1 Bafidang in, kufumung in kufɛ́ afaa kang sak ni yin. In ki jɛk yin ina, mok in ki yiring yin nkyɔrɔk e, nɔng in da te nyɛk yin ni kuyiring kusot kucɛ́l ngma kusum. 2 Imi shim ni yiring yin ncɛɛt fɛ́ batan ajɛrɛ aneme man nye, ni kucɛɛt fɛ́ aTisa yit nɛ Anet-Isheshek kin tak na nu batom wu.

3 Ni imɛsɛng e, i se gbing-gbing ni rēn yin fok, ni nnom igang e, bafi ibyes bi ne, ba bi tonoso ibyes na ba nyes kushim anyas bà. 4 Ba bi fɛ̀, <<Wat kucɛɛt ibɛ́ wu me se kɛ? Badakop yit mang kus neme, kaakyɛ ren tseng kpaf neme fɛ́ ba di tumung kazatse.>> 5 Awɛt iba te burum zɔng zɔng fok neme ni kukyem ifɛ̀ Adakunom, kazanɛn di se, ba kin di nye kazatse ayɛt ashi nɛ nate ashi. 6 A tɛ yet ne ashi izen e yɔng wu fɛ́ ba kin di gang na kazatse. 7 Ni ifɛ̀ izining e dɔng fɛ́ ba di bereng kazanɛn nɛ kazatse kang nek kurong, ba sak ina sak kunom ishɔt ni ifɛlɛ banet fɛ́ vit iba ni nnyim Adakunom.

8 Awɛt iyin bafidang yin, i bi te burum in ni ikyɛng izining deng awo: Kunom kuzining na aTisa se tɛ ayɛ agup azining, nɛ ayɛ agup azining se ti kunom kuzining. 9 ATisa se nɔshɔsh ni ishining kushii wu kyɔn tɛ fɛ́ bakak di di awo. A bɛ́ akabɔk ni iyin nek a shim akak na a wey awo tit kaangan na a won anɛn na a tirik sak na Adakunom.

10 Awɛt kunom ibɛ́ aTisa bi se tɛ akpatang di nes. Kazanɛn bi te bit nek iwɔng igberey. Ngma nkyɔrɔk fɛ́ ba di nye kurong bi fɛlɛ ina, ba bi yɛs kazatse ni nkyɔrɔk fi in se ayɛt e.

11 Ayet fok ba bi shosh kaakyi ikyɛng anɔng, akyɛ kuri banet fi i se gyat ni i sot yin ɛ? I se kpaf ni inye yin kusot ajɛrɛ ni kusot fɛ́ Adakunom shim, 12 ni tsin di tot yin kunom Adakunom e, di barang yin i tsi ko. Kunom e bi bɛ́ ku fɛlɛ kazanɛn ni kurong, nkyɔrɔk fɛ́ ba di nye ika bi te vit ni rong. 13 Awɛt kpaf ti kushii wu, in tsin tang yit ayisi ku di kazanɛn kafas nɛ kazatse kafas, kari bafi kusot kutabat.

14 Nek anɔng, bafidang in, ni tsin di tot yin nkyɔrɔk e yɔng, nye nyɛk yin da ba bi ki sɛ yin na karìk ke inɛn awo, tit kusot imen iyɛ ni iwu. 15 Rēn yin fok, akabɔk aTisa yet kawat isheshek, kyɔn tɛ icɛk iyɛ yit aBulus ayɛt kutsitsɛng fɛ́ Adakunom ku nɔk, a kin ki jɛk yin ne. 16 A kin jɛk kpaf anɔng ayɛt afumung wu, azaton nkyɔrɔk e nang. Afumung wu bi nkyɔrɔk in kak fi in bi mgbang irēn, nkyɔrɔk nang fɛ́ bafi vit irēn nɛ ba buk-buk nabik, mi shesheng ace icɛɛt e kpaf tɛ fɛ́ ba mi nye ne afumung ajɛrɛ akak, ba di kɔk ice bá kawɛy.

17 Nek anɔng bafidang in, nek i rēn yin anɔng, nye yin nhwyɛ kɔng ba ki te yin ice kangang ni itees mbɔɔs, ni ma won karɔ katek fi i di nyeseng yin. 18 Tit ni ya yin kashon ni i rasak ayɛt itek ni irēn aTisa nɛ Anet-Isheshek yit aYeso Kristi. Won ízɔk ni sot ifuu yɔkɔnɔng nɛ ayɛ na ayɛ! Anɔng.