15 Mɔ kínə nukə ndə mɔ tʉʼ fɔ̀ʼ fɛ, bʉʼka mɔ kyinə fɔ̀ʼ nukə ndə mɔ kʉ̀ʉ ndə məfɔ̀ʼ fɛ, mɔ buŋ leʼ kə́ fɔ̀ʼ bə nukə ndə mɔ bàa. 16 Nduɔ, kaʼ mɔ kə́ fɔ̀ʼ nukə ndə mɔ gòʼ təmə kʉ̀ʉ fɛ, yɔ̄ŋ-yə nɔ dʉ̀ʼ mbɔ mɔ nɔ bɛ́ŋ mbɔ nuʼ-Nyii nɔ bɛ jyujyu. 17 Nɔ, leʼbie mbəŋ-ɔŋ ndə mɔ tʉʼ fɔ̀ʼ mbʉ bənu fɛ, nɔ tʉʼ fɔ̀ʼ bʉ̂ʼʉ ndə i bɛ mu mbʉə-mɔ fɔ̀ʼ mbʉ bənu.
18 Bʉʼka mɔ nɔ kínə mbɔ nu-jyujyubɛʼ-kə bɛ ghɔ ndə i bɛ mu mbʉə-mɔ fɛ, mɔ nɔ tʉʼ te mu ntɔ-bʉ̂ʼʉ-mə-ɔŋ. Bʉʼka mɔ nɔ kʉ̀ʉ ndə məfɔ̀ʼ nubə ndə i bɛ kʉ̀ʼnə, bɔŋ təmə kie ghʉəʼkə ndə məfɔ̀ʼ fɛ. 19 Bʉʼka mɔ tʉʼ fɔ̀ʼ nu-jyujyu-bə, ndə mɔ kʉ̀ʉ ndə məfɔ̀ʼ fɛ, mɔ bɔŋ kə́ fɔ̀ʼ bə haʼ nu-bʉəbʉə-bə ndə mɔ bàa. 20 Nduɔ, kaʼ mɔ kə́ fɔ̀ʼ nubə ndə mɔ gòʼ təmə kʉ̀ʉ fɛ, təmə tʉʼ leʼ fɔ̀ʼ mɔ fɛ, nɔ tʉʼ fɔ̀ʼ bʉ̂ʼʉ ndə i bɛ mu mbʉə-mɔ.
21 Nɔ, mɔ nyíɛ mbɔ nɔ bɛ nuʼ mbɔ ndʉʉ ndə mɔ tʉʼ kʉ́ʉ ndə məfɔ̀ʼ nu-jyujyu-kə nɔ, bʉ̂ʼʉ kə́ŋhə mbʉə mɔ tə chàa yɔŋ. 22 Mɔ nɔ kʉ̀ʉ nuʼ-Nyii kɛŋ nə vaafyii-ɔ, 23 mɔ bɔŋ kə́ nyíɛ nuʼ kədɔŋ mu mbʉə-mɔ, nuʼ ndə i tʉʼ gwúu byuʼu ghɔŋbə mbʉ nuʼ-Nyii ndə mu fyii-ɔ bɛ́ŋ. I chìi mɔ bɛ wo-njaa-chaŋ tʉ nuʼ-bʉ̂ʼʉ ndə i bɛ mu mbʉə-mɔ. 24 Oo wo mbʉʼ nə mɔ, bu kwáa nda kwáa mɔ ndə mbʉə-ɔ ndə i tʉʼ shyùu mɔ kɔ́ tʉ kwú nɔ? 25 Mɔ nɔ kɔ́ ndɔ Nyii tíŋ hə bɔ̌ŋ Jiso Klai Tiekətʉ-yʉʼʉ! Nɔ, mɔ nɔ tʉʼ fɔ̀ʼ tʉ nuʼ-Nyii nə fyii-ɔ, bɔŋ ntɔ-bʉ̂ʼʉ-mə-ɔŋ kə́ fɔ̀ʼ tʉ nuʼ bʉ̂ʼʉ.