɔ̂ŋ bu shyíi bii nə nubə inchəŋ ndə i nɔʼ tíŋ hə fɛ̄ŋ.

10 Alistaku wo ndə baʼa ɔ bɛ mɔʼɔ mu njaa-chaŋ nɔ tə́ŋ nchaʼtə-yii, leʼnə Mak ndə ghɔŋ Banaba bɛ vâa nə vâa. Bə nɔʼ mɔ̀ʼ tʉ̂ʼ tʉ bii mbɔ kaʼ Mak gwè tʉ bii, b̈ii fí ɔ nə tʉʉjyu. 11 Jiso ndə bə tíi ɔ nə Jusutu nɔ tə́ŋ nchaʼtə ghɔ. Nɔ bɛ haʼ bɔ̂ŋ bɛ bʉə-Juu mu bʉə ndə baʼa bɔŋ tʉʼ fɔ̀ʼ mɔʼɔ ndə məlɔ̀ʼ Sɔ́ʼ-Nyii, bɔ̂ŋ bɔŋ-nɔʼ-leʼ kwáa mɔ daa.

12 Ebafla, ndə bɛ mbyu wo lɔʼɔ-yii bɔŋleʼ kə́ bɛ vaafɔ̀ʼ Klai Jiso nɔ tə́ŋ nchaʼtə tʉ bii. Ɔ nɔ tʉʼ gháaNyii yie-bii shʉ́əshʉ́ə təvɛʼtəvɛʼ, mbɔ b̈ii tə́nə shʉ́əshʉ́ə nə bʉə ndə bɔ̂ŋ nɔʼ tə́ŋ bɔŋleʼ kínə nu-Nyii-bə jyujyu, kə́ yʉ́ chu-i inchəŋ ndə nubə ndə ɔ kʉ̀ʉ. 13 Bəkɔ mɔ nú gwù-i ndə ntɛ ndə ɔ nɔʼ fɔ̀ʼ tʉ bii shʉ́əshʉ́ə leʼnə bʉə-Laodesia leʼnə bʉə-Hilaboli.

14 Luk ndə ɔ bɛ dota-yaʼ ndə baʼa kʉ̀ʉ ɔ ghɔŋ Dɛma nɔ tə́ŋ nchaʼtə-yʉə. 15 B̈ii tə́ŋ nchaʼtə-ɔŋ tʉ bʉə-Nyii mu Laodesia leʼnə Nimfa ghɔŋbə chɔshi ndə i bɛ mu njaa-ɔ.

16 Ndʉʉ ndə bə nɔʼ lìʼ ndə mətíi ŋwɔʼnə-ɔ̄ŋ tʉ bii, kə bii mə mɛ̀ʼtə təmə tíi ghɔ mu chɔshi-bʉə-Laodesia fɛ. B̈ii bɔŋleʼ tíi ŋwɔʼnə ghɔ ndə bʉə-chɔshi Laodesia bu tə́ŋ tʉ bii. 17 B̈ii shyíi Akibu mbɔ, "Kɔ̀ɔtə ndə mənyíɛ mbɔ a mìʼtə fɔ̀ʼ ndə a kie kəghɔ-Tiekətʉ."

18 Mbəŋ-ɔŋ Bɔɔ nɔ nyɔ̀ʼ nchaʼtə-ɔ̄ŋ nə yɔŋ-yə ghɔkə.

B̈ii kə́ kwɛ́nə bəchaŋ ndə bə fʉ̀əŋ mɔ nə yɔŋ.

Mɔ nɔ tʉʼ gháaNyii mbɔ ɔ̈ dʉ̀ʼ buuŋjyu-i tʉ bii.