1 Ikyɛng fi in shim in fɛ̀ yet, ke anet iya itekari me rēn yet nggon, a se zɛɛt na asam awo, ngma ni fi ngma nkyɔrɔk e yet nfuu. 2 A rēn resek mo nawop bayɔng fɛ́ ba tsin kuyɛrɛ nɛ bayɔng fɛ́ ba tsin ku ta sak izen fɛ́ atek mi sak ninyɛn. 3 I se kpaf anɔng, ni izen fi in rēn yet yit nnon, in se yit ni isam nawop nabik fɛ́ na ya igwɔm azatse kang. 4 Awɛt fi izen e bi i nye kpaf, Adakunom tom na Arim wu sak azatse, ni irèn kutes abining, na nawop ntsi, 5 nek na a di bisik bayɔng fɛ́ ba se nawop ntsi me, nɔng in da bin sɛ yit kukyem isot nnon Adakunom. 6 Nek iyin yet yin nnon wu, Adakunom mi ki tom yin na Kabik Arim wu na ayɛ yin, Kabik e yes, <<Abba! Ada!>> 7 Nek anɔng, ngɔn ti i yet asam kong awo, tit arim wu. Nek i yet arim wu, Adakunom mi da sak i sot anet iya itekari me bà.

8 Ayame fi i tsang rēn yin Adakunom awo, in yet yin basam ni bɔk nabannom nakak fɛ́ da na kyem ikyi ikak awo. 9 Awɛt yɔkɔnɔng i rēn yin Adakunom, ke ni in fɛ̀, Adakunom ki rēn yin, akyɛ sak i shim i ti bun yin ni bɔk igwɔm nabik azatse kang fɛ́ da na bɛ́ kukyem awo yɛ? Akyɛ sak i shim i ti bun yin ni isam na ko yɛ? 10 Iyin nɔng ites yin nhwyɛ yin ni tosok nnom nkak, ni nfɛn nkak ni izen, nɛ ayɛ. 11 Iyin di tes yin nnyim, i di se ti ngma mgbang fi in sɔ nek iyin yet abap.

12 In ra awon ni yin ábaruneng, kuus yin nggɔn hom, nek imi mi sot ti iyin. Vit inɛn fi i mi di ra yin ne. 13 Iyin rēn yin fok, nek kurɔk fi ku di daam ko ku ki sak in ki shara yin mo ifɛ̀ itek. 14 Ngma ni fi kurɔk hom ki se yin ti imara ni yin, iyin da i tonong yin ibyɛs kɛ iraye awo. I di shan yin ti in yet atomaza Adakunom, ti imi wu in yet Anet-Isheshek aYeso me ni ice wu. 15 Akyɛ sɛ ifeng yin e yɛ? Imi rēn fok, ki in fi fɛ̀ ni yin ni turung yin ayisi yin ni di nesek yin, ki i fi kyem yin, ki i nye yin anɔng. 16 Yɔkɔnɔng i mi sot afidang ifa yin nek in ki tas yin atsak ɛ?

17 Banet e yɔng tsɛt ba sɔ ice yin sak abak bá, ayet nek kuyiring kutek awo, ikyɛng fɛ́ ba tsɛt yet na ba ki kam yin, nɔng i da ka ba nɔɔk yin nhwyɛ yin. 18 I se yɛɛt na ba ki nɔk yin nhwyɛ, ki in se ni irèn itek, won ni i se anɔng kaakyi izen, da ma in se gung ni iyin ninyɛn awo. 19 Naban nnon yin, bayɔng fi in tsin ti in sɔ mgbang tɛ irus ites ma izen fi nse aKristi tonong ni kusot yin, 20 a di se kin in fi in se gung ni yin, ki in shesheng kutɔ hom, nek a di se zii natoon yin.

21 Di tak yin, iyin fi i shim i kuus yin ntsi, iyin rēn yin ikyɛng fi ntsi me cɛɛt awɛ? 22 Nek i se ni jɛk fok, aIbrahim kin bɛ̀ nnon namatek e nafaa, kazining ka fɛ́ asam abining wu, ka fɛ́ afaa me ne awashak abining wu. 23 Arim wu fɛ́ a ne na asam abining e, ba kin sɛ ika ni irèn fɛ́ ba di mɛɛ, awɛt arim wu yɔng fɛ́ a ne na awashak abining e, ba kin ku tes nek kushii fɛ́ Adakunom man nye.

24 Ikyɛng deng se tɛ nawu fi in shim in di yit, banyining bafaa me nyeseng naton irosom kushii asa faa me. Irosom kushii kuzining ne ni Ihwyanang aSinai, a bi tes nnon fɛ́ na bi yet basam, ku nyeseng naton aHagar. 25 AHagar nyeseng akuce Ihwyanang aSinai ni mben Arabiya, anɔng e nyeseng naton kuwɔp aRushelima afɛ́ atut, nek a se ni isam ni nnon wu. 26 Awɛt aRushelima fɛ́ a se naton, ayɔng se washak, iwu fɛ́ a yet nggɔ yit. 27 Nek i se ni jɛk ye,

<<Nye iyɛ ikan, ngɔn akuma,

ngɔn fi i man tes awo,

ta kutɔ gbɛrɛy ni ifeng.

Ngɔn fi da i man mara

irus kutes awo,

nek nnon abining

fɛ́ amatek mi ku won,

na wat, na fɛ́ abining

fɛ́ a se gung ne amatek wu.>>

28 Nek anɔng ábaruneng, kpaf ti aIshaku, iyin yet yin nnon kushii fɛ́ Adakunom nye. 29 Ni izen e yɔng, nggon fɛ́ ba tes ni irèn fɛ́ ba mi di mɛɛ me, zoot kayɔng fɛ́ ba tes ni irèn ízɔk abik. Idɔng ites anɔng ni nnu nang. 30 Awɛt ifɛ̀ Adakunom kin fɛ̀ anɛ? <<Ro yin asam abining e nɛ arim wu, nek arim asam abining da kyem na a ya itekari gung ni nnon abining awashak awo.>> 31 Nek anɔng ábaruneng, da iyit yet yit nnon asam abining awo, tit nnon abining awashak e.