1 Wɛt aYeso tsɛ ngarak ni Ihwyanang Ifat. 2 Nɛ bop adiding, a nɛ a bun sak narɔ iya Adakunom ntong, azɔng fɛ́ banet kusum tsɛ ba ku te nate, a sonong a kpa ka ba tees. 3 Bágwɔm ntsi nɛ BaFarasi, tsɛ ba ne, na abining akak, fɛ́ ba yit ni irɔs. Ba ku sak a nyeseng ashon banet, 4 ba ma rip aYeso, yɛ, <<Akɔk-ashon, ba yit abining yo, kpaf nɛ tsin ra irɔs. 5 Ntsi aMusa fɛ̀ ni yit fok nin bara yit kuri banyining e yɔng, nɛ ata. Akyɛ fi ngɔn fɛ̀ yɛ?>> 6 Ba ku nye irip e yɔng, nɔng ba bin ku te mo agunung ba di te kukun wu.

Wɛt aYeso te nyɔk, a kpa jɛk aben ni itsambɔk. 7 Fi iba ya kashon ni i ku risim, a dorok tsik, a fɛ̀ ni ba, <<Ayɔng fɛ́ a se vit inɛn ayɛt yin, na a tun worok kuta kufi imɛsɛng.>> 8 A tɛ, a te nyɔk, a kpa ijɛk aben.

9 Fɛ́ ba fok anɔng, ba kpa nye myɛɛt bazizining, bashɔn tin tsees, bawosong di kuus, ba di won abining e aziwu ni nyeseng azɔng, nɛ aYeso. 10 AYeso, tɛ a dorok tsik, a fɛ̀ ni iwu, <<Ago, ba si kɛ? Vit akak ba fɛ̀ a da tsɛɛt ishɔt iku yɛ?>>

11 Abining e fɛ̀ ni wu, <<Vit, akɔk-ashon.>>

AYeso fɛ̀ ni iwu, <<Imi ma in da tsɛɛt ishɔt iku awo. Tseng, i bi ti iras inɛn awo.>>

12 Ni izen fɛ́ aYeso tɛ cɛɛt nɛ banet e, a fɛ̀ ni ba, <<Imi yet mgbɛy azatse. Ngma ayɔng fɛ́ a di kuus mo, a da tɛ tseng ayɛt nhwyi awo, a da sɛ mgbɛy iyɛ.>>

13 BaFarasi me, fɛ̀ ni wu, <<Di fi ngɔn nesek kanu icɛɛt naton ice ngɔn, kucɛɛt ngɔn yet atsak awo.>>

14 AYeso fɛ̀ ni ba, <<Awɛt ki in fi in cɛɛt naton ice hom, kucɛɛt hom yet atsak, nek imi rēn karɔ fi in di ne, nɛ karɔ fi in tsin di tsɛ. Nek da iyin rēn yin karɔ fi in di ne, nɛ karɔ fi in tsin di tsɛ awo. 15 Iyin ras yin ishɔt kuri ifɛ́ banet; Imi tsɛk akak ishɔt awo. 16 Awɛt ki in fi ras ishɔt, ishɔt inaan yet ifɛ́ atsak, nek imi se azimin awo. In se gung nɛ Ada fɛ́ a di tom. 17 I sɛ ni jɛk ni ntsi yin fok, kɛ banet bafaa mi nɔɔk kanu ifɛ̀, naton ikyɛng, isonong atsak. 18 Imi yet azining ayɛt bafi icɛɛt naton ice hom, anet icɛɛt afɛ́ faa me, yet Ada, fɛ́ a di tom.>>

19 Ba ma ku rip, yɛ, <<Ada ngɔn e se akɛ?>>

AYeso fɛ̀ ni iba, <<Iyin da i di rēn yin awo, da i rēn yin Ada hom awo. Ki ifi i di rēn yin, ki i rēn yin Ada hom ba.>> 20 AYeso kin nye kucɛɛt e kang, ni izen fɛ́ a kin se ni itees banet narɔ iya Adakunom ntong, bakat nɛ karɔ fɛ́ ba di nasap kunang. Ngma nɛ anɔng, vit ayɔng fɛ́ a di sak kubɔk naton wu, nek izen wu resek dan nye.

21 AYeso tɛ a ban fɛ̀ ni iba, <<Imi yɔng in da tseng, i bi di tsɛt yin, i bi kus yin ayɛt anɛn yin. Karɔ fi in di ki tseng, i da kyem i tse yin awo.>>

22 Ikyɛng e, sak bakɔk-ashon baYahuda rip yɛ, <<Kɛ a da tse a fɛt ice wu yɛ? Kɛ nek anɔng wu fɛ́ a di fɛ̀, <Karɔ fi in di ki tseng, i da kyem i tse yin awo,> yɛ?>>

23 AYeso ya kashon ni kucɛɛt, <<Iyin yet yin bafɛ́ aben; Imi ne naton. Iyin yet yin bafɛ́ azatse kang; Imi yet afɛ́ azatse awo. 24 In mi ki tak yin fok, i bi kus yin ayɛt anɛn in; ki da iyin nɔɔk yin atsak, fok imi wu in yet ayɔng fin fɛ̀ me awo, nɛ atsak e i da kus yin ayɛt anɛn yin.>>

25 Ba ku rip fok, <<Ki tak yit, ngɔn yet angan ɛ?>>

AYeso fɛ̀ ni iba, <<Imi yet ayɔng, fi in mi sɔ ni in ki taas in e. 26 Nkyɔrɔk di se dot, fi in da kyem in fɛ̀ naton yin, in ki ya yin mo ni ishɔt. Ngma nɛ anɔng, nkum ikyɛng fɛ́ ayɔng fɛ́ a di tom, fɛ̀ ni mi, ide de in taas kazatse, nek iwu yet atsak.>>

27 Iba kyem ba rēn fok a se ni icɛɛt naton Ada wu awo. 28 Nek anɔng, aYeso fɛ̀ ni iba, <<Ni izen fi i bi fi nabak in Arim Anet, ni izen e yɔng, fi i bi ni i rēn yin fok yi imi wu in yet ayɔng e, fi in fɛ̀ ni yin, fi da in ra ikikak awo, tit ikyɛng fɛ́ Ada fɛ̀ ni in nye. 29 Ayɔng fɛ́ a di tom, se gung ni mi; a tsin di won azimin awo, nek imi raas kushim iyɛ wu.>> 30 Fɛ́ a se ni kucɛɛt, banet dot di nɔɔk atsak ni wu.

31 AYeso fɛ̀ nɛ baYahuda fɛ́ ba nɔɔk atsak ni wu, yɛ, <<Ki iya yin kashon ni inye in ikyɛng fi in ki tees yin, iyin ba iyet in batitup bafi ikuus hom. 32 Na anɔng wu fi i da rēn yin atsak, atsak e da ki bisik in.>>

33 Ba fɛ̀ ni wu, <<Iyit yet yit nnon aIbrahim, da iyit ki mang sot yit basam ni bɔk akak awo, ngɔn da tsa anɛ i fɛ̀ yɛ, ba da ki bisik yit ɛ?>>

34 AYeso fɛ̀ ni iba, <<Atsak fi in tsin ki tak in, ngma ayɔng fɛ́ a ras inɛn, a yet asam inɛn. 35 Fok in, asam bɛ atitup karɔ isot ari isam wu awo, tit nggon ari me ka, ka di wey azɔng ayɛ vit igang. 36 Nek anɔng, ki Nggon e ka, ka ki bisik in, i da se yin atitup ibisik. 37 Imi rēn, iyin yet yin nnon aIbrahim. Ngma nɛ anɔng, i shim i di fɛt yin, nek ibɛ yin kawat nek ifɛ́ hom awo. 38 I mi ki taas yin, ikyɛng fi in di ashon Ada min, ni iyin, nyes yin ikyɛng fi i fok in na ada yin.*>>

39 Ba fɛ̀ ni iwu, <<Ada yit yet aIbrahim.>>

AYeso tɛ fɛ̀ ni ba, <<Ki i fi yet yin nnon aIbrahim, ki i nye yin ikyɛng fi iwu kin nye. 40 Ikyɛng fi i se aben yet, i mi sak in áyɛ yin fok ma i di fɛt in, anet fɛ́ a ki tak in atsak fi in fok nɛ Adakunom. AIbrahim kin ras nggɔn nɔng awo. 41 Iyin tsin nye yin ikyɛng fɛ́ ada yin ras.>>

Ba kpa ngɔɔt nanu yɛ, <<Da iyit yet yit, nnon irɔs awo! Ngak ada fi in bɛ́ yit yet Adakunom ice wu.>>

42 AYeso fɛ̀ ni iba, <<Kɛ Adakunom fɛ́ yet Ada yin, ki i di shim yin, nek imi ne narɔ wu, sak i bɛ́ azeng. Imi da in bɛ́ azeng nek ice min awo; Iwu fɛ́ a di tom. 43 Akyɛ sak ikyɛng fi in cɛɛt, ki se yin ni mgbang ɛ? I se anɔng, nek i rayin dan di te yin kuto ni ikyɛng fi in ki tees yin. 44 Iyin yet yin bafɛ́ ada yin aShetan, nek anɔng, i shim i nye yin ikyɛng fi i da ku terek iyɛ. Iwu yet anet ifɛs banet neme ni imɛsɛng e, vit ikyɛng fi i ku moon nɛ atsak, nek vit atsak ayɛt wu. Ngma izen fɛ́ a tsin karang abɔɔs, nggɔn wu yɔng, nek iwu yet anet nbɔs, adakop bafi nbɔs. 45 Ngma ne anɔng, nek imi ki tak yin atsak, i rayin dan di nɔɔk yin atsak! 46 Kɛ akak ayɛt yin, bɛ̀ ikyɛng fi itonong inɛn fi imi ki mang ra yɛ? Kɛ atsak wu fi in taas, wat akyɛ de i ki ro yin ni inɔɔk atsak ɛ? 47 Ngma ayɔng fɛ́ a yet a fɛ́ Adakunom, a foos ifɛ̀ Adakunom. Ikyɛng fi i ki ro yin, ni inɔɔk atsak yet, nek iyin yet yin bafɛ́ Adakunom awo.>>

48 BaYahuda me fɛ̀ ni wu, yɛ, <<Nek anɔng, wu fi in di fɛ̀ yit, ngɔn yet anet aSamariya, itseng se ni rɔm ngɔn awɛ?>>

49 AYeso fɛ̀ ni iba, <<Vit itseng fi i se ni rɔm hom, nek in nesek Ada min iratek wu, iyin ba ira yin dan di nesek yin iratek. 50 Da imi tsɛt iratek nek ice min awo, akak di se, fɛ́ a tsin di tsɛt e, iwu fɛ́ a yet anet ishɔt. 51 Won in ki tak in atsak, ngma ayɔng fɛ́ a foos ifɛ̀ min, a bi di iku awo.>>

52 Ni ifok anɔng, bakɔk-ashon baYahuda fɛrɛng, <<Yɔkɔnɔng fi in rēn yit, fok itseng se ni rɔm ngɔn! Kɛ banet tɛ aIbrahim kin kus, batan kin kus, ni ngɔn nye yɛ ayɔng fɛ́ a foos ifɛ̀ ngɔn, da a bi bamang iku awo. 53 Ngɔn wat ada yit aIbrahim ɛ? Ngma nɛ anɔng a kin ku, kpaf anɔng fɛ́ batan kin di kus. Ngɔn di ti ngɔn yet angan ɛ?>>

54 AYeso fɛ̀ ni iba, <<Ki imi wu in tsin tsɛt ice min iratek kyɛk, iratek hom da sot ikikak awo. Ada hom, fi iyin nye yin, fok a yet Adakunom yin, iwu fɛ́ a di nesek iratek. 55 Iyin da i ku rēn yin awo, imi ku rēn. Ki imi fɛ̀ da in ku rēn awo, in da sot anet nbɔɔs ti iyin, imi ku rēn, in foos ifɛ̀ wu. 56 Adakop yin aIbrahim, kin nye iyɛ ikan, fɛ́ a kin nye kuyiring ni kubɛ́ hom; a kin di iko, a nye iyɛ ikan.>>

57 BaYahuda me fɛ̀ ni iwu, <<Ngɔn fi da i mi kyem ayɛ nsɔk ntoon awo, i man di aIbrahim a?>>

58 AYeso fɛ̀ ni ba, <<Won in ki tak yin katsak, dan nɛ ba tes aIbrahim, imi di sɛ!>> 59 Ni ifok anɔng, ba kok ata, nɔng ba da ku woro mo. Awɛt aYeso kana nɛnɛng a hwyet narɔ iya Adakunom ntong e.