1 Pedro, Jesucristonën kaiskë, ꞌixun kana asabi ka kixun mi kain, bëtsi menu kuani tsuákia ꞌaish anu tsókë kana a ëmanu ꞌikë mi kain, Ponto, Galacia, Capadocia, Asia ꞌimainun Bitinianu ꞌikë.

2 Nukën Papa Diosan, an kuë́ënkësabi okin mitsu kaisa ꞌikë. Ka aín Bëru Ñunshin Upitan mikama mëniokin upí ꞌimiaxa, ami katamëkin an kuë́ënkësabi okin ꞌanun, Jesucristonën imin ka mi mënioxa. Usa ꞌain kamina chúama tani upiti kuë́ëni bukukanti ꞌain.

3 Dios nukën ꞌIbu Jesucristonën Papa a kananuna rabiti ꞌain. An nu chaíira nuibakin amiribishi bakëntëkënkësa ꞌimianan Jesucristo baiskikë kupin, kananuna nun kainti ꞌain.

4 ꞌImainun kamina mitsun biti Diosan mi naínu, naxunkë ñu chëëki nëtëtima, chuatima, nukatima a biti ꞌain.

5 Mix Diosmi sinánkë ꞌikë ka mitsu, aín kushin mi bërúankin ië́mikë, a ka nëtë këñuti ꞌurama mi ꞌunamiti ꞌikën.

6 Usa ꞌain kamina mikama ꞌitsaíira kuë́ënti ꞌain, usai tëmëranumabi kamina ashiti nëtëti ꞌitsama nëtë ꞌitsaíira ñu inuti, tëmërati ꞌain.

7 Mikama ami sinankë ax ka kurisa ꞌikën: Ax ka tsi ërë́kë anun xarokin tankë ꞌiti ꞌikën. Mix ami sinani tëmërakibi tënëkë ax kurisamaira ꞌikën, ꞌaibi ka kuri ax charokë ꞌiti ꞌikën. Usa ꞌain ka mikama, ami sinankë ax asabi ꞌiti ꞌikën, a ka utëkënki aín nëtë pënëira anu mi Jesucristonën utëkënki anu mi ꞌimiti ꞌikën.

8 Mikaman kamina Jesucristo isikëma ꞌixunbi ami sinanin; usa ꞌain kamina bëri isimabi ami sinani, chaíira kuë́ëira kuë́ëni upíira a sinani banañuma ꞌiti aín.

9 Usaimi ami sinani katamëkë anun kamina uinu kaina nukutisa tani, anu nukuti ië́kë ꞌiti ꞌain.

10 Profetakaman ka ënë ñu upiokin ꞌunankëxa, anun nu ië́ti kupí, ꞌunanan ka Diosan nuibakin mitsu ꞌinanti aribi ñuiakëxa.

11 Cristonën Bëru Ñunshin Upitan ka bëramabi profetakama ꞌunamiakëxa, Cristoa tëmërati aribi ꞌunamiakëxa, ꞌimainun ka aín nëtë pënëira uti ꞌikë kixun; atun ka unantisa tankëxa, anua tëmërati nankë Bëru ñunshin ax anu ꞌiakëxa.

12 Diosan ꞌunamikëxun atun ñuikë ax ka ainama ꞌiakëxa, ax ka mitsua ñuixunkë ꞌiakëxa. A ñuia bana ax ka bërí nëtëbi ñuikë ꞌikën, a banabi ka aín Bëru Ñunshin Upitan ꞌunamikëxun ñuiakëxa. A upí banabi ka nainuxun xukë ꞌiakëxa. ¡Ënë ñuribi ka ángel kamaribi istisa tankëxa!

13 Usa ꞌai kamina upiti mëniokakë ꞌixun añu karamina ꞌati ꞌai kainti ꞌain. Diosan Jesucristo utëkënkëbëtan mi nuibakin ꞌinanti ñu a.

14 Aín bëchikë ꞌaish kamina ax kuë́ënkësa oishi ꞌi, bëramami Dios ꞌunankëma ꞌai ꞌiasoi kamina ꞌitima ꞌain

15 Usa ꞌain kamina ñu upishi ꞌai ꞌuchaima tsóti ꞌain, Dios an mi kuëan ax ka upíira ꞌai ꞌuchañuma ꞌikën;

16 kuënëo bana ka kia: —Mitsux kamina ñu ꞌaisama ꞌakëma upíira ꞌuchañuma ꞌiti ꞌain, ꞌën ribi kana ñu ꞌaisama ꞌakëma upíira ꞌuchañuma ꞌain.

17 Mitsun kamina «Dios Papa» Kain, an ka kamabi mitsun ꞌakë ñu sënënbi isti ꞌikën, usa ꞌain kamina kamaxi nuibakin upiokin ñu ꞌati ꞌain, ënë menuxun.

18 Mitsun kamina ꞌunanin Diosan ka nu biaxa min rarakama ꞌiasai ꞌaisamai tsokë; a ëmikin mitsu ꞌië́miaxa, mitsun kamina upiokin ꞌunan, ax ka kuri ꞌimainun kuríki ax kupikë usanën kupioma ꞌikën,

19 usa ꞌain ka Jesucristo, imi upíira ax *ñuina unamara, uisaibi ꞌikëma xarokë anun akësaribi okin akë ꞌiakëxa.

20 Me unioisama pain ꞌain ka Cristo pain kaisakëxa, usa ꞌai ka bëri añukama nëtë ankëtamainun mitsuna ꞌinu mërákë ꞌikën.

21 Jesucristo kupin kamina mitsux Dios ënkima sinani, an ka baiskimiana upí ꞌimiaxa; usa ꞌain kamina mitsun upiokin Dios sinani kuë́ënki a kainti ꞌain.

22 Bërí kamina mikama an kikësabi oi ꞌiti bana asérabi ñuia a kuati, mëniokati kamina sinánati min xukën kamabë nuibananti ꞌain. Usa ꞌain kamina bëtsibë bëtsibë nuibanani min nuitu upíira ꞌixun min kushibëtabi ꞌati ꞌain.

23 Usa ꞌain kamina mitsux amiribishi bërí bakëntëkënkë ꞌain, bërí kamina min papa axa uni ꞌaish bamati aín bëchikëma ꞌain, Dios axa bamatima oi xënibua ꞌainbi tsókë aín bana ꞌai.

24 Kuënëokë bana kia:

—Kamabi uni ka chukusa ꞌikë, ꞌain ñu ka chaíira ai ñu ubasa ꞌikë, chuku ëskikëbë ka aín uba pakëtia,

25 ꞌAibi ka Nukën ꞌIbu bana ax uinsarabi këñutima ꞌikën.

Ënë bana ka upí bana ꞌën mitsu ñuixunkë a ꞌikën.