1 Nek anɔng, ti nggon inyang nek aTisa, in ra awon ni yin fok ni i nye yin kusot fi ku se kpaf ni iyes fɛ́ ba ki nye yin ne. 2 Ba ki sɛs yin ayɛt imen nhwyɛ ni iyit ice, nɛ akabɔk, nyes yin akabɔk ne bafidang ayɛt ishim. 3 Nye yin ngma ikyɛng fi i da nye yin nek imoon ice abik ayɛt kusot kukyang. 4 Iyit yet yit kurɔm kuzining, Kabik kazining. Kpaf tɛ fɛ́ ba ki yes yit sak ni ite iyɛ izining. 5 ATisa me yet azining, inɔɔk atsak izining, abatisma azining. 6 Adakunom azining, Ada banet ngma kusum. Iwu yet kashon na akaangan, a se ni kutomong kaakɛ, a se ayɛt kaakyɛ. 7 Awɛt sak na kaakyɛ azining yit, mi sɛ itek, kpaf ti kunang fɛ́ Anet-Isheshek mi ku nɔk. 8 Nek anɔng wu fɛ́ ba di fɛ̀,

<<Ni izen fɛ́ a kin

ngarak naton;

a kin tsɛng gung na bayɔng

fi iwu shan ni itsom;

a nɔɔk banet awe nnang zizɛɛt.>>*

9 (Akyɛ fi ifɛ̀ de, tonong ɛ, <<A ngarak naton,>> tit a kin tsang tik sak aben kaben. 10 Iwu ayɔng fɛ́ a kin tik sak aben e, iwu me yɔng fɛ́ a tɛ a ngarak sak azanɛn, nɔng ízɔk wu bin di shining katon nɛ kazatse.) 11 Iwu fɛ́ a sak bakak na ba sot batom wu, a sak bakak na ba sot batan wu, a sak bakak na ba sot bafi ishara ifɛ̀ wu, a sak bakak na ba sot banek bafi ikuus wu nɛ bafi itees bà. 12 A nye anɔng, nek ba di nye banet Adakunom nek ba di kutomong mok inok kurɔm Anet-Isheshek, 13 ma ngma yit in sot yit bazining ayɛt inɔɔk atsak, ni irēn Arim Adakunom, ma in te yit gbagba, in sɛ yit kurasak isot fi ku tas kufɛ́ Anet-Isheshek.

14 Na anɔng, in da won yit nggɔn nnon, nfi itiri aze na aza tɛ ashi fi kuwun nye ne, ni ikok nhwyɛ fi nzam-nzam itees ka ba nye ne, ni iboroso fɛ́ bafi kutsitsɛng mbɔɔs, ka ba nyes e. 15 Aza iras nggɔn in yɔng, won ni in sot yit bafi itaas atsak ayɛt ishim, won ni in rasak yit na kaakyi irén, ni in sot yit tɛ Anet-Isheshek, iwu fɛ́ a yet Ice kurɔm e. 16 Ni wu fi kurɔm e ngma di moon, nkap irɔm kana monoso mo ne atsip itosop nkap e, ayɛt kutomong kutek fi nkap irɔm ras wu fi kurɔm kana nok mo ayɛt ishim.

17 Nek anɔng, in tsin fɛ̀ ane, in shim in bang ki tabak yin ni iyerek aTisa, i bi ti i ya yin kashon ni kusot ti Ícɛn-iduk di sosok awo, bafi kuyiring abap. 18 Nhwyi mi beseng irēn bá, ba mi ka ba kam ni kutset fi ku nes na Adakunom nek avit irēn fɛ́ ku se ayɛt bá, nek kukashalang ayɛ ba bɛ. 19 Nek ba mi sot e, ba mi nɔɔk ice bá ni kusot ibeseng, nek iras in gbɛk-gbɛk nkyɔrɔk, ni ifoos ikɔk ibang ras e.

20 Awɛt iyin, anɔng fi itees Anet-Isheshek ki tonong yin awo! 21 Atsak e yet fok, iyin mi fok yin ifɛ̀ naton wu, ba mi ki tees yin kpaf na atsak fɛ́ a se ayɛt aYeso. 22 Ba kin ki tees yin ni iwobok yin nggɔn anɛn, ni kusot fi i tsang di se yin, kuyɔng fi ku beseng banet ni irèn ikɔk irɔm ni mbɔs; 23 nɔng i da sok yin nggɔn nfas ayɛt ayɛ yin; 24 nɔng i da te yin anet afas, ayɔng fɛ́ Adakunom mi ku nye na a sot ti iwu, ayɛt atsak, ni kusot kutabat nɛ ajɛrɛ.

25 Nek anɔng, kaakyɛ azining yin na a wobok mbɔɔs, na a taas afidang isot wu atsak, nek ngma yit, in yet yit nkap kurɔm kuzining. 26 <<Ayɛt ibeseng iyɛ yin, i bi ra yin inɛn awo.>> I bi won yin kunom ni ku kpa ni tsin rēn beseng yin áyɛ awo, 27 i bi nɔɔk yin aShetan kawat awo. 28 Won ayɔng fɛ́ a tsang yising, bi tɛ a di barang awo, tit na a ra kutomong kutek ni mbɔk wu, nɔng a da sɛ ikyɛng fɛ́ a di ki gbinding bayɔng fɛ́ ba bɛ̀ kudaam.

29 I bi won yin ncɛɛt kpɛɛ ni in wuru na nu yin awo, tit kucɛɛt fi ku se gyat, fi ku da nok bakak ni izen ndaam, nɔng bayɔng fɛ́ ba tsin di wes ato bin di sok ikikak. 30 I bi beseng yin Kabik aJɛrɛ Adakunom iyɛ awo, nek iwu fɛ́ a yet nagang-ice-igwɔm Adakunom fi i se naton yin, fi i da ki bereng yin sak atuk ibisik. 31 Tun yin kaakyɛ kuri iyɛ ife, ni ifa, ni ibeseng iyɛ, ni kurēn, ni ibeseng iyerek nɛ akaakyɛ kuri anyas. 32 Sot yin kyang ni foos yin angmishish bafidang, fuut bafidang anɛn bá, kpaf tɛ fɛ́ Adakunom ki fuut yin ne ayɛt Anet-Isheshek.