1 Nek i mi sot yin nnon fɛ́ Adakunom shim, kuus yin nggɔn wu ni kusot yin. 2 Nye yin kusot ayɛt ishim, kpaf tɛ fɛ́ Anet-Isheshek ki tonong yit ishim, a nɔɔk ice wu nek iyit, ti inabak-akuce fɛ́ a bɛ́ nkɔn ntek sak na Adakunom.

3 Awɛt ba bi fok ikyi ikak ti kujang, kɛ kaakyi kuri nggɔn in gbɛk-gbɛk e, kɛ kuhwye nate yin awo, nek anɔng e se gyat na banet ajɛrɛ bafɛ́ Adakunom awo. 4 Ama anɔng, i bi cɛɛt yin kucɛɛt nsum kɛ kucɛɛt ishɔp kɛ aduk kuro awo, anɔng e se kpaf awo, akuce anɔng, nesek yin ifeng sak na Adakunom. 5 Rēn yin ane: vit afi kujang kɛ afi kutomong ku gbɛk-gbɛk kɛ afi kuhwye fɛ́ a se kpaf na anet iya nabannom ntong, fɛ́ a bi ya itekari ni igwɔm Anet-Isheshek ni ifɛ́ Adakunom. 6 Da akak bi ki wɔrɔk yin ni itang anu awo, nek kuri nkyɔrɔk yɔng fɛ́ kafa kawe Adakunom di tisik naton ágbakasak ánet. 7 Nek anɔng, i bi moon yin ice ni iba awo.

8 Nek iyin kin tsang se yin na ahwyi, awɛt yɔkɔnɔng i mi sot yin mgbey ayɛt aTisa. Nye yin kusot ti nnon mgbey 9 (nek ikyɛng fi mgbey tes yet; nggɔn ntek, ni kusot kutabat nɛ atsak) 10 tsɛsɛk yin ikyɛng fi i da tɛrɛk aTisa iyɛ. 11 Ikyi ikak bi ki moon yin ni ntomong abap ahwyi awo, akuce anɔng, tarak yin ina. 12 Nek iyet ikyɛng nsum, na ba cɛɛt nkyɔrɔk fɛ́ ba ras ni nɛt. 13 Awɛt ngma ikyɛng fɛ́ ba tarak ni mgbey, se wɛshɛk, 14 nek mgbey e na fi in tonoso kaakyɛ wɛshɛk. Nek anɔng fɛ́ ba di fɛ̀ ye,

<<Shiming, ngɔn anet nda,

dorok ayɛt bafaben,

Anet-Isheshek da ta

mgbey wu naton ngɔn.>>

15 Nek anɔng, nɔ yin nhwyɛ yin, ni kusot fi i se yin ne, i bi sosok yin tɛ ashɔp awo tit tɛ batsitsɛng, 16 ra yin kutomong gyat ne kaakyi kawat fi sɛ yin, nek nnom e yet nmaane. 17 Nek anɔng, i bi sot yin ishɔp awo tit rēn yin akyɛ de fɛ́ aTisa shim ɛ. 18 I bi feng yin ni kutsit awo, nek anɔng e bɛ́s ni nggɔn ibeseng. Akuce anɔng, won Kabik Adakunom ka ki shining yin. 19 Cɛɛt yin na bafidang ayɛt abom itere, nɛ abom fɛ́ a nes na abik, tere yin aTisa na abom fɛ́ a nes na ayɛ yin. 20 Nesek yin Ada Adakunom ifeng nek kaakyi ikyɛng ni iyerek aYeso Kristi.

21 Nabasa yin ace yin na bafidang, nek iratek fi i nesek yin Anet-Isheshek.

22 Banyining, nabasa yin ace yin sak na bamatek yin ti i tsin nye yin aTisa ne. 23 Nek amatek wu a yet ice abining, kyɔn tɛ Anet-Isheshek di yet ice bafi ikuus, kurɔm wu, fi iwu wu a yet Anet-Isheshek e. 24 Kyɔn tɛ bafi ikuus di nasap ice na Anet-Isheshek, anɔng wu banyining ba di nasap ace bá na bamatek bá na kaakyi irèn.

25 Bamatek, tonoso yin banyining yin ishim, kyɔn tɛ Anet-Isheshek di tonong bafi ikuus ne. A nɔɔk ice wu nek iba 26 nɔng a ka ba te mo jɛrɛ, a ka ba kusu ni ikusu ashi ni ifi ifɛ̀. 27 A nye anɔng, nɔng a da bin nabak ice wu ne, bafi ikuus fɛ́ ba nɛp, vit karìk kɛ ikɔɔt, kɛ ibeseng ikak ayi, tit banet ajɛrɛ vit ibeseng. 28 Kpaf anɔng fi i se gyat bamatek na ba shim banyining bá ti nrɔm bá. Ngma anet fɛ́ a shim abining wu, a tsin shim ice wu yɔng. 29 Nek vit anet fɛ́ a ki mang rawu kurɔm wu, tit na nesek iko nayak na nye iko, kyɔn tɛ Anet-Isheshek di nye na bafi ikuus wu, 30 nek ngma yit in yet yit nkap irɔm wu. 31 <<Nek anɔng, anet da won ada wu ni nggɔ wu, na kana moon na abining wu, na bafaa me sot kurɔm kuzining.>>* 32 Ifɛ̀ deng yet ifi inɛt makiyi awɛt imi cɛɛt naton Anet-Isheshek nɛ bafi ikuus. 33 Ngma na anɔng, won kaakyɛ azining yin na a shim abining wu tɛ a da shim ice wu, na abining e nesek amatek wu iratek.