1 Bəliŋ-bɔŋ, gwia-ɔ ghɔŋ məghaaNyii-ɔŋ tʉ bʉə-Isilɛ nɔ bɛ mbɔ N̈yii kwáa bɔŋ. 2 Bəkɔ mɔ nú gwù yie-bɔŋ mbɔ bɔ̂ŋ nɔ kə kɔ́ ŋwɔŋ-yʉə shʉ́əshʉ́ə ndə fɔʼɔ-Nyii təmə bɔŋ kie ŋkɛŋ ndaa fɛ. 3 Bʉʼka bɔ̂ŋ kínə ntɛ ndə Ñyii chìi bʉə bɔ̂ŋ bɛ ndyʉndyʉ tʉ ɔŋ fɛ, kə́ kɔ̀ɔtə ndə məbɛ ndyʉndyʉ ndə yʉə-yə ntɛ fia, bʉʼka yɔ̄ŋ-yə, təmə bɔŋ leʼ ké ŋwɔŋ-yʉə tʉ Nyii ndə məchìi bɔŋ, bɔ̂ŋ bɛ ndyʉndyʉ ndə yi-yə ntɛ fia fɛ. 4 Klai nɔʼ lìʼ mbʉ nuʼ-Nyii mbɔ wotəmiyɔŋ ndə ɔ bɛ́ŋ ɔŋ bu bɛ ndyʉndyʉ tʉ Nyii.

5 Bʉʼka Mushi nɔ kə nyɔ̀ʼ te məbɛ ndyʉndyʉ ndə ĩ gwè hə ndəŋ nuʼ-Nyii, mbɔ wo ndə ɔ tʉ́ʼ nuʼ-Nyii ndə məchímbi, nɔ kie ndə mətʉ́ʼ inchəŋ. 6 Bɔŋ nukə ndə ŋwɔʼnə-Nyii ghɔ̀ŋ te məbɛ ndyʉndyʉ ndə ĩ gwè hə ndəŋ məmɔ̀ʼfyii nɔ bɛ mbɔ, "Kə a mə ghɔ̀ŋ mu fyii-a mbɔ, ‘Bu kóʼ nda gɛ̀ yuo?’ fɛ," (ndə məshíʼhə Klai gwè nə nɔŋ) 7 "byuunɔ, ‘Bu shíʼ nda gɛ̀ mu bəŋkwusê?’ fɛ," (bʉ̀nə kóʼhə Klai hə ndəŋ kwú). 8 Nukə ndə i gìe nɔ bɛ mbɔ, "Mbʉ kəŋgie nɔ kə́ŋhə mbʉə a, kə́ bɛ mu chu-a, kə́ bɛ mu fyii-a," mbʉ kəŋgie ndə bə mɔ̀ʼfyii chɔ ndə baʼa tʉʼ lɔ̀ʼ. 9 Bʉʼka mbɔ kaʼ a gìe ŋgwʉʉnə nə chu-a mbɔ Jiso nɔ bɛ Tiekətʉ bɔŋleʼ bɛ́ŋ hə mu fyii-a mbɔ Nyii nɔ kə bʉ̀nə kóʼhə ɔŋ ndʉʉ ndə ɔ kə kwú, a bu kie ŋkwaaNyii. 10 Bʉʼka w̃o nɔ bɛ́ŋ nə mu fyii-i, i chìi ɔ bɛ ndyʉndyʉ tʉ Nyii, bɔŋleʼ gìe nə chu-i mbɔ Jiso Klai bɛ Tiekətʉ nɔ, i chìi ɔ kie ŋkwaaNyii. 11 Bʉʼka ŋwɔʼnə-Nyii nɔ ghɔ̀ŋ mbɔ, "Wotəmiyɔŋ ndə ɔ bɛ́ŋ ɔŋ, bə kʉʉnə mɔ̀ʼ tʉvyiikə-i fɛ." 12 Bʉʼka ŋkʉʉŋkʉʉ kaa ghɔ ndə bʉə-Juu ghɔŋbə bʉə ndə bɔ̂ŋ gòʼ təmə bɛ bʉə-Juu fɛ. Mbyu Tiekətʉ imɔʼ nɔ bɛ Tiekətʉ bʉə bənchəŋ, ndə ɔ tʉʼ kɔ́ yɔ́ŋyɔ́ŋ tʉ bʉə bənchəŋ ndə bɔ̂ŋ bíʼtə tʉ ɔŋ, təmə kə́ túhə shʉ fɛ. 13 Ndə ŋwɔʼnə-Nyii ghɔ̀ŋ mbɔ, "Wotəmiyɔŋ ndə ɔ tʉʼ tíi Tiekətʉ mbɔ ɔ̈ kwáa ɔ, bu kie ŋkwaaNyii."

14 Bɔŋ bəkɔ bɔ̂ŋ tíi ɔ mbɔ ɔ kwáa bɔŋ təka, təmə bɔ̂ŋ nɔʼ bɛ́ŋ ɔŋ fɛ? Bəkɔ bɔ̂ŋ bɛ́ŋ ɔŋ təka, təmə nɔʼ yʉ́ ntɛ wo ndə ɔ bɛ yɔŋ fɛ? Bɔ̂ŋ bɔŋ bu yʉ́ ntɛ wo ndə ɔ bɛ yɔŋ təka, təmə wo lɔ̀ʼ tʉ bɔŋ fɛ? 15 Bɔ̂ŋ bu gɛ̀ lɔ̀ʼ təka, təmə bə tə́ŋ bɔŋ fɛ? Haʼ ndə bə nyɔ̀ʼ mu ŋwɔʼnə-Nyii mbɔ, "I bʉ̀ʉ təka ndə mənyíɛ bʉə ndə bɔ̂ŋ tʉʼ gwè nə ntəŋjyujyu loo!"

16 Təmə bʉə bənchəŋ bɔŋ nɔʼ bɛ́ŋ mbʉ ntəŋjyujyu fɛ, bʉʼka Adaya nɔ nyɔ̀ʼ mu ŋwɔʼnə-i mbɔ, "Tiekətʉ, bɛ nda ndə ɔ nɔʼ bɛ́ŋ nukə ndə ɔ nɔʼ yʉ́ hə kəghɔ-baʼa?" 17 M̃əmɔ̀ʼfyii ndəŋ Nyii nɔ gwè hə ndə məyʉ́ ntəŋjyujyu, məyʉ́ kə́ gwè hə ndə məlɔ̀ʼ ŋgie-Klai-kə.

18 Mɔ bɔŋ bíʼtə mbɔ: bɔ̂ŋ chʉʼ kə yʉ́ leʼ shʉəŋ fɛ mɛ? Ndə ŋgie-shʉəŋ-kə, bɔ̂ŋ nɔʼ kə yʉ́, bʉʼka ŋwɔʼnə-Nyii nɔ ghɔ̀ŋ mbɔ:

"Gyʉʉhə-ʉə nɔʼ wɔ̀ʼnə mu kəwʉʉnəmbi inchəŋ,

ŋgiebə-ʉə gɛ̀ tə dàa liʼ mbi."*

19 Mɔ bɔŋ bíʼtə mbɔ bʉə-Isilɛ kə kɛŋ kínə fɛ mɛ? Mushi nə mbəŋ-ɛŋ, kə́ kwə́ʼ kəyəŋ-Nyii nɔ bɛ fəŋ wo ndə məbə̀ŋhə mbɔ,

"Mɔ bu chìi bii túunə bəfyuʼ bʉʼka bʉə ndə bɔ̂ŋ kaa tə̂ŋkə fɛ,

mɔ bu chìi tʉʉ-yii byʉ́ʼ bʉʼka lɔʼɔ kətə̂ŋ ndə bɔ̂ŋ gòʼ təmə kínə nubɛʼkə fɛ."*

20 Adaya nɔ kə kwə́ʼ nə fyii tə̀ŋnə mbɔ,

"Bʉə ndə bɔ̂ŋ gòʼ təmə kə́ kʉ́ʉ mɔ fɛ, nɔʼ nyíɛ mɔ,

mɔ nɔʼ dʉ̀ʼ ŋwɔŋ-ɔŋ tʉ bʉə ndə bɔ̂ŋ gòʼ təmə kə́ bíʼtə mɔ fɛ."*

21 Bɔŋ te bʉə-Isilɛ ɔ ghɔ̀ŋ mbɔ,

"Mɔ nɔʼ tʉ́ʼ chusii ighʉ́ʉnə bəchibəchi tʉ bʉə ndə bɔ̂ŋ tʉʼ chɔ́ʼ chu-ɔ bɔŋleʼ kwɛ̀ŋhə tʉ mɔ."*