1 Bafidang in, i bi nesek yin atsak na kaakyɛ kabik awo, awɛt mara yin nabik e ninyɛn da di ke ka ne na Adakunom ɛ, nek batan mbɔɔs dot mi nɔ azatse. 2 Na ane fi i da rēn yin Kabik Adakunom: kaakyɛ kabik fɛ́ ka fɛ̀ ey fok aYeso Kristi mi bɛ́ ayɛt irɔm, ka ne na Adakunom, 3 awɛt kaakyɛ kabik fɛ́ da ka shan atsak naton aYeso awo, ka ne na Adakunom awo. Kabik e yɔng ka ka yet ka fɛ́ anet ifa aKristi, fi i kin fok yin fok ka bi bɛ́, yɔkɔnɔng ana ka mi nɔ azatse.

4 Iyin naban nnon, iyin ne yin na Adakunom, i mi ya yin awɛng naton ba, nek ayɔng fɛ́ a se ayɛt yin, a wat ayɔng fɛ́ a se azatse. 5 Iba yet bafɛ́ azatse, nek anɔng, ba cɛɛt kuri kucɛɛt banet azatse, ne kazatse ka ba foos. 6 Iyit ne yit na Adakunom, ngma ayɔng fɛ́ a rēn Adakunom, ki foos yit; awɛt ngma ayɔng fɛ́ da a yet afɛ́ Adakunom awo, wes ato ni iyit awo. Na ane fi in di rēn yit Kabik atsak ne kabik mbɔɔs.

7 Bafidang in, won ni in shim bafidang yit, nek ishim nes na Adakunom. Ngma ayɔng fɛ́ a tonoso ishim, a yet kutes Adakunom, a rēn Adakunom. 8 Ngma ayɔng fɛ́ da a tonoso ishim awo, a rēn Adakunom awo, nek Adakunom yet ishim. 9 Na ane fɛ́ Adakunom ki tonong yit ishim wu: a tom azizɛɛt Ari wu kyɛk sak azatse, nɔng in da sɛ yit kutset ni wu. 10 Ishim e se ane: da iyit ba fi in kin shim yit Adakunom awo, tit Adakunom iwu fɛ́ a ki shim yit, a tom na Ari wu ti kunang itarang anɛn yit. 11 Bafidang in, nek ishim fɛ́ Adakunom ki tonong yit, i se gyat iyit ni in tonong yit bafidang yit ishim bà. 12 Vit anet fɛ́ a kin man di Adakunom; awɛt ki in tonoso yit bafidang yit ishim, Adakunom se ayɛt yit, ishim wu mi shining ayɛt yit.

13 Iyit rēn yit fok in se yit ayɛt wu, iwu se ayɛt yit, nek iwu mi ki nɔɔk yit Kabik wu. 14 Iyit ice yit, in mi di yit, in mi ti tas yit ne nanu yit fok, aDa mi tom Ari wu, na a sot Anet-Isheshek kazatse. 15 Ngma ayɔng fɛ́ a fɛ̀ ey fok aYeso yet Arim Adakunom, Adakunom se ayɛt wu, iwu se ayɛt Adakunom. 16 Nek anɔng fi in di rēn yit, in di te yit yɛndɛng ni ishim fɛ́ Adakunom bɛ̀ nek iyit.

Adakunom yet ishim. Ngma ayɔng fɛ́ a se ayɛt ishim e, a se ayɛt Adakunom, Adakunom se ayɛt wu. 17 Na anɔng wu, fi ishim di shining ayɛt yit, nɔng in da bin sot yit ni iyɛ ting atuk ishɔt igang azatse, nek azeng azatse, in se yit ti iwu. 18 Ishim bi nnyim awo. Ishim atsak ro nnyim, nek nnyim bɛ́s nek kuyiring itabak. Anet fɛ́ a bi nnyim, ishim wu mi shining yɛɛt-yɛɛt awo.

19 Iyit tonoso yit ishim, nek iwu tun ki tonong yit ishim. 20 Ngma ayɔng fɛ́ a fɛ̀, <<Imi shim Adakunom,>> awɛt na rawu arunyining, a yet anet mbɔɔs. Nek ngma ayɔng fɛ́ a rawu dang shim arunyining, ayɔng fi iwu tsin yɛrɛ, a da kyem a shim Adakunom fi iwu kin man di awo. 21 Ni igang e, iwu mi ki nɔɔk yit agbat ifɛ̀ deng: ngma ayɔng fɛ́ a shim Adakunom, i se gbing-gbing na a shim arunyining bà.