1 Ki i sɛs yin igbingding fi ines nek kusot kufiri yin na Anet-Isheshek, ki i sɛs yin imen iyɛ nek ishim wu, ki ibɛ yin inyis nɛ Kabik, ki ibɛ yin ishim nɛ angmishish, 2 in tsin ra won ni yin, sak yin iyɛ ikan hom ni di barang dot, won kuyiring yin ni kusot kuzining, ni shim yin bafidang, sot yin bazining ayɛt abik ni ikyɛng fi i da nye yin. 3 I bi nye yin ikyikak nek ishim ice kɛ nek ito ice awo, tit ayɛt nggɔn imen ice ni kok yin bafidang se kashon ni iyin. 4 Akak yin bi tsɛt ikyikak ifi ishim ice wu kyɛk awo, tit idɔng fɛ́ bakak di ki sɛ itek bà. 5 Won nggɔn yin ni in tas nfɛ́ Anet-Isheshek aYeso,

6 Iwu fɛ́ ngma ni kusɛ wu

tɛ Adakunom,

da a sok nagbirigbɔng wu tɛ

na Adakunom.

Ti ikyɛng fɛ́ a di ki

tekap shɛng awo.

7 Awɛt, a sok ice wu

tɛ a yet ikyikak awo,

a sok nse kusot asam,

a bɛ azatse

ni kurɔm anet awe.

8 Ayɛt nse wu tɛ anet awe,

a men ice wu,

a nabak ice wu sak ni iku,

sak ni iku, kuri ifi itekak!

9 Nek anɔng, Adakunom

ku sok garang,

sak narɔ fɛ́ ka dung wat.

A ku nɔk iyerek fi

i wat kaakyi iyerek.

10 Nɔng, ni iyerek aYeso,

kaakyɛ anet da te guk akuut,

azanɛn nɛ azatse,

nɛ aben na kazatse.

11 Nɛ kaakyɛ anet da taas

ni ilem wu fok,

aYeso Kristi yet aTisa,

na Ada Adakunom

di sɛs iratek.

12 Nek anɔng, bacɛk iyɛ hom, kyɔn ti fi i mi di mɛɛ yin ni ifok-ifɛ́, da ma nek in se azɔng ni iyin kyɛk awo. I wat foos yin ide yɔkɔnɔng fi da in se azɔng ni iyin awo. Ya yin kashon ni i rasak ni kutomong isheshek yin. Ni nnyim ni itiim irɔm ashon Adakunom, sak ni igang e. 13 Nek Adakunom wu a se ni kutomong ayɛt ayɛ yin, nek iwu fɛ́ a ki saas yin ni ras yin ikyɛng fi iwu shim. Na ki nesek yin agap iras kpaf ikyɛng itek dɔng fɛ́ a mi sak ni iyɛ wu.

14 Ras yin kaakyi ikyɛng vit ikɔk ke nanan ayi, 15 nɔng i da sot yin vit inɛn, ni se yin halal, nnon Adakunom fɛ́ na se vit karìk, fɛ́ ba se ayɛt banet azatse kang fɛ́ ba se kangang, kuzam banet fi nhwyɛ mi wuruk ni ba, in shim ni iron yin nate ba tɛ ádat. 16 Ama anɔng bà, ni iberese yin ifɛ̀ fi i nesek kutset e gak, na anɔng wu in bi di tsot kugwɔm atuk ibɛ́ Anet-Isheshek, fok da i tsi hom ni kutomong hom kin yet kufɛ́ abap awo. 17 Awɛt ama inabak ashosh, ki kutset hom da sot inosong-ashi igang e, nek kutomong inɔɔk atsak yin, in bi iyɛ ikan ni ifeng ni iyin ngma. 18 Nek anɔng, i se gyat ni bɛ yin iyɛ ikan ni ifeng ni imi bá.

19 In bi ite iyɛ na aTisa aYeso, fok ngmash ni in tom aTimoti sak ni yin, nɔng imi bin di sɛ iyɛ ikan ama fi in mi fok ikyɛng fi i se yin ayɛt e. 20 Da imi ti in bɛ̀ akak fɛ́ a bɛ́ kuyiring kutek naton yin ti iwu awo. 21 Nek ngma ishɛrɛp e tsɛsɛk ikyɛng fɛ́ ba di ki sɛ ice bá da ikyɛng fi i di ki sɛ aYeso Kristi awo. 22 Awɛt iyin rēn yin fok, aTimoti mi tonong ice wu fok iwu se zɛɛt, nek ti nggon na ada ka, aTimoti mi ra isam gung ni imi ayɛt kutomong ishara ifɛ̀ deng. 23 Nek anɔng, in bi ite iyɛ fok ngmash ni in ku tom sak ni yin, ki in sɛ irēn ikyɛng fi i da te ni imi. 24 In bi nɔɔk atsak na aTisa, fok imi ice hom, ngmash ni in bɛ́.

25 Awɛt imi di i se gyat ni in ti in ki tom yin Apaforiditus, aruneng, afidang itomong nɛ afi ifiri hom ni itsom, fɛ́ a tɛ a yet atom yin, ayɔng fi iyin ku tun yin na a bɛ́ a di ses mo. 26 A bi iyɛ ngash ku di yin, a nɔ kudaam nek iyin fok yin fok a kurɔ. 27 Ey, na tsak e a kin se ni rɔk, bakat na a ku. Awɛt Adakunom fok angmishish wu, da angmishish wu kyɛk awo, ngma ni imi. Adakunom di tun kafa kawe naton kafa kawe. 28 Nek anɔng, a di se ki in mi ku yirik na a bun, nɔng ki i ku di yin, i da nye yin iyɛ ikan ni kudaam hom di kyɛk. 29 Ku shan yin ni iyerek aTisa ayɛt kafa kakan. Nesek yin banet ti iwu iratek. 30 Nek gyet kyɛk ke a ku nek kutomong Anet-Isheshek. A nɔɔk nwaa kutset wu ayɛt igbingding hom, a ki faam yin mo kawat ikyɛng fi iyin kyem i nye yin awo.