AYeso yet Ifɛ̀ Adakunom
1 Ni meseng e, Ifɛ̀ me kin di se gyam, Ifɛ̀ me kin se gung nɛ Adakunom, Ifɛ̀ me kin yet Adakunom. 2 A kin se gung nɛ Adakunom neme ni imɛsɛng e. 3 Ni kubɔk wu fɛ́ ba kin di nye kaakyɛ. Vit ikyɛng ikak fɛ́ ba kin nye vit iwu. 4 Ni wu fi kutset di nes, kutset e yɔng ko ku nesek mgbɛy sak nɛ banet ngma. 5 Mgbɛy e rong ayɛt ahwyi, da ahwyi me kyem a irēn ina awo1:5 Ke: Ahwyi, ahwyi me kyem a fɛt mgbey e awo..
6 Adakunom kin tom na anet akak, fɛ́ ba kin ku yes aYohana. 7 A kin bɛ́ nek ishara ifɛ̀ naton mgbɛy e yɔng, nɔng banet ngma da fok ifɛ̀ me, ba di nɔɔk atsak. 8 Da aYohana ice wu fɛ́ a kin yet mgbɛy e awo, a kin bɛ́ tɛ anet icɛɛt afi mgbɛy kyɛk. 9 Ayɔng fɛ́ a nesek mgbɛy atsak sak ne banet ngma kusum bi bɛ́ azatse.
10 Iwu kin se na azatse neme, ayet fok ba kin nye kaakyɛ ni kubɔk wu, ngma nɛ anɔng, kazatse me nɛ ka ku rēn awo. 11 A bɛ́ sak na bayɔng fɛ́ ba yet bafuu, wɛt bafuu me raba dan ku shan. 12 Ngma nɛ nɔng, ngma bayɔng fɛ́ ba ku shan, bayɔng fɛ́ ba di nɔɔk atsak ni iyerek wu, a mi ka ba nɔk ízɔk nɛ ba sot nnon Adakunom, 13 da kuri nnon fɛ́ na nes ni irɔm awo, da na yɔng fɛ́ ba sɛs nek imoon irɔm amatek nɛ abining awo, tit na yɔng fɛ́ Adakunom wu a nesek.
14 Ifɛ̀ me sot anet, a sot azeng azatse ngma ni yit. Iyit mi di yit ízɔk wu, ízɔk atutup Nggon e yɔng fɛ́ ka ne narɔ Ada me, a yɔng fɛ́ a mi ki tonong yit itek wu, nɛ angmishish wu, fi in di ki te yit iyɛ.
15 AYohana cɛɛt naton wu. A fɛrɛng nɛ agap yɛ, <<Iwu me yɔng fi in kin fɛ̀ ni yin yɛ, <Ayɔng fɛ́ a bi bɛ́ ama min di wat ni iratek, nek iwu kin di se neme dan ba di tes.> >>
16 Nek kudot itek nɛ angmishish wu, fi in mi sɛs yit fi in di barasa kashon sak kashon. 17 Nek ntsi kin ne ni bɔk aMusa; wɛt ishim nɛ atsak, ne ni bɔk aYeso Kristi yit. 18 Vit anet fɛ́ a kumang di Adakunom. Tit azizɛɛt nggon wu me yɔng, fɛ́ ka se nagbɔng nɛ Adakunom, fɛ́ a se ni kufam Ada me, fɛ́ a mi ki tonong yit nse Ada me weshek.