1 B̈ii yʉ́ bʉə-kəfʉʼ, b̈ii gwía bɔŋleʼ tíi bʉʼka ŋgʉəʼ ndə i bu shíʼ ndəŋ bii. 2 Nchuɔ-yii nɔʼ byʉ́ʼ, tuŋnchɛʼnchɛʼ kwó ndyihə-i. 3 Kɔŋkə nɔʼ kwó kyʉə-yii, mbʉ kəkɔŋ bu tə́nə ndəŋ cheʼkə yie-bii bɔŋ-bu-leʼ kwó mbɔʼ-mbʉə-yii nə viʼi ghɔ. Bii nɔʼ kóʼhə nchuɔ mu ndyiʼtə-bəchî-bə-ɔ̄ŋ. 4 B̈ii nyíɛ! Kyʉə-bʉə-tə ndə bɔ̂ŋ tʉʼ fɔ̀ʼ mutɔ-bii, bii kə́ chìi ŋkwo təmə kə́ lɔ̀ʼ fɛ, tʉʼ gwía te bii, gwía bʉə ndə bɔ̂ŋ tʉʼ lʉ̀ fɔbə mutɔ-a nɔʼ dàa tʉ Tiekətʉ, ndə ɔ kie ghʉəʼkə inchəŋ.

5 Bii nɔʼ lʉ̀ məchimbi-yii ndə məyú mbi bɔŋleʼ kə sàtə ŋwɔŋ-yii. Bii nɔ tʉʼ yúʼ ŋwɔŋ-yii, kə́ chyìi chîkə ndə bə bu gwìatə bii chɔ. 6 Bii nɔʼ chʉ̀ə ŋkwɛ nə mbii bɔŋleʼ yítə bʉə ndə bɔŋ tə́nə ndyʉndyʉ təmə bɔ̂ŋ bɔŋ dʉ̀ʼ ghɔkə-ʉə chu bii fɛ.

7 Bəliŋ-bɔŋ, b̈ii ghʉ́əhə fyiihə-ii tə chîkə dàa ndə Tiekətʉ bu yi gwè. B̈ii kwɔ̀ʼtə ndə wo-mutɔ chyìi mbɔ mutɔ-ɛ kʉ́ʉnə ntɔŋ-jyujyu-mə, ɔ yá fyii-i kə chyìi fəŋ wyuu ghɔŋbə ndyiʼtə-wyuu-kə ndə məfyíi. 8 Mbəŋ-yii ghɔ, nɔ kie ndə məyá fyiihə-ii, tə́nə shʉ́əshʉ́ə, bʉʼka məgwè Tiekətʉ nɔʼ kə́ŋhə.

9 Bəliŋ-bɔŋ, kə bii mə kə́ luŋtə te ŋwɔŋtə-ii fɛ, bʉʼka bə mə yi chʉ̀ə ŋkwɛ-yii bʉəbʉə, nyíɛ, Wo-kwɛ̀-fɛʼɛ nɔ tə́nə chusii.

10 Bəliŋ-bɔŋ, ndə via-ŋgʉəʼ-kə leʼnə məyá fyii b̈ii lʉ̀ fʉʼkənu hə ndəŋ bʉəyʉkəŋgieNyii ndə bɔ̂ŋ nə kə kwə́ʼ yie-Tiekətʉ. 11 B̈ii kə́ kínə mbɔ bʉʼʉ nɔ kínə mbɔ bʉə ndə bɔ̂ŋ lyʉ̀ʉtə́nə nɔ bɛ bʉə-kətʉjyu. Bii nɔʼ kə yʉ́ ndə Jub kə lyʉ̀ʉtə́nə, bɔŋleʼ nyíɛ nukə ndə Tiekətʉ kə fɔ̀ʼ tʉ ɔŋ, ntɛ ndə Nyii kə kie tʉvyiikə ndəŋ ɔŋ bɔŋleʼ dʉ̀ʼ tʉvyii-yɔ́ŋyɔ́ŋ-kə tʉ ɔŋ.

12 Bɔŋ ndə nchəŋnchəŋ-ɛŋ, bəliŋ-bɔŋ, kə a mə kə́ kàa nukə fɛ, kə bɛ sê, kə bɛ yuo təkɔmə fɔbɛʼkə təmiyɔŋ, bɔŋ əŋ-aŋ nɔ kie ndə məbɛ əŋ, mbee-a kə́ bɛ mbee, byuunɔ bə bu yi chʉ̀ə ŋkwɛ-a bʉəbʉə.

13 Wo bɛ mu bii ndə ɔ tʉʼ nyíɛ ŋgʉəʼ mɛ? Ɔ̈ gháaNyii. Wo bɛ mu bii ndə tʉʉ-i tʉʼ bʉ̀ʉ mɛ? Ɔ̈ lə̀ʼtə Nyii nə lyuu.

14 Wo bɛ mu bii ndə ɔ tʉʼ yɔ́ʼyɔ́ʼ mɛ? Ɔ̈ tə́ŋ tíi bəntəŋbəshʉ mu chɔshi, b̈ɔ̂ŋ gwè gháaNyii kətʉ-ɔ, yóʼ ɔ nə ŋgwomə yie-Tiekətʉ. 15 Ndʉʉ ndə bɔ̂ŋ tʉʼ gháaNyii mɔ̀ʼfyiihə-ʉə ndəŋ ɔŋ, i bu kwáa ŋgɛɛ ndə ɔ tʉʼ yɔ́ʼyɔ́ʼ, Tiekətʉ chʉ́ʼ ɔ. Kaʼ ɔ nɔʼ kə chìi bʉ̂ʼʉ, bə bu sʉ̀fyii hə ndəŋ bʉ̂ʼʉ-e.

16 Ndʉʉmɛ, b̈ii gwía fyùufyùu tʉ ŋwɔŋtə-ii, gháaNyii tʉ ŋwɔŋtə-ii, mbɔ Nyii chʉʼ chʉ́ʼ bii. MəgháaNyii wo ndə ɔ tə́nə ndyʉndyʉ tʉ Nyii nɔ kie ghʉəʼ-shʉ́əshʉ́ə-kə ndə məfɔ̀ʼ. 17 Ɛlaja nɔ nə bɛ haʼ woməsʉʉ ndə bʉʼʉ, ɔ gháaNyii shʉ́əshʉ́ə mbɔ wyuu mə fyíi fɛ, ndə ŋgʉʼhə itia nə bəchi ntʉʼʉ təmə wyuu chə́ŋ sê fɛ. 18 Ndʉʉmɛ, ɔ bìʼ gháaNyii, yuo ŋɔ́ʼnə wyuu fyíi fɔ-sê-bə kʉ́ʉnə.

19 Bəliŋ-bɔŋ, kaʼ wo mu bii ndə ɔ nɔʼ kə bɛ́ŋ Nyii fɔ̀ʼ ŋwɔŋ-ɛŋ fyuhə hə ndəŋ fia shʉəŋ, ibɛʼ-yə wo bʉ̀nə gwè nə nɔŋ, 20 ɔ̈ kínə mbɔ wotəmiyɔŋ ndə ɔ bʉ̀nə gwè nə nɔŋ ndəŋ bʉ̂ʼʉ-e, bu kwáa tʉkə-i hə ndəŋ kwú, i bɔŋleʼ sʉ̀ bʉ̂ʼʉ-e.