1 ꞌUnamikin kamina uni apan ñukakima; upiokin min papa ꞌakësokin kati ꞌain, uni bëná kamaribi kamina min xukën akësaribiokin kati ꞌain.

2 Xanu apan kamina min tita akësabi okin nuibati ꞌain, bëná kamaribi kamina min xukën akësa oti ai, xanu chipaish kamina ami ꞌatimokin sinankima kuë́ëmikin kati ꞌain.

3 Xanu kasunamëkë kamina an ꞌakinti ꞌaima aín akinti ꞌain.

4 ꞌAibi xanu kasunamëkë tuañu ianan babañu ixun ka xanu a akinti ꞌikën, an paian ka bërama bëruonan ꞌakinia. Usakin ꞌati ka Dios kuë́ënia.

5 Asérabi xanu kasunamëkë abi ꞌixun ka, an ka ami sinánkin Dios nëtën ꞌimainun ñantan ñukatia.

6 ꞌAibi kasunamëkë xanu an ñu ꞌatima ꞌatinu ꞌinamëkë ax ka bamakësa ꞌikë.

7 Usa ꞌain kamina ën akësa okin ati ꞌain, uinbi uisakibi ñuikëma ꞌitanun.

8 Uin kara aín aintsi akinima, an ka aín aintsi ꞌibukama ami manúkin akinima ax ka ami sinankëma ꞌaish ꞌuchañu uni kamasamaíira ꞌikën.

9 Xanu kasunamëkë aín anë kirikanu ꞌakë, ax ka sesenta baritia inúkë ꞌiti ꞌikë, usa ꞌaish ka achuishitishi bënua ꞌiakëxa.

10 ꞌImainun ka upiokin aín ñu më́ëti unankë ꞌiti ꞌikë. Aín tuakama upiokin kaniokë ꞌimainun ka ꞌain xubunu uni nukutia bikë ꞌiti ꞌikën ianan ka upí unikama ꞌain taë chukakë ianan; tëmërakë unikama ꞌakinkë ꞌimainun bëtsi ñukamaribi.

11 ꞌAibi ka kasunamëkë xanukama aín bari chukuma ꞌain anë kirikanu nantima ꞌikën, usa ꞌain ka Jesucristomi manuti amiribishi bënutisa tanti ꞌikën.

12 ꞌImainun ka abi kikësabi okin ñu akëma kupí anunbi ꞌuchokë ꞌiti ꞌikën.

13 ꞌIanan ka xubunu atsinbëkini nikin ka chikishkin, këmëkin bana ñuibëkini nikin a ñuitima bana abi ñuia.

14 Usa ꞌain kana kuë́ëni xanu kasunamëkë ꞌain bari chukuma an bënutankëxun, tuaxun upiokin, kaniokin aín xubu bëruonan, ami banakin ñuikëma ꞌiti ꞌikën, añu kupibi ñuikëma.

15 Rairi xanu kasunamëkënën ka Diosmi manukin ñunshin ꞌatima nuia.

16 Uinu ꞌikë xanux kara Cristonan* ꞌikë an ka aín aintsi kasunamëkë ꞌakinti ꞌikë, iglesianë a ꞌakintima kupí. Usa ꞌain ka iglesianë xanu kasunamëkë an ꞌakinti ꞌaima a ꞌakinti ꞌikën.

17 An iglesianu upiti tëanan ꞌakinkë a ka ꞌain bana tankin nuibakin upiokin ꞌakinti ꞌikën, an upiokin ñuixuana ꞌunamikë a.

18 Kuënëokë bana ka kia: —Vaca bënë an ñu bëru takáki chakakin amakë a kamina kuëtanitima ꞌain. ꞌImainun ka: —An ñu më́ëkë uni ax kupiokë ꞌiti ꞌikën.

19 Uni apan kaniakëkëmi, manankë a kamina kuatima ꞌain. Rabë́ ꞌimainun achushinëx kikëbëtan kamina asérabi ka kati ꞌain.

20 An ënkima ꞌatima ñu ꞌai ꞌuchakë a kamina, kamaxubia kuatanun ësë́ti ꞌain, usakin ꞌakëbë ka rairi kamaribi rakuë́ti ꞌikën.

21 Mi kana ënë ꞌinanin, Dios, Jesucristo ꞌimainun angelkama an kaiskë an ꞌismainun, mi ꞌinankë bana ënë kamina bëtsi ꞌaisama okima sënëbi ꞌimiti ꞌain.

22 Upiokin isumashi kamina bënëkinshi bëtsinu min mëkën nantima ꞌain, mixribi ax ꞌikësai ꞌuchatima kupí. Usai ꞌima kamina kamabi ñu ꞌaisamami bëruankati ꞌain.

23 Min puku ꞌaisama ꞌixun kamina unpax, ꞌanan uvas baka chukumashi xëati ka asabi ꞌikë, min puku ꞌaisama ꞌitima kupí.

24 Rairinën ꞌuchakama ka ꞌunánkë ꞌikë anuan tëmërati nëtë ꞌukëma ꞌaibi, bëtsi unikamanan ax ꞌinúkë ꞌain ꞌunánkë ꞌiti ꞌikën.

25 Usaribiti ka uin kara ñu upí ꞌaia ax ꞌunánkë ꞌikë, ꞌimainun ka ñu ꞌatima ax unë́kë ꞌima.