1 Wotəmiyɔŋ nɔ kie ndə məyʉ́ chu-bəntəŋbəshʉ ndə bɔ̂ŋ tʉʼ sɔ́ʼ bʉə, bʉʼka ntəŋbəshʉ kaa ghɔ ndə ɔ gòʼ təmə gwè hə kəghɔ-Nyii fɛ, bʉə ndə bɔ̂ŋ bɛ chɔ, dùʼhə Nyii dùʼhə bɔŋ. 2 Nɔ, wo ndə ɔ kwɛ̀ŋhə tʉ bɔŋ nɔ kwɛ̀ŋhə tʉ wo ndə Nyii dùʼhə, bʉə ndə bɔ̂ŋ tɛ́ŋ ndə məyʉ́ chu-yʉə nɔʼ chʉ̀ə ŋkwɛ-yʉə bʉəbʉə. 3 Bʉʼka bʉə ndə bɔ̂ŋ tʉʼ sɔ́ʼ kyinə fɛ̀ŋhə bʉə ndə bɔ̂ŋ kie nuʼ jyujyu fɛ. A kʉ̀ʉ mbɔ ntəŋbəshʉ mə fɛ̀ŋhə aŋ fɛ mɛ? Fɔ̀ʼ nukə ndə i bɛ jyujyu, ɔ bu tíi yie-a jyujyu, 4 bʉʼka ɔ nɔ bɛ vaafɔ̀ʼ-Nyii ndə bʉʉ-a. Bɔŋ kaʼ a kə́ fɔ̀ʼ bʉ̂ʼʉ, a nɔ kie ndə məfàa, bʉʼka ghʉəʼkə ndə ɔ kie ndə məchɔ́ŋhə aŋ kaa njʉnjʉ fɛ, bʉʼka ɔ nɔ bɛ vaafɔ̀ʼ-Nyii, ndə ɔ tʉʼ fɔ̀ʼ tʉʉbʉə-Nyii ndəŋ wo ndə ɔ tʉʼ fɔ̀ʼ nu-bʉəbʉə-bə. 5 Ndə luu-ɔ̄, wo nɔ kie ndə məyʉ́ chu-bəntəŋbəshʉ təmə bɛ haʼ ndə məfàa tʉʉbʉə-Nyii fɛ, bɔŋ mbɔ Ŋ̈kwɔʼtə-kətʉ-e bɛ itʉ́ʉnə ghɔ.

6 Nɔ bɛ haʼ bʉʼka luu-ɔ̄ ndə bii tʉʼ lɔ̀ʼ tashi, bʉʼka bəntəŋbəshʉ ndə bɔ̂ŋ tʉʼ sɔ́ʼ bʉə nɔ bɛ bʉə-fɔʼɔ-Nyii ndʉʉ ndə bɔ̂ŋ tʉʼ fɔ̀ʼ fɔʼɔ-yʉə. 7 B̈ii lɔ̀ʼ fɔkə tʉ bʉə bənchəŋ ndə bɛ ŋkwo-yʉə bətɔ-bii, kɔ́ shyîikə tʉ bʉə ndə bii kie ndə məkɔ́ tʉ bɔŋ, fàa wo ndə bii kie ndə məfàa ɔ, kɔ́ kuŋhə tʉ wo ndə bii kie ndə məkɔ́ kuŋhə tʉ ɔŋ.

8 Kə a məkie ŋkwo wo bətɔ-a fɛ, yaʼkɛŋ ŋkʉ̂ʉ ndə mədʉ̀ʼ tʉ ŋwɔŋtə-ii, bʉʼka wo ndə ɔ kʉ̀ʉ ibɛʼ-yə wo nɔʼ tʉ́ʼ mbʉ nuʼ. 9 Bəŋkahə ndə i ghɔ̀ŋ mbɔ, "Kə a mə gháa bəsəŋ fɛ, kə a mə yí wo fɛ, kə a mə lʉ́ʼ fɔkə fɛ, kə a mə kʉ̀ʉ mbɔ fɔ-wo-kədɔŋ-kə bɛ ya-yə fɛ," leʼnə ibɛʼ-yə ŋkahə nɔ chə̀ŋtə ndə mbyu kəŋgie-ɔ̄ mbɔ, "A nɔ kie ndə məkʉ̀ʉ wo-kətoʼ-a ndə a kʉ̀ʉ ŋwɔŋ-aŋ." 10 Ŋkʉ̂ʉ kyinə nə fɔ̀ʼ mɔ̀ʼmbɛ tʉ wo-kətoʼ-e fɛ, nɔ, ŋ̃kʉʉ nɔ tʉ́ʼ nuʼ-Nyii.

11 Ndə məbìʼ ndəŋ yɔ̄ŋ-yə, bii nɔ kínə mbʉ ŋgwɔʼmbi, mbɔ ndʉʉ nɔʼ kʉ̀ʼnə tʉ bii ndə məgwùʼtə hə mbɛŋhə. Bʉʼka ndʉʉ nɔʼ kə́ŋhə tʉ bʉʼʉ ndə məkie ŋkwaaNyii tə chàa ndə bʉʼʉ kə fəŋ bɛ́ŋ Nyii. 12 Mbʉ ndʉʉbətyuʼ nɔʼ tʉʼ tíŋ, ndʉʉnəchî nɔʼ kə́ŋhə. B̈ʉʼʉ jə̀ŋ fɔʼɔ mu kənjəŋ, mɔ̀ʼ fɔ-chɔ̂-ndʉʉnəchî-bə mbʉə-bʉʼʉ, ndə məgwúu byuʼu nə mbi isúunə. 13 B̈ʉʼʉ kə́ chìi nubə ndə i kʉ̀ʼnə haʼ ndə bʉə ndə bɔ̂ŋ tʉʼ chìi nubə-ʉə ndʉʉnəchî. Kə bii mə kɔ́ ŋwɔŋ-yii ndə kie-bəsəŋ-tə fɛ byuunɔ kə́ búu ndʉʼmə fɛ, byuunɔ kə́ kwɔ̀ʼtə bəsəŋ fɛ byuunɔ nu-kətʉvyiinə-bə fɛ, byuunɔ mə kə́ mɔ̀ʼ chyuutə fɛ byuunɔ mə kə́ túunə bəfyuʼ fɛ. 14 B̈ii mɛ̀ʼtə ŋwɔŋ-yii, J̈iso Klai Tiekətʉ jyʉ́ʉhə bii ndə mə-kə́-fɔ̀ʼ nubə ndə i kʉ̀ʼnə tʉ ɔŋ, b̈ii káa ndə mə-kə́-yʉ́ hə kəghɔ nuʼ-bʉəbʉə-yii ndə mə-kə́-fɔ̀ʼ nubə ndə ɔ kʉ̀ʉ mbɔ b̈ii fɔ̀ʼ.