1 Usa ꞌain kana mi kai xanukama min bënë kikësabi oi kamina ꞌiti ꞌain, mi usai ꞌikëbëtan ka an upí bana ñuia kuakëma ax ribi usai ꞌiti ꞌikën, mitsux upiti nikë ꞌixun ñu upí ꞌaia isi sinana ti ꞌikën.

2 An mi iskëkaman ka mitsuxmi upiti tsóti nuibanani Dios mi katamëtia isti ꞌikën.

3 Mix mëniokakë an ka ëman ishi ꞌiti ꞌikën, mix masirikikë, min mëñuti kuri ꞌakë, ꞌimainun mín chúpa upíira pañukë,

4 áma min nuitu mëu upíira ꞌiana, nami upíira ꞌaish min sinan bachu ax ka nëtëtima ꞌikë upíira ꞌai Diosan iskëx asábira ꞌiti ꞌikën.

5 Usaribiti ka bërama an ñu ꞌatima ꞌakëma xanukamaribi mëniokakëxa, an ka aín bënëan kakëxun kuanan Diosmiribi katamëakëxa.

6 Usaribikin ka Saran, Abrahamnën bana tankin, «ꞌËn ꞌibu kakëxa.» Mikama kamina aín tuá ꞌai, a kupin kamina ñu upí ꞌai rakuëtima ꞌain.

7 Xanuñu unikama mitsun kamina min xanubë upiti ꞌiti ꞌunanti ꞌain, usa ꞌain kamina min xanu nuibati ꞌain. Kamina atux kuëënkësa okin nuibati ꞌain, atux ka kushima ꞌianan anuan mitsubë tsóti a Diosan ꞌinankë ꞌikën, usai ꞌikëbëtan ka Diosan min ñukakëxun kuati ꞌikën.

8 A kupí, kamina mitsux timëax nuibanani, min xukëbë bëtsin sinankësari okin sinani bukuti ꞌain.

9 Bëtsian mi ꞌatima okëxun kamina minribi ꞌatima otima ꞌain, bëtsin kara mi ꞌichatia a kamina usakiribi ꞌichátima ꞌaín, ꞌakima kamina atuxribia upí ꞌinun Dios ñukaxunti ꞌain.

10 A kupin ka: Uix kara upiti tsótisa tania an aín kuëëbikëñun aín ana bëruankë ꞌaish këmëima banati ꞌikën.

11 Ñu ꞌaisama ꞌakë a ënkin kamina upí ñuishi ꞌati ꞌain, upiti tsóti kamina usai ꞌiti ꞌain.

12 Nukën ꞌIbun ka an ñu upí ꞌakë a isanan ñukakëxun kuatia. ꞌAibi ka an ñu ꞌatima ꞌakëkama a kuë́ënima.

13 ¿Uin kara mi ꞌatima oti ꞌik, mitsun ñu upí aia?

14 ꞌAibi kamina ñu upí ꞌai tëmërati ꞌain, ¡chúamarua tani kamina mitsux ꞌiti ꞌain! Uimibi rakuëti kamina ratutima ꞌain.

15 Usai ꞌikima kamina Cristo a nukën ꞌibu ꞌikë min nuituna rabiti ꞌain. Kamina mëniokakë ꞌixun uin kara mi kaia a kati ꞌixun kainti ꞌain, mia ñu kakëxun min kainkë a ñuiki kati ꞌain,

16 ꞌAibi kamina kakin upiokin nuibakin kati ꞌain. Mix Cristonan ꞌixun kamina upiokin kati ꞌain, uix kara mix upí uni ꞌain mi ñui ꞌatimati banaia axá aín banabi katëtanun.

17 Asabi ka nux ñu upí ꞌai të́ëmërakë a ꞌikën, usai kananuna Dios kuë́ënkëbë ñu ꞌatima ꞌaimabi tëmërati ꞌain.

18 Cristonëxribi ka nun ꞌucha kupí tëmërai bamakëxa, achúshi oishi ꞌitëkëntima oi. Ax ka ñu ꞌaisama ꞌakëma ꞌiakëxa, ꞌaibi ka uni ꞌatima kupí nukama Diosnu ubanti kupí, aín nami ꞌaisama oxun ka bamamiakëxa, ꞌaibi ka baiskitankëx aín Bëru Ñunshinsa ꞌiakëxa.

19 Usa ꞌain ka bëru ñushinkama sipunu ꞌikë a bana ñuixuni kuankëxa.

20 Usa ꞌain ka bërama nëtë ió ꞌain bëru ñunshin an Dios kainti nëtë a Noénën, kakëxubi kuaisama tankëxa. Noénën nunti ꞌatamainun usa ꞌain ka ꞌitsama unishi, mëkën achúshi ꞌimainun rabë́ ꞌimainun achúshi unishi ꞌumpaxnua ië́akëxa.

21 ꞌUmpax ax ka anun bërí nashimikë a ꞌiakëxa, a kupí kananuna bëri ië́kë ꞌain. Nashimikë ꞌaish kananuna nun nami upiokin chukakë ꞌima, Diosan ka ami sinankëxun nun sinan upí ꞌimia, usa ꞌaibi ka Jesucristo bama kupinshi nu ꞌië́mia.

22 An ka naínu kuan ꞌaish Diosan mëkeu tsótaxa usa ꞌikë ka, ángelkama ꞌimainun a iskëma kushikama ax kushíira ꞌaín an kikë sabio ꞌia.