Awɛng abik fɛ́ ba sɛs ne Anet-Isheshek
3 Itere ni i yet ifɛ̀ Adakunom, ada aTisa yit aYeso Kristi, iwu yɔng fɛ́ a mi ki te yit awɛng, ne akaakyi kuri awɛng abik fɛ́ a se naton aza, nek kusot yit ayɛt Anet-Isheshek. 4 Nek iwu mang ki kasa yit ayɛt Anet-Isheshek dang na nye kazatse, nɔng in da sot yit jɛrɛ, vit inɛn anu ashon wu. Nek ishim wu, 5 Adakunom mang sak gyam, ni in sot yit nnon wu nek ikyɛng fɛ́ aYeso Kristi nye. Anɔng e se kpaf ni ikyɛng fi iwu shim.
6 A nye anɔng, nek in di tere yit ízɔk itek wu, fɛ́ a ki nɔɔk yit ninang, ayɛt Ari wu fɛ́ a shim. 7 Ni wu ba mi ki bisik yit nek inosong nasok wu, in sɛ yit ifuut anɛn, kpaf ni kurúm itek fɛ́ Adakunom bɛ̀, 8 fɛ́ a mi ki nɔɔk yit shɛrɛk, ngma ni kutsitsɛng makiyi ni irēn nkyɔrɔk.1:8 Ni ilem aGirik, itonong fok Adakunom nesek itek wu nek kutsitsɛng ni irēn wu ke nek kutsitsɛng wu ni irēn wu a ki nɔɔk yit itek wu. 9 Nek iwu shim nin rēn yit, Adakunom mi ki tonong yit kushim wu fi ku tsang se ni nɛt, kuyɔng fi ku mi sɛ ishining ayɛt Anet-Isheshek. 10 Ikyɛng fɛ́ Adakunom mi sak e, bi shining ni izen fi i se kpaf: a bi moon ngma nkyɔrɔk fi i se azanɛn, ni nyɔng fi in sɛ azatse, ni ice anet azining, fɛ́ ayet Anet-Isheshek.
11 Ayɛt wu fɛ̀ Adakunom ki kasa yit mo, ni in sot yit banet ice wu. A ki myak yit gyam nek anɔng fɛ́ a kin sak, na a nye kaakyi ikyɛng ni tseng kpaf ni kushim wu, 12 nɔng iyit fi in yet yit bafi imɛsɛng ayɛt ite iyɛ na Kristi, in da sot yit bafi itere ízɔk Adakunom. 13 Iyin se yin ayɛt Anet-Isheshek bà, nek izen fi i kin fok yin ifɛ̀ atsak, ifɛ̀ itek fi i nesek isheshek, ama fi i di nɔɔk yin atsak, ba ki te yin izizɔ nagang wu, Kabik aJɛrɛ fɛ́ ba kin nye kushii me. 14 Kabik aJɛrɛ me yet ikyɛng fin tsin tin bamang yit, nfi ngma iya itekari fɛ́ Adakunom mi ki nɔɔk yit fɛ́ a tonoso gbing-gbing fok in bi ya yit ide, ma izen fɛ́ Adakunom bi bisik ngma nnon wu, sak itere ízɔk wu.