1 Nek anɔng imi aBulus, afi inyang nek Anet-Isheshek aYeso, akuce yin bafi Ícɛn-iduk 2 imi rēn fok iyin mi fok yin itek fɛ́ Adakunom di nɔk, nek ira kutomong nek iyin. 3 Ikyɛng inɛt fɛ́ ba di tonong e na nabos e, se kpaf ni ikyɛng fi in mi ki shɛbɛk yin e ni ijɛk. 4 Ni izen fi iyin fa yin ide, na anɔng fi iyin da rēn yin kutsik irēn hom ayɛt ikyɛng inɛt Anet-Isheshek. 5 Idɔng fɛ́ ba kin won dang tonong bafi nzam fi in mi gosok, kyɔn tɛ fɛ́ Kabik Adakunom mi tonong batom ajɛrɛ nɛ batan wu ne. 6 Ikyɛng inɛt e yet fok, ayɛt ishara ifɛ̀ itek, bafi Ícɛn-iduk yet bafi iya itekari gung nɛ bafi aIsrela, ba yet nkap kurɔm kuzining ngma bá, ba bɛ̀ kanu kafuba ayɛt ikyɛng fɛ́ Adakunom mang nye kushi me, ayɛt Anet-Isheshek aYeso.

7 Imi sot afi ishara ifɛ̀ itek e deng, nek kunang itek fɛ́ Adakunom di nɔk, ayɛt kukyem wu fi ku tsin ra kutomong ni imi. 8 Ngma fi imi wu fi in dung rat ayɛt banet Adakunom, ngma na anɔng, ba di nɔk itek e deng: nɔng in di shara sak ni Ícɛn-iduk, itek fi i wat agap kuyiring yit, in mi sɛ yit ide na Anet-Isheshek, 9 ni in nɔɔk kaangan mgbey azaton ikyɛng inɛt e, fɛ́ Adakunom kin fam ide na ayɛ ama, iwu fɛ́ a nye kaakyi ikyɛng. 10 Kushim wu yet fok yɔkɔnɔng, bafi ikuus ba fɛ̀ ba da tonoso ndiri-ndiri kutsitsɛng kutsik Adakunom sak na bágwɔm nɛ bafi kukyem aton aza. 11 Adakunom nye anɔng kpaf ni ishim wu ifɛ́ ayɛ na ayɛ, fi i sɛ ishining ayɛt Anet-Isheshek aYeso aTisa yit. 12 Nek kusot yit ayɛt wu, ni inɔɔk atsak yit ni wu, fi in di ki tsees yit ashon Adakunom ni iyɛ izining nɛ agap iyɛ. 13 Nek anɔng, in tsin ra awon ni yin, da nkap yin bi te gbɛrɛk nek izot fi in se ne nek iyin awo, mgbang e da ki bɛ́ yin ni itek.

14 Nek anɔng, in sas akut aben ashon Adada, 15 iwu fɛ́ bafɛ́ azanɛn nɛ azatse di sɛs iyerek bá. 16 In ra awon fok ayɛt kudot itek wu, a ki nɔɔk yin agap abik ayɛt ayɛ yin, 17 nɔng Anet-Isheshek bin te itis ayɛt ayɛ yin nek inɔɔk atsak yin. In ra awon fok, ni ibang te yin aney, nɔng ishim yin da te agap, 18 nɔng i di sɛ yin agap ni ishɛrɛp banet Adakunom, nɔng i di rēn yin kuyikyik, ni kuzamang, ni kutsik ishim Anet-Isheshek. 19 Nɔng i da rēn yin ishim aKristi fi i wat agap irēn, nɔng i da bin shining yin ni nkyɔrɔk fi in nes na Adakunom.

20 Won iwu fɛ́ a nyes kashon ni ikyɛng fi in ku risim yit, ni idɔng fi in yiring yit, kpaf ni kukyem wu fi ku se ni kutomong ayɛt yit, 21 won na a sɛ ízɔk nate bafi ikuus nɛ na Anet-Isheshek aYeso, ni kuzam kuka sak ni kuya, ayɛ vit igang! Anɔng.