1 Nɔ nyɔ̀ʼ mbəŋ-ɔŋ Jɛŋ, nyɔ̀ʼ ŋwɔʼnə-ɔ̄ŋ, ndə mɔ bɛ vaantie Nyii ghɔŋbə Jiso Klai mbʉ Tiekətʉ.

Mɔ nɔ nyɔ̀ʼ tʉ bʉə-Nyii ndə bɔ̂ŋ bɛ mu lɔŋ-Isilɛ-bə njuɔ bûu nə wuŋ ndə bɔ̂ŋ kə nyʉ́ʉ wɔ̀ʼnə mu lɔʼɔ-bətə̂ŋ-kədɔŋ-tə.

Mɔ gìe tʉ bii.

2 Bəliŋ-bɔŋ, b̈ii lʉ̀ ndə tʉʉjyu, ndʉʉ ndə nu-shʉ́əshʉ́ə-bə gwè tʉ bii ntɛntɛhə, 3 kə́ kínə mbɔ məmùutə ndə bə bu mùutə bii bʉʼka məmɔʼfyiihə-ii ndəŋ Jiso Klai, bu gwè nə məlyʉ̀ʉtə́nə. 4 B̈ii mɛ̀ʼtə məlyʉ̀ʉtə́nə fɔ̀ʼ fɔʼɔ-ɛ gɛ̀ lìʼ, mbɔ bii chʉʼ kɛŋ bɛ kʉ̀ʼnə təmə kə́ byúu nubɛʼkə mu məchimbi-bii fɛ.

5 Kaʼ wo mu bii byúu mukətʉ-súunə, ɔ̈ bíʼtə tʉ Nyii ndə ɔ̃ kɔ́ yɔ̀ʼ ghɔkə-i təmə kə́ sɔ́ʼ wo ndə ɔ bíʼtə fɛ, bə bu kɔ́ tʉ ɔŋ. 6 Ɔ kʉ̂ʉ bɔŋ kə́ bíʼtə nɔ, mɔ̀ʼfyii-i ndəŋ Nyii təmə kə́ jínə fɛ, bʉʼka wo ndə ɔ̃ jínə nukə nɔ bɛ nə lɛɛŋhə-muu-kə ndə fʉʉkə tʉ́ʉhə kɔ́ bəviabəvia. 7 Ntɛ wo-maa-ɔ̄ŋ kie ndə mə-kə́-kwɔ̀ʼtə mbɔ ɔ bu kie fɔkə kəghɔ-Tiekətʉ fɛ. 8 Ɔ nɔ bɛ nə wo təbuuŋ bûu təmə tə́nə ndəŋ fia imɔʼ ndə nubə inchəŋ ndə ɔ tʉʼ fɔ̀ʼ fɛ.

9 Wo ndə ɔ mɔ̀ʼfyii-i ndəŋ Nyii təmə fɔkə-i bɛ ghɔ fɛ, ẗʉʉ-i kə́ bʉ̀ʉ bʉʼka mbɔ Nyii nɔʼ chɔ̀ʼhə ɔŋ ghɔʼ. 10 Bɔŋ ẗʉʉ wo-kəfʉʼ kə́ bʉ̀ʉ bʉʼka Nyii nɔʼ shúʼhə bɔŋ sê, bʉʼka bɔ̂ŋ nɔ bɛ nə yii-ŋkɔ-bə muŋkɔ ndə i bu yi yúɔnə mì. 11 Bʉʼka c̃hichi nɔ sɔ́ʼ nɔ, i tɔ̀ŋ, chìi ŋkɔ yúɔnə, yii-ŋkɔ-bə-bi chóʼnə gwùtə sê, məbʉʉ-i mì. Nɔ bɛ haʼ nɔ ndə wo ndə ɔ tʉʼ nyʉ́ʉ bɔ̌ŋ kəfʉʼ bu sɛ̀nə mì.

12 Tʉʉjyu nɔ bɛ yi-wo-yə ndə ɔ lyʉ̀ʉtə́nə shʉ́əshʉ́ə ndʉʉ ndə nu-shʉ́əshʉ́ə-bə tʉʼ gwè tʉ ɔŋ, bʉʼka mbɔ ndʉʉ ndə ɔ bu tə́nə tə gɛ̀ lìʼ nɔ, bə bɛ́ŋ ɔŋ, fùɔ ŋgʉʼʉ məchímbi kətʉ-ɔ təmə liʼ-i ghɔ fɛ, ndə Nyii nɔʼ kɔ̀ʼnə tʉ bʉə ndə bɔ̂ŋ kʉ̀ʉ ɔ. 13 Kaʼ bə kə́ mùutə wo ndə məgwù mu bʉʼʉ, kə ɔ məghɔ̀ŋ mbɔ, "Nɔ tʉʼ mùutə Nyii mùutə mɔ fɛ." Bʉʼka mbɔ bə mə mùutə Nyii ndə məchìi bʉ̂ʼʉ fɛ, təmə mbəŋ-ɛŋ bɔŋ kyinə mùutə wo ndə məgwù mu bʉʼʉ fɛ. 14 Ndʉʉ ndə b̃ə mùutə wo mbɔ ɔ gwù mu bʉʼʉ nɔ, ĩ nɔ gwè hə ndə ŋkwɔʼtə mu fyii-i ndə i tʉʼ lóʼtə ɔŋ ndə məshyùu ɔ gɛ̀ nə yɔŋ. 15 Ndʉʉ ndə mbʉ ŋkwɔʼtə gʉ́ə nɔ, i bí bʉ̂ʼʉ, mbʉ bʉ̂ʼʉ bɔŋleʼ kɛŋ shʉ̀tə tə̀ŋ nɔ, gwè nə kwu.

16 Kə wo mə fə́ʼhə bii fɛ ŋkɛŋ bəliŋ-bɔŋ, 17 kɔ-jyujyu-kə təmiyɔŋ ghɔŋ ŋkɛŋ kəkɔ təmiyɔŋ nɔ lɔ̀ hə kweghɔʼ, shíʼ gwè hə kəghɔ-Tie bəfɔ ndə i tʉʼ báa yuo inchəŋ təmə kyinə kíahə ndə mbi kíahə ŋwɔŋ-ɛŋ kɔ́ njəŋkə nɔ fɛ. 18 Nɔ kə bɛ ŋkʉʉnə tʉʉ-i ndə məbí bʉʼʉ tíŋ hə bɔ̌ŋ ŋgie-shʉəŋ-kə-i, mbɔ b̈ʉʼʉ bɛ ntɛ fəŋ kəfɔ mu fɔbə ndə ɔ nə chìi.

19 Ŋkɛŋ bəliŋ-bɔŋ, b̈ii yʉ́ yɔ̄ŋ-yə, ẅotəmiyɔŋ kə́ chʉʼ yʉ́ nukə, kə́ yá ŋwɔŋ-ɛŋ buŋ kə́ kwə́ʼ, təmə kə́ chʉʼ bàa tʉʉ fɛ, 20 bʉʼka tʉʉbʉə kyinə chìi wo bɛ ndyʉndyʉ shʉ-Nyii fɛ.

21 Nɔ, b̈ii mɛ̀ʼtə mənyàatə ŋwɔŋ-aŋ, fyúhə nu-bʉəbʉə-bə mbʉə-a, lʉ̀ ŋwɔŋ-aŋ sê fí ŋgieNyiikə ndə bə nɔʼ bè mu mbʉə-a, ndə bəkɔ i kwáa a.

22 B̈ii bɔŋ kə́ fɔ̀ʼ nukə ndə mbʉ kəŋgie tʉʼ ghɔ̀ŋ tʉ bii, kə bii mə kə́ fə́ʼhə ŋwɔŋ-yii ndə mə-kə́-yʉ́ haʼ yʉ́ fɛ. 23 Bʉʼka mbɔ kaʼ wo kə́ yʉ́ haʼ mbʉ kəŋgie yʉ́ təmə kə́ fɔ̀ʼ fɛ, ɔ bɛ nə wo ndə ɔ lʉ̀ fɔ-lɛ́nə-shʉ-kə kíi mbe-shʉ-i nə yɔŋ, 24 bʉʼka mbɔ ɔ lɛ́nə ŋwɔŋ-ɛŋ kʉ̂ʉ kíahə shʉ-i haʼ ndʉʉmɛ, tuŋ leʼnə ntɛhə ndə ɔ bɛ. 25 Bɔŋ wo ndə ɔ kíi mu ŋkɛŋ nuʼ-Nyii, ñuʼ ndə i ŋɔ́ʼhə fia tʉʼ ighʉ́ʉnə tʉ bʉə, kaʼ ɔ tʉ́ʼ ndaahə-i chɔ təmə bɛ wo ndə ɔ tʉʼ yʉ́ bʉ̀nə leʼnə fɛ, bɔŋ-kə́-leʼ bɛ wo ndə ɔ tʉʼ fɔ̀ʼ mbʉ kənu ndə ɔ̈ yʉ́, ɔ bu kie tʉʉjyu ndə nubə ndə ɔ tʉʼ fɔ̀ʼ.

26 Kaʼ wotəmiyɔŋ kwɔ̀ʼtə mbɔ ɔ bɛ wo-Nyii, təmə kə́ yá tʉ-kəlɛɛŋhə-kə-i fɛ, ɔ nɔ tʉʼ fə́ʼhə ŋwɔŋ-ɛŋ, ntɛ wo-ɔ̄ məghaaNyii-i nɔ bɛ njʉnjʉ. 27 MəgháaNyii, ndə bɛ ŋkɛŋ ɛŋ təmə bə nɔʼ bʉ́əhə bəshʉ-Nyii mbʉ Tie fɛ, nɔ bɛ məlɛ́nə vâabəti ghɔŋbə bəkwuʼ bəke mu ŋgʉəʼ-yʉə leʼnə məyá fyii-a ndəŋ wʉʉnəmbikə ndə məbʉ́əhə a.