1 Di yin kudot ishim fɛ́ aDa ki nye yit ne, fi i sak ba ki yes yit nnon Adakunom! Anɔng e fi in yet yit. Ikyɛng fi i sak banet azatse ki rēn yit awo yet nek iba ku rēn awo. 2 Bafidang in, yɔkɔnɔng in yet yit nnon Adakunom, ikyɛng fi in bi sot yit sak ashon, ba mi rēn ide ninyɛn awo. Awɛt ikyɛng fi in rēn yit yet fok, ni izen fɛ́ ba bi rēn ide, in bi sot yit ti iwu, nek in bi ku di yit tɛ fɛ́ a di se. 3 Ngma ayɔng fɛ́ a bɛ̀ kuri ite iyɛ yeng ni wu, a sosok cɛ́l, kyɔn ti iwu di se cɛ́l.

4 Ngma ayɔng fɛ́ a ras inɛn, a tsin ibeseng ntsi Adakunom yɔng. Nek inɛn de i yet ibeseng ntsi. 5 Awɛt iyin irēn yin fok ba bɛ́ na aYeso, nɔng a da bin sok anɛn, nek iwu bi inɛn awo. 6 Ngma ayɔng fɛ́ a se ayɛt wu, da a ya kashon ni iras inɛn awo. Ngma ayɔng fɛ́ a ya kashon ni ras inɛn, a mang di aYeso awo, kɛ a ku rēn awo.

7 Naban nnon in, i bi won in akak ki tsas yin natse awo. Ngma ayɔng fɛ́ a ras ikyɛng fi i se gyat, a yet afi kusot kutabat ashon Adakunom, kyɔn tɛ fi Iwu di se tabat ashon Adakunom. 8 Ngma ayɔng fɛ́ a ras ikyɛng fi i yet ifi inɛn, a yet afɛ́ aShetan, nek aShetan yet afi iras inɛn neme ni imɛsɛng e. Nek anɔng wu tun aRim Adakunom mok a di beseng kutomong aShetan ngma kusum. 9 Vit ayɔng fɛ́ a yet kutes Adakunom, fɛ́ a tɛ a ya kashon ni iras inɛn, nek kutset Adakunom se ni wu, a da kyem a tɛ a ya kashon ni iras inɛn awo, nek a mi sot kutes Adakunom. 10 Na ane wu fi in di rēn bayɔng fɛ́ ba yet nnon Adakunom, nɛ bayɔng fɛ́ ba yet nnon aShetan: ngma ayɔng fɛ́ da a ras ikyɛng fi i se gyat awo, nɛ ayɔng fɛ́ da a shim arunyining awo, a yet nggon Adakunom awo.

11 Itees e yeng ye fi in kin fok yit ni imɛsɛng e: i se gbing-gbing ni in shim yit bafidang yit. 12 Da i bi nye yin tɛ aKayinu awo, iwu fɛ́ a sot afɛ́ aShetan, a fɛt arunyining. Akyɛ fi i kin sak a ku fɛt mo yɛ? Nek ntomong wu kin yet nfɛ́ anyas, ni ntomong arunyining kin yet nfi kusot kutabat ashon Adakunom. 13 Ábaruneng, a bi ki te yin yɔɔt ke kazatse ki rayin awo. 14 Iyit rēn yit fok in mi shorop yit iku sak i sɛ kutset nek in shim yit baruneng yit. Ngma ayɔng fɛ́ a tonoso ishim awo, a resek mo nawop iku. 15 Ngma ayɔng fɛ́ a rawu arunyining, a yet anet ikok kutset. Iyin rēn yin fok, ngma ayɔng fɛ́ a kok kutset fɛ́ a bɛ̀ kutset vit igang ayɛt wu.

16 Ne ane fi in di rēn yit ikyɛng fi ishim yet: aYeso Kristi mees kutset wu nek iyit. Nek anɔng, i se yɛɛt ni in mees yit kutset yit nek baruneng yit. 17 Ke akak bi ikyɛng azatse, na yɛrɛ arunyining ayɛt kudaam, na rawu dang fok angmishish wu, i se wɛshɛk fok ishim Adakunom se ni iwu awo. 18 Naban nnon in, won da ishim yit bi se ni ncɛɛt anu nɛ ni ilem kyɛk awo, tit ishim fɛ́ ba tonoso ni ntomong nɛ atsak. 19 Na anɔng wu fi in di rēn yit fok in se yit ayɛt atsak, ni in bɛ̀ yit imen iyɛ ashon Adakunom, 20 ni izen fɛ́ ayɛ yit tsin ki ya yit ni ishɔt e. Nek Adakunom wat kuyiring ayɛ yit, iwu rēn kaakyɛ.

21 Bafidang in, ke da ayɛ yit tsin ki ya yit ni ishɔt awo, in bɛ̀ yit iyɛ ting ashon Adakunom, 22 in da sɛ yit ngma ikyɛng fi in ku rip yit, nek in foos yit agbat ifɛ̀ wu, ni iras yit ikyɛng fi iwu shim. 23 Agbat Ifɛ̀ wu me yeng: ni in shan yit atsak ni iyerek Ari wu, aYeso Kristi, ni in tonoso yit ishim sak na bafidang yit kyɔn tɛ agbat ifɛ̀ wu di fɛ̀ ni iyit. 24 Ngma bayɔng fɛ́ ba foos agbat ifɛ̀ wu, ba se ayɛt wu, iwu se ayɛt ba. Na ane fi in di rēn yit fok a se ayɛt yit: in rēn yit anɔng nek Kabik wu fɛ́ a ki nɔɔk.