1 Nnon, foos yin ifɛ̀ bada ni binggɔ yin na Adakunom, nek anɔng e se gyat. 2 Ti i di se ni ijɛk fok, <<Nɔk ada ni nggɔ ngɔn iratek.>> Nek ide yet agbat ifɛ̀ fɛ́ ba moon ni kushi. 3 Ki i nɔɔk yin bada ni binggɔ yin, <<i da sɛ yin awɛng, i da sɛ yin nkɔs dot azatse.>> 4 Bada, i bi sas yin nnon yin kafa kawe awo; akuce anɔng, ka ba ta yin ni itees, ni itabak aTisa.

5 Basam, foos yin ifɛ̀, ni nnyim bátékari yin bafɛ́ azatse. Nye yin anɔng na atsak iyɛ kyɔn ti i tsin nye yin Anet-Isheshek ne. 6 I bi nyes yin itek na yisi bá kyɛk mok i di tsɛt itere bá awo, tit tɛ basam Anet-Isheshek fɛ́ ba se ni ikyɛng fɛ́ Adakunom shim ni iyɛ izining. 7 Ras yin kutomong ni iyɛ izining kyɔn ti i tsin ras yin aTisa ne, da anet awo, 8 nek i rēn yin fok aTisa bi nɔɔk kaangan izang wu, na kaakyi kutomong kutek fɛ́ a ra, ke na a yet asam kɛ awashak anet ayi.

9 Bátékari, ras yin basam yin anɔng bà. I bi ka ba tes yin nnyim awo, nek i rēn yin fok, iwu yɔng fɛ́ a yet Atekari bá, nɛ afiin, a se azanɛn, a bi itsarang ishim ice awo.

10 Ni gang e, te yin gbagba ayɛt aTisa nɛ ayɛt kukyem wu fi ku se makiyi. 11 Te yin ngma ares itsom Adakunom, nɔng i da bin kyem i nyeseng yin gak ni itɛnɛsɛ narɔk aShetan. 12 Nek ifa yit se ni inam na nasok awo tit na bágwɔm, nɛ bafi kukyem, nɛ bayɔng fɛ́ ba ya igwɔm azatse ahwyi kang, nɛ aduk abik fɛ́ a se naton aza. 13 Nek anɔng, te yin ngma ares itsom Adakunom, nɔng atuk fi imaan inom bi bɛ́, i bi kyem i nyeseng yin gak, ama fi i mi gang yin kaakyɛ, ni nyeseng yin gak.

14 Nek anɔng, nyeseng yin gak! Te yin atsak tɛ kudun fɛ́ ba rosom nyɛng na awit, ni won yin kusot atsak ni kusot akpara-gwɔm yin, 15 won inye fi i mi kana nye nek ishara ifɛ̀ itek fi ibɛ́s ni kusot kukyang, ni isot akpatak yin. 16 Ama anɔng, won inɔɔk atsak yin ni isot kugɛ, fi i di ki tɛnɛsɛ yin abelel afet amaan e. 17 Sok yin abong kutsɔm fɛ́ a yet isheshek yin nɛ awal abik fɛ́ a yet Ifɛ́ Adakunom. 18 Na kaakyɛ awon, ras yin awon kaakyi izen ayɛt abik. Ni kuyiring anɔng, nɔ yin nhwyɛ yin, ya yin kashon na awon nek bafɛ́ atsak. Ares itsom afɛ́ Adakunom

19 Di ras yin awon kaakyi izen, nɔng ngma izen fi in tarak kanu, in da sɛ ikyɛng ifɛ̀, nɔng in da se vit nnyim ayɛt ishara ikyɛng fi i kin se ni nɛt ayɛt ifɛ̀ itek, 20 fi imi yet anet icɛɛt, fi in di se ni nyang nek ide. Ras yin awon nɔng in da taas ide vit nnyim, ni in taas ide gyat.

21 Icɛk iyɛ aTikikus, asam Adakunom afɛ́ atsak, da ki tak yin kaakyi ikyɛng nɔng i da rēn yin anɛ fi in di se ni ikyɛng fi in se ne. 22 Imi tsin ku tom nek anɔng, nɔng i da bin rēn yin kusot yit, na a ki barang yin mo agap ni iyɛ.

23 Ábaruneng, won kukyang, na atsak, ni ishim fi ines na Adakunom, Ada aTisa aYeso Kristi, ni i sot gung ni yin. 24 Won itek Adakunom ni isot ifɛ́ bayɔng fɛ́ ba shim aTisa yit aYeso Kristi, ni ishim fi i se vit igang.