1 In tsin ki jɛk yin ne naton Ifɛ̀ fi i kin se ni imɛsɛng, fi iyit kin fok yit, fi in kin di yit na ayisi yit, fi in kin yɛrɛ yit, fi mbɔk yit kin bamang. In tsin ki jɛk yin e naton Ifɛ̀ fi i nesek kutset. 2 Kutset e kin bɛ́, iyit di yit iko, in tsin di nesek yit kanu cɛɛt naton e, in tsin ki shara yin kutset vit igang e, fi ku kin se gung ne Ada, a mi bɛ́ ni yit. 3 Iyit tsin ki taas yin, ikyɛng fi in kin di yit, fi in kin fok yit, nɔng iyin da bin moon yin ice ni iyit, na atsak e, imoon ice yit se gung ne Ada Adakunom, nɛ ari wu aYeso Kristi. 4 In tsin jɛk yit nkyɔrɔk nang, nɔng iyɛ kan yit bin shining.

5 Iye itom e yeng, fi in kin fok yit ni wu, fi in tsin ki taas yin: Adakunom yet mgbey, vit itsarang ahwyi ayɛt wu. 6 Ki iyit nye yit, fok in se yit ayɛt imoon ice ni wu, ni in tsin rēn ya yit kashon ni nggɔn ahwyi, in tsin wɔrɔk yit ace yit, in tsin nye yit kusot atsak awo. 7 Awɛt ki ku tseng yit se ayɛt mgbey, kpaf ti iwu di se ni mgbey, ni in monoso yit ice ne bafidang yit, nasok ari wu aYeso, ki kan yit ayɛt anɛn yit ngma.

8 Ki iyit nye yit, fok da in bɛ́ yit inɛn awo, in tsin wɔrɔk yit ace yit, atsak di se ni yit awo. 9 Ki in taas yit anɛn yit, Adakunom yet afɛ́ atsak, a se tabat, a da ki fuut yit anɛn yit, na ki kanang yit na kaakyi irèn anɛn. 10 Ki iyit nye yit, fok in man ra yit inɛn awo, in kusas yit na a sot tɛ anet mbɔɔs, itonong fok ifɛ̀ wu se ayɛt yit awo.