1 ꞌAibi ka Bëru Ñunshin Upí asérabi kia, anun nëtë këñuti ꞌurama ꞌain ka aín patsanën ami sinanti ënti ꞌikën, bëru ñunshin ꞌatimakaman parankëxun ka ami katamëti ënti ꞌikën.

2 Usa ꞌixun ka ñu upí ꞌakatsi kikin uni parankibi ñu ꞌaisama ꞌaia, aín sinan manë xarokë ꞌunanti okësa ꞌixun ka ñu ꞌatimashi ꞌati sinania.

3 Usa unikaman ka xanu bitima kianan a pitima, ñu isa pitima ꞌikë kia, ꞌaibi ka Diosan, kamabi ñu piti uniokëxa. Usa ꞌain ka nux ami katamëkin asabi ka katankëxun piti asabi ꞌikën, ꞌimainun kananuna asérabi ka ax ꞌikë kixun ꞌunanti ꞌain.

4 Kamabi Diosan unio ñu ax ka upí ꞌikë, usa ꞌikë kananuna timakima Dios asabi ka kakin piti ꞌain.

5 Usa ꞌain ka aín bana ꞌimainun Dios ñukakë an upí ꞌimia.

6 Ënë ñukama nun xukëantu ꞌunami kamina asérabi Jesucristo ñu mëxunkë ꞌiti ꞌain, usakin ai kamina upiokin pikësa ꞌimainun aín bana ꞌupiokin ꞌunamiana ami sinanti ꞌain.

7 ꞌAibi kamina ënë nëtënuxun ñuikë bana kuatima ꞌain, ax ka ꞌaísama ꞌikën, a kuakima kamina ami kushikin abi ñu upí ꞌati ꞌain,

8 nun abati shaikikë an ka upí ꞌikën, usamaíira ka anun nëtëtima oi tsóti ax ꞌikën, a nu ꞌinankë bërí nux tsóti ꞌimainun usai ꞌikuanti a ꞌikën.

9 Ënëx ka asérabi ꞌikën ꞌimainun ka kamaxunbi aribi ꞌati ꞌikën.

10 A kupin kananuna ꞌitsaíira ñu më́ëkin tëanan, ami kushikin kainti ꞌain, Dios bamatimoi tsókë ax ka an kamabi uni ië́mikë a ꞌikën, uix kara ami katamëtia an ka aina ꞌiti ꞌikën.

11 Ënë ñukama kamina xukin ꞌunamiti ꞌain.

12 Uibi ka mi bëná uni ꞌikë mi usantima ꞌikën. Usai ꞌima kamina mix upí ꞌiti ꞌain, an rabikë kamanribia mi upí isnun. Mix banai nuibanankë a kuanan, mix ꞌikësaribikin ꞌiti ꞌunanti ꞌikën, axribi ka Diosmi katamëti nuibanani misaribi ꞌiti ꞌikën.

13 ꞌË nukutamainun kamina, kamabi uni a kuati sinananun kuënëokë bana kushin ñuñu ꞌakin nun xukënkama a kuati ami sinanun ꞌunamiti ꞌain.

14 Kamina ëntima ꞌain mia Diosan aín ñu mëti ꞌanun ꞌinan a, mia kasabi okin ka apankama iglesianu ꞌikë an min maxkanu aín mëkën nanti ꞌikë.

15 Kamina bëruankati ꞌai ënë ñukama kuakin upioki ꞌaimi, mix upiti nikë a ka isti ꞌikën.

16 Kamina bëruankati ꞌain mix tsókë ꞌimainun min bëtsi ꞌunamikë a, usakin ꞌai kamina mix upí ꞌiti ꞌain. Usakin ꞌai ꞌië́kin kamina an mi kuakë aribi ꞌië́miti ꞌain.