1 Ama kizen hyiit, aYeso tat sak ni nyi kuya kufi izek aGalili, fɛ́ ba yes iye aTibariyas, 2 kudyɛng banet kin ku kuus mo, nek ba kin di ntomong abes fɛ́ a nye, naton bafi nrɔk. 3 AYeso ma ngarak ni ihwyanang, a tsɛ sonong azɔng gung nɛ bafi imɛɛs wu. 4 Ni izen amok aPasova baYahuda ngmash ni nye.

5 Ni izen fɛ́ aYeso ta ayisi a di kudyɛng banet fɛ́ ba se ni iku kuus mo, a tirik a rip aFilibus, <<AFilibus, akɛ fi nda tsin shan yit akpam, in di ya yit nɛ banet bang ɛ?>> 6 A fɛrɛng anɔng nek a di mara aFilibus, nek iwu rēn ikyɛng inye gyam.

7 AFilibus fɛ̀ ni wu, <<Kɛ itsɔm itarang anet itomong nfi nfɛn nkara da kyem ba di shan akpam fɛ́ kaakyɛ anet fɛ́ a se azeng, di sɛ kicek e awo!>>

8 Azining ayɛt bafi imɛɛs wu, fɛ́ ba ku yes Andarawus, arunyining aSiman Bitrus wat a fɛrɛng yɛ, 9 <<Kabacam kakak kang azeng fɛ́ ka bereng ágbang akpam atoon, ni ìzos ifaa akabɛs, awɛt idɔng da kyem akyɛ ni ngane ni kudyɛng banet tɛ ba bang ɛ?>>

10 AYeso fɛ̀ ni ba, <<Fɛ̀ yin nɛ akaangan ne a sonong.>> Karɔ me kin bɛ̀ agam makiyi, batek fɛ́ ba kin se ni sosok, kin se agup atoon. 11 AYeso ma sok akpam e, a ra awon natoon e, a kabasa banet fɛ́ ba se ni sosok e, a tɛ a ka ba kaba ìzos e anɔng ba, kaangan ya ma na ku kyem. 12 Ama fɛ́ kaangan mi ya ba hwyas, aYeso ma fɛ̀ ne bafi imɛɛs wu, <<Tsi tusung yin ngma ikyɛng fi ikyɛk. Da i bi won yin ikikak bi beseng awo.>> 13 Nek anɔng, ba tsɛ ba tusung ina, ba shining nakɔmɔng kusɔk abe afaa, ni icek akpam atoon afɛ́ alikama yɔng fɛ́ a tuk, ama fɛ́ banet yas ba hwyas.

14 Ama fɛ́ banet e di ntomong abes fɛ́ aYeso nye, ba kpa nye, <<Nɛ atsak e, Atan e yɔng, fɛ̀ ba kin fɛ̀, a bi bɛ́ azatse.>> 15 AYeso mi tsang rēn fok ba shim ba di te nyeng ni wu ne a sot agwɔm ba, nek anɔng a ban ngarak yik-yik naton ihwyanang aziwu.

16 Fɛ́ kahwyɛ nye, bafi imɛɛs wu tseng sak ni izek e, 17 azɔng fɛ́ ba tsɛ ba nɔ ayɛt kukyɛ ashi, ba kpa wɔk sak ni nyi kuya sak ibɛ nɛ aKafarnahum. Ni izen yɔng, nɛ karɔ mi te hwyi, nɛ aYeso resek mo dan tse narɔ ba. 18 Nɛ ba resek mo naton itseet, awun agap kpa teng a fɛsɛm, ashi kpa ririm makiyi. 19 Ama fɛ́ ba mi tsɛ bakat amil ataat sak ataat ni ibit,* ba fɛ̀ ba di aYeso na tsin tseng naton ashi, sak ibɛ narɔ kukyɛ ashi me, inyim ka ba yit makiyi. 20 Wɛt iwu fɛ̀ ni iba, <<I bi fok yin nnyim awo, imi yɔng.>> 21 Nek anɔng wu, ba da ne ba shim ba ku nabak kubɔk, a sɛ a di nɔ ayɛt kukyɛ ashi me, ni izen izining, bafɛ́ ba di ba mi tse ba ta ni ice ibanang, sak narɔ fɛ́ ba tsin di tseng.

22 Akatson, kudyɛng banet fɛ́ ba se ni itot ni nyi kuya kufi izek e, bɛ́ ba nye kuyiring fok kukyɛ ashi kuzining ko ku kin di kyɛk azɔng, ba tɛ ba yiring fok da aYeso kin nɔ ni kukyɛ ashi me gung nɛ bafi imɛɛs wu awo, ba kin tseng aziba. 23 Akyɛ-ashi akak, fɛ́ a nes ne aTibariyas, a kin se ni nyeseng azɔng, bakat nɛ karɔ fɛ́ banet kin di ya akpam, ama fi aTisa mi di ra awon. 24 Ni izen fɛ́ kudyɛng banet e rēn fok vit aYeso nɛ bafi imɛɛs wu azɔng, ba nɔɔs ayɛt akyɛ-ashi me, ba tseng sak nɛ aKafarnahum ba tsɛ ba tsɛt aYeso.

25 Fɛ́ ba tsɛ ba ku sɛ, ni nyi kuya kufi izek e, ba ku rip yɛ, <<ARabay, nɛ a ki izen fi i mi bi i ta azeng ɛ?>>

26 AYeso fɛ̀ ni iba, <<Won in ki tak yin atsak, da iyin tsin di tsɛt yin nek kutomong abes fi i di yin awo, ayet nek akpam fi i ya yin, ihwyas yin wu. 27 I bi sɔ yin mgbang kutomong nek nayak fɛ́ na beseng awo, tit nek nayak yɔng fɛ́ na sok izen ne na nesek kutset vit igang, fi Arim Anet da ki nɔɔk yin. Naton wu fɛ́ Ada Adakunom mi di te izizɔ acicɛ wu.>>

28 Banet e tɛ ba ku rip yɛ, <<Akyɛ fi nda nye yit, in di shining yit, ikyɛng fɛ́ Adakunom shim ɛ?>>

29 AYeso fɛ̀ ni iba, <<Ikyɛng de fɛ́ Adakunom shim ni nye yin: Nɔk yin atsak, na ayɔng fi iwu tom e.>>

30 Ba tɛ ba ku rip, <<Akyɛ kutomong abes fi ngɔn da ki nye yit e, fi in da di yit, in di nɔɔk yit atsak ni ngɔn ɛ? Akyɛ fi i da ki nye yit e yɛ? 31 Badakop yit man ya amana* ni izen fɛ́ ba kin se ni kutseet ayɛt ayit! Kpaf ti ifɛ̀ Adakunom di fɛ̀, <AMusa kin ka ba nɔɔk akpam fɛ́ a ne azanɛn, yɔk nɛ ba ya.> >>

32 AYeso fɛ̀ ni ba, <<Won in ki tak yin atsak, da a kin yet aMusa wu fɛ́ a kin ki nɔɔk yin akpam fɛ́ a ne naton awo, Ada min wu fɛ́ a ki nesek yin atutup akpam fɛ́ a ne azanɛn. 33 Nek aKpam Adakunom yet ayɔng fɛ́ a nes azanɛn, fɛ́ a nesek banet azatse kutset.>>

34 Ba fɛ̀ ni iwu, <<Akɔk-ashon, ki nesek yit kuri akpam e yɔng kaakyi izen.>>

35 AYeso fɛrɛng, <<Imi wu in yet akpam e yɔng fɛ́ nesek kutset e. Ngma ayɔng fɛ́ a bɛ́ ni mi, a bi tɛ fok nzong awo, ngma ayɔng fɛ́ nɔɔk atsak ni mi, a bi tɛ fok iyɛ ngash awo. 36 Tɛ fi in man ki tak yin, iyin nɔng i mi di yin akabɛs, i ni rayin dan nɔɔk yin atsak. 37 Ngma bayɔng fɛ́ Ada me di nesek, ba da bɛ́ ni mi, ngma ayɔng fɛ́ a bɛ́ ni mi, imi da ku ramin awo. 38 Nek imi ne azanɛn, da yɔk in bin ra kushim ice min awo, tit nek in ra kushim ayɔng fɛ́ a di tom. 39 Ikyɛng de fɛ́ ayɔng fɛ́ a di tom e shim, fok da ni in wey azining ayɛt bayɔng fi iwu di nɔɔk awo, tit ni in ka ba donong ni kutset atuk igang azatse. 40 Nek kushim Ada hom yet kaangan fɛ́ a di Ari wu, a di nɔɔk atsak ni wu, na a sɛ kutset vit igang, In bi ku donong ni kutset atuk igang azatse.>>

41 Nek anɔng, bakɔk-ashon baYahuda me kpa cɛɛt nɛ ba ceshek azobok, fok nek a fɛ̀, <<Imi wu in yet akpam e yɔng fɛ́ a ne azanɛn.>> 42 Ba fɛ̀, <<Anet yɔng yet aYeso arim aYusufu awɛ? Iyit rēn yit ada nɛ nggɔ wu awɛ? A da tsa anɛ a fɛ̀, <Imi ne azanɛn sak ibɛ́ azeng ɛ?> >>

43 AYeso fɛ̀ ni ba, <<I bi cɛɛt yin ni ceshek yin nanu awo. 44 Vit anet fɛ́ a da kyem a bɛ́ ni mi, tit Ada fɛ́ a di tom, iwu fɛ́ a ku kɔrɔk, imi bi ku donong ni irɛk, atuk igang azatse. 45 I se ni ijɛk nɛ afumung àware, <Ngma ba, ba bi sɛ itees ni bɔk Adakunom.>* Ngma ayɔng fɛ́ a fok itees Ada, a di te ni tomong, a bɛ́s ni mi. 46 Vit akak fɛ́ ikuman di Ada me, tit ayɔng fɛ́ a ne narɔ Adakunom; iwu aziwu fɛ́ a ki mang di Ada me.

47 <<Won in ki tak yin atsak, ngma ayɔng fɛ́ a nɔɔk atsak, a mi sɛ kutset vit igang gyam. 48 Imi wu in yet akpam fɛ́ a nesek kutset! 49 Badakop yin kin ya amana ayɛt ayit, ngma nɛ anɔng ba kus. 50 Akpam e yɔng fɛ́ a ne azanɛn, fɛ́ ki anet ya, a da tɛ a ku awo. 51 Imi wu in yet akpam atset, fɛ́ a ne azanɛn. Kaangan fɛ́ a ya akpam e yong, a da sot ni kutset vit igang. Akpam e yong yet inam irɔm in, fi in da nɔɔk nek kazatse di ki sɛ kutset.>>

52 Wɛt baYahuda kpa nanan wɔɔn ba yɛ, <<Na anɛ, fɛ́ anet yong da ki nɔɔk yit inam irɔm wu ni in ya yit ɛ?>>

53 AYeso ban fɛ̀ ni ba, <<Won in ki tak yin atsak, ki da i ya yin inam irɔm Arim Anet, i ti i di sɔ yin nasok ka awo, vit iyin ni i sɛ kutset. 54 Ngma ayɔng fɛ́ a ya inam irɔm in, a tɛ a sɔ nasok in, a bi kutset vit igang. Imi bi ku donong atuk igang azatse. 55 Nek inam irɔm in yet nayak natek, nɛ nasok yin yet ikyɛng isɔ itek. 56 Ngma ayɔng fɛ́ a ya inam irɔm in, a tɛ, a sɔ nasok in, a di nak ni mi, imi ayɛt wu. 57 Kpaf kyɔn tɛ Ada fɛ́ a se ni kutset di tom, Imi se ni kutset nek Ada, nek anɔng ngma ayɔng fi Imi wu in yet kuyak wu, a da sɛ kutset nek Imi. 58 Akpam e yɔng fɛ́ a ne azanɛn. Badakop yin kin ya amana ba kus, wɛt ngma ayɔng fɛ́ a ya akpam ayong, a bi sot ayɛ vit igang.>>

59 A kin nye kucɛɛt e kang nɛ tsin tees narɔ inyis ne aKafarnahum.

60 Fɛ́ ba fok anɔng, bafi ikuus wu dot fɛ̀ ye, <<Itees yeng sɛ gbang makiyi. Angan da kyem a shan iye ɛ?>>

61 AYeso rēn fok bafi imɛɛs wu se ayɛt kudaam nek itees e, aYeso fɛ̀ ni ba, <<Ikyɛng e ki daam yin ɛ? 62 Wat i bi nye yin anɛ, ni izen fi i bi di yin Arim Anet tsin ngarak sak narɔ fɛ́ ka di ne ɛ? 63 Kabik ka, ka nesek kutset; kurɔm bɛ̀ agap ikikak awo. Kucɛɛt fi in mi ki nye yin ne yet kabik* ni Kutset. 64 Ngma na anɔng bakak yin raba dan nɔɔk atsak.>> Nek aYeso mi tsang rēn nkum itumung e, bayɔng fɛ́ ba raba dan nɔɔk atsak, nɛ ayɔng fɛ́ a bi ku rɛp. 65 A ya kashon ni kucɛɛt yɛ, <<Ikyɛng de fi sak in kin di fɛ̀ ni yin, vit ayɔng fɛ́ a da bɛ́ ni mi tit Ada wu a nye anɔng.>>

66 Nkum izen e yɔng bafi ikuus wu dot tɛ ba bun kama, da ba tɛ ba ku kuus mo awo. 67 Nek anɔng, aYeso tirik sak ni Kusɔk abe afaa me, a fɛ̀ ni ba, <<Iyin da tseng in ba awɛ?>>

68 ASiman aBitrus fɛ̀ ni wu, <<Akɔk-ashon, in da tseng yit sak narɔ angan ɛ? Ngɔn wu fi i bɛ̀ ifɛ̀ fi inesek kutset vit igang. 69 Iyit mi nɔɔk yit atsak, in mi rēn yit fok, ngɔn wu i yet aJɛrɛ me yɔng, fɛ́ a ne narɔ Adakunom.>>

70 AYeso ma fɛ̀, <<Imi wu, in ki kasa yin, Kusɔk abe afaa awɛ? Azining ayɛt yin yet aShetan.>> 71 (Anet fɛ́ a se ni cɛɛt naton wu yet aJudas arim aSiman aIskariyoti, azining ayɛt Kusɔk abe afaa me akabɛs, fɛ́ a bi wey ni wu.)