Luŋ 11

Tʉ-vyiiNyii-kə tʉ bʉə-Isilɛ

1 Ndʉʉmɛ, mɔ bíʼtə mbɔ Nyii nɔ̂ʼ tɛ́ŋ bʉə-bii mɛ? I mə nə bɛ nɔ fɛ! Bʉʼka mbəŋ-ɔŋ nə mbəŋ-ɔŋ nɔ bɛ wo-Isilɛ, wo kəlɔŋ Ablahaŋ, lɔ̀ hə kəlɔŋ-Bɛŋnjamɛ.

2 Nyii chʉʼ tɛ́ŋ bʉə-bi ndə ɔ kə séʼ bɔŋ lʉ̀ hə ndəŋ ŋgwunə-mbi fɛ. Bii kínə nukə ndə ŋwɔʼnə-Nyii nə gìe te yɔ̄ŋ-yə fe? Mbɔ Ɛlaja nɔ kə kə́ gháaNyii mbɔ ɔ̈ kɔ́ ŋgʉəʼ tʉ bʉə-Isilɛ, ghɔ̀ŋ mbɔ, 3 "Tiekətʉ, bɔ̂ŋ nɔʼ yítə bʉəyʉkəŋgie-ba nɔʼ mʉ̀ʼ yəŋ-fɛ̀ʼndɛŋ-Nyii-bə-a kɔ́ sê, káa haʼ mɔ nduɔ tətɛʼ mɔ, bɔ̂ŋ bɔŋ-kə́-leʼ kʉ̀ʉ ŋkwiitʉ-ɔ."

4 Nyii kə ghɔ̀ŋ mbuka tʉ ɔŋ? Ɔ nɔ kə ghɔ̀ŋ mbɔ, "Mɔ nɔʼ tʉ́ʼ ŋkɔŋ-bʉə-hə təkwiitia, bɔ̂ŋ tə́nə tʉ mɔ, təmə nɔʼ nə bʉ́ʉnə tʉ Baa*11:4 "Baa" nɔ nə bɛ nyii kɔŋnə ndə bʉə-Kana nə kə́ lə̀ʼtə ɔŋ. fɛ."

5 Nɔ bɛ haʼ nɔ ndə yɔ̄ŋ-yə vɛʼ, mbyu-bʉə-hə nɔ bíe mu bʉə ndə Nyii nɔʼ nə séʼ bɔŋ bʉʼka buuŋjyu-i. 6 Bɔŋ kaʼ bɛ bʉʼka buuŋjyu, təmə i leʼ bɛ bʉʼka fɔʼɔ fɛ, kaʼ byuunɔ, buuŋjyu leʼ bɛ buuŋjyu fɛ.

7 Bɛ ka ndʉʉmɛ? Bʉə-Isilɛ kə kia nyíɛ fɔkə ndə bɔ̂ŋ tʉʼ kʉ́ʉ shʉ́əshʉ́ə fɛ. Nɔ kia kə nyíɛ haʼ mbyu-bʉə-hə məniʼ ndə Nyii kə séʼ bɔŋ. Bəʼkə shʉ́əhə fyiihə-ʉə ndə məyʉ́ tíi Nyii. 8 Haʼ ndə bə nyɔ̀ʼ mu ŋwɔʼnə-Nyii mbɔ,

"Nyii nɔ kə tɛ̀ɛŋ ndaahə-ʉə.

Təmə shʉtə-ʉə mə leʼ nyíɛ fɛ, təmə tyunəbə-ʉə mə leʼ yʉ́ fɛ, tə gwè dàa laa-ɔ̄ nɔ."*11:8 Məbìʼ Kɔ́ Nuʼ 29:4; Adaya 29:10.

9 Dɛbi nɔ kə nyɔ̀ʼ te nubə-ɔ̄ŋ ndə ɔ nə ghɔ̀ŋ mbɔ,

"Tə bənchəŋtə-bʉə nə bɛ shʉʼkə ndə i bu yá bɔŋ,

tə bɔ̂ŋ gwù, bə tyú bʉ̂ʼtə-ʉə nə bʉ̂ʼʉ

10 Tə njəŋkə gwù shʉ-bɔŋ, təmə bɔ̂ŋ mə nə nyíɛ yəŋkə fɛ,

tə bɛʼkə kóʼ liɛŋ-bɔŋ, i gə́ŋnə vɛʼ mɔʼɔ."*11:10 Ŋwɔʼnə təLyuu 69:22-23.

11 Ndʉʉmɛ, mɔ bíʼtə mbɔ bʉə-Juu kə wɔ̀tə mbɔ bɔ̂ŋ chʉʼ gwù təmə leʼnə lɔ̀ fɛ mɛ? I mə nə bɛ nɔ fɛ! Nɔ tíŋ hə bɔ̌ŋ mɔ̀ʼmbɛ-yʉə ndə bʉə, ndə bɔ̂ŋ gòʼ təmə bɛ bʉə-Juu fɛ, kie ŋkwaaNyii, mbɔ i chʉʼ chìi bʉə-Isilɛ, bɔ̂ŋ túunə bəfyuʼ. 12 Nduɔ, kaʼ mɔ̀ʼmbɛ-yʉə gwè nə fʉʼkə tʉ wʉʉnəmbikə, məgwu-yʉə kə gwè nə fʉʼkə tʉ bʉə ndə bɔ̂ŋ gòʼ təmə bɛ bʉə-Juu fɛ, mbʉ kəfʉʼ bu yɔ́ŋ təka ndʉʉ ndə mbʉ ntyʉʉ bʉə-Juu ndə Nyii nɔʼ kə séʼ bɔŋ bu bɛ́ŋ ɔŋ?

13 Mɔ nɔ tʉʼ kwə́ʼ tʉ bii bʉə ndə bii gòʼ təmə bɛ bʉə-Juu fɛ. Ntyʉʉ ndə mɔ bu gòʼ ndə məbɛ lɔntəŋNyii tʉ bʉə ndə bɔ̂ŋ gòʼ təmə bɛ bʉə-Juu fɛ, mɔ bu kóʼhə kwii-ɔ ghɔʼ ndə fɔʼɔ-ɔ, 14 kə mbɔ mɔ chʉʼ chìi yɔŋ-yə bʉə, bʉə-Juu, kie bəfyuʼ te bii, mbɔ bʉʼka mɔ, Nyii bu kwáa bəbɛʼbə mu bɔŋ. 15 Bɔŋ kaʼ ndʉʉ ndə bə kə tɛ́ŋ bɔŋ i bɛ məlìʼ ntuu Nyii ghɔŋbə wʉʉnəmbikə, məbɛ́ŋ bɔŋ bu bɛ mbuka? I bu bɛ məchímbi tʉ bʉə ndə bɔ̂ŋ nɔʼ kwútə fe? 16 Kaʼ bə kɔ́ mbəʼ-bele-kə tʉ Nyii, i nɔ dʉ̀ʼ mbɔ mbʉ bele nchəŋnchəŋ nɔ bɛ yi-yə, bə bɔŋ kɔ́ ghûu-kətyʉ tʉ Nyii i dʉ̀ʼ mbɔ mbʉ kətyʉ nchəŋnchəŋ nɔ bɛ yi-yə.

17 Bɔŋ kaʼ bə bə́ʼtə ntɔŋtə ndəŋ tyʉ-oli-kə ndə bə bèbè fyúhə, gɛ̀ bə́ʼtə mbəŋ-yii ndə bii bɛ ntɔŋ-bətyʉ-oli-mu-ŋkɔ-tə, gwè bíahə bii ndəŋ yi-bè-yə kɔ́ʼ, i kə́ kie muu hə ndəŋ mbʉ kətyʉ. 18 Nɔ, kə bii mə kə́ kwɛ̀ŋ-fyii-hə-ii te mbʉ təntɔŋ ndə bə kə bə́ʼtə fyúhə le fɛ. Kaʼ bii kə́ kwɛ̀ŋ-fyii-hə-ii, b̈ii kə́ kwɛ́nə mbɔ, kaa mbəŋ-yii ndə bii tʉʼ yúʼ mbʉ təghûu fɛ, nɔ tʉʼ yúʼ ghûutə yúʼ bii.

19 Ndʉʉmɛ, a bu ghɔ̀ŋ mbɔ, "Bə nɔ kə́ bə́ʼtə ntɔŋtə mbɔ bə chʉʼ bíahə mɔ chɔ kɔ́ʼ." 20 Nɔ bɛ shʉəŋ, bə kə bə́ʼtə bɔŋ fyúhə, bʉʼka bɔ̂ŋ kə bɛ́ŋ Nyii fɛ, bii bɔŋ tə́nə shʉ́əshʉ́ə bʉʼka bii mɔ̀ʼfyiihə-ii ndəŋ Nyii. Nɔ, kə bii mə kə́ dʉ̀ʼ ŋwɔŋ-yii fɛ, b̈ii láa. 21 Bʉʼka kaʼ Nyii kə gòʼ təmə mɛ̀ʼtə bʉə-Juu ndə bɔ̂ŋ nə ŋkɛŋ təntɔŋ-bətyʉ fɛ, ɔ mə mɛ̀ʼtə bii ghɔ fɛ.

22 B̈ii nyíɛ ntɛ ndə Nyii dʉ̀ʼ nuʼ jyujyu, təmə bɔŋ kyinə bètə shʉ-i ndəŋ bʉ̂ʼʉ fɛ. Ɔ kyinə bètə shʉ-i tʉ bʉə ndə bɔ̂ŋ tʉʼ kwɛ̀ŋhə tʉ ɔŋ fɛ, bɔŋ kə́ dʉ̀ʼ nuʼ jyujyu tʉ bii kaʼ bii lyʉ̀ʉtə́nə mu nuʼ jyujyu-i. Byuunɔ, təmə ɔ bu chʉ̀ə bii mɛ̀ʼ ghɔ. 23 Buŋ bʉə-Juu, kaʼ bɔ̂ŋ shìe liɛŋtə-ʉə ndə mətɛ́ŋ Nyii, Nyii bʉ̀nə lʉ̀ bɔŋ bíahə ndəŋ mbʉ kətyʉ, bʉʼka ɔ nɔ kie ghʉəʼkə ndə məbʉ̀nə bíahə bɔŋ chɔ.

24 Bʉʼka mbɔ kaʼ Nyii kə lʉ̀ bii ndə bii kə bɛ ntɔŋ-bətyʉ-oli-mu-ŋkɔ-tə, gwè bíahə ndəŋ tyʉ-oli-kə ndə bə bèbè, nukə ndə i kyinə bɛ nɔ fɛ, i mə chàa ɔ ndə məbʉ̀nə lʉ̀ ntɔŋ kətyʉ ndə i fɔ̀ʼnə ndəŋ tyʉkə ndə bə bèbè, bʉ̀nə bíahə chɔ fɛ.

Tʉ-vyiiNyii-kə nɔ tʉ wotəmiyɔŋ

25 Mɔ nɔ tʉʼ kʉ́ʉ mbɔ b̈ii kínə ŋguu-ɔ̄, bəliŋ-bɔŋ, bʉʼka bii mə-kə́-ŋàʼtə te ŋwɔŋ-yii. Bəbɛʼbʉə Isilɛ nɔ kie fyii-shʉ́əshʉ́ə-hə. Yɔ̄ŋ-yə bɔŋ bu bɛ haʼ ndə kʉʉ-mbi-kə tʉ bʉə ndə bɔ̂ŋ gòʼ təmə bɛ bʉə-Isilɛ fɛ, yi gwè tʉ Klai tə ntyʉʉ-yʉə kʉ̀ʼnə. 26 Nɔ, bʉə-Isilɛ bənchəŋ yi kie ŋkwaaNyii haʼ ndə bə nyɔ̀ʼ mu ŋwɔʼnə-Nyii mbɔ,

"Wo ndə ɔ tʉʼ gwè nə ŋkwaaNyii bu gwè hə Sayɔŋ,

ɔ bu kíahə fyii-bʉə-Isilɛ-hə ndə nubə ndə i gòʼ təmə kie faa-Nyii-kə fɛ, nchəŋnchəŋ.

27 Nɔ bɛ ŋkaamə nɔ ndə mɔ bu gwía baʼa bɔŋ,

ndʉʉ ndə mɔ bu sʉ̀fyii-ɔ ndəŋ bʉ̂ʼtə-ʉə."*11:27 Adaya 59:20-21; 27:9.

28 Bʉʼka bɔ̂ŋ tɛ́ŋ ntəŋjyujyu, bɔ̂ŋ nɔ bɛ bʉə-bàa-Nyii ndə bɛ sii tʉ bii, bʉə ndə bii gòʼ təmə bɛ bʉə-Juu fɛ. Bɔŋ bʉʼka Nyii kə séʼ bətietie-bʉə, bɔ̂ŋ nɔ bíe haʼ bətieŋkɔŋ-bi. 29 Bʉʼka Nyii kyinə kwɛ́nə ndaahə-i te bʉə ndə ɔ kə séʼ bɔŋ, bìʼ bɔŋ fɛ. 30 Bii nɔ kə fəŋ chɔ́ʼ chu-Nyii bəshʉ, bɔŋ nduɔ, Nyii nɔʼ dʉ̀ʼ tʉvyiikə tʉ bii bʉʼka bʉə-Juu chɔ́ʼ chu-i. 31 Nɔ, mbəŋ-yʉə ghɔ nduɔ, nɔ tʉʼ chɔ́ʼ chu-Nyii mbɔ tíŋ hə bɔ̌ŋ tʉvyii-Nyii-kə ndə ɔ kə dʉ̀ʼ tʉ bii ghɔ, mbəŋ-yʉə bu leʼ lʉ̀ yʉʉ ndə tʉvyiikə ndə Nyii tʉʼ dʉ̀ʼ ghɔ. 32 Bʉʼka Nyii nɔʼ chìi bʉə bənchəŋ, bɔ̂ŋ bɛ bʉə-njaa-chaŋ ndə məchɔ́ʼ chu, mbɔ ɔ chʉʼ dʉ̀ʼ tʉvyiikə tʉ bɔŋ bənchəŋ.

33 Oo, fʉʼ-Nyii-kə yɔ́ŋ ntyʉʉ təka loo! Mu kətʉ súunə-i ghɔŋbə ndaa-ɛ dɔ̀ŋnə ntyʉʉ təka loo! Bɛ nda ndə bəkɔ ɔ kínə tiɛŋ-ɛŋ ndə məchʉ̀ə ŋkwɛ-ɛ? Bəkɔ kínə nda kínə fiatə-i?

34 Haʼ ndə ŋwɔʼnə-Nyii ghɔ̀ŋ mbɔ, "Bɛ nda ndə ɔ nɔʼ kínə ŋkwɔʼtə-Tiekətʉ? Byuunɔ, bɛ nda ndə bəkɔ ɔ tʉ́ʼ ɔ?"*11:34 Adaya 40:13.

35 "Bɛ nda ndə ɔ nɔʼ kə fəŋ kɔ́ kɔkə tʉ ɔŋ ndə ɔ kie məlɔ̀ʼ?"*11:35 Jub 41:11.

36 Bʉʼka fɔbə inchəŋ nɔ gwè hə kəghɔ-ɔ, chìi mbəŋ-ɛŋ i buŋ bɛ ghɔ, bɔŋ kə́ bɛ ndə məgʉə-e. M̈əgʉ́ə bɛ tʉ ɔŋ təmə liʼ-i ghɔ fɛ. Ï bɛ haʼ nɔ.